លោក Scot Marciel ឧបការីរងក្រសួងការបរទេសអាមេរិក
(ឆ្វេង) និងលោក អ៊ុច បូររិទ្ធ រដ្ឋលេខាធិការក្រសួងការបរទេសកម្ពុជា
ក្នុងសន្និសីទកាសែត ពីម្សិលមិញ។ រូបថត ហេង ជីវ័ន
ពាក្យសម្តីនេះ បានលើកឡើងក្នុងរយៈពេលតិចជាង ២ សប្តាហ៍ បន្ទាប់ពីគណបក្សសង្គ្រោះជាតិ បានធ្វើបាតុកម្មលើកទី ៣ រយៈពេល ៣ ថ្ងៃ ដោយមានការដើរដង្ហែក្នុងរាជធានីភ្នំពេញ ដើម្បីដាក់ញត្តិ សូមឲ្យអង្គការសហប្រជាជាតិ សហរដ្ឋអាមេរិក និងប្រទេសហត្ថលេខីដទៃទៀត នៃកិច្ចព្រមព្រៀងសន្តិភាពទីក្រុង ប៉ារីស ជួយធ្វើអន្តរាគមន៍ ដោះស្រាយ ចំពោះភាពជាប់គាំងនយោបាយបច្ចុប្បន្ន។
លោក Scot Marciel ឧបការី រងការិយាល័យអាស៊ីបូព៌ា និងប៉ាស៊ីហ្វិក នៃក្រសួង ការបរទេសសហរដ្ឋអាមេរិក បានថ្លែងថា បើទោះបីជាសហរដ្ឋអាមេរិកគាំទ្រឲ្យមានលទិ្ធប្រជាធិបតេយ្យរឹងមាំនៅ កម្ពុជាក៏ដោយ ក៏ប៉ុន្តែ «ដំណោះស្រាយណាក៏ដោយ ត្រូវតែជាដំណោះស្រាយរបស់កម្ពុជា»។ លោកបានថ្លែងក្នុងសន្និសីទសារព័ត៌មានបន្ទាប់ពីជំនួបរយៈពេល ២ ថ្ងៃ ដែលរួមមានការជួបនៅក្រសួង ការបរទេស និងការជួបតទល់ជាមួយនឹងគណបក្សប្រឆាំងថា៖ «យើងមិនមកទីនេះដើម្បីព្យាយាមដាក់ដំណោះស្រាយទេ ប៉ុន្តែ យើងប្រាកដជាគាំទ្រកិច្ចខិតខំប្រឹងប្រែងពង្រឹងដំណើរការ ប្រជាធិបតេយ្យនៅកម្ពុជា»។
លោក Marciel បានបន្ថែមថា លោកបានចូលរួមផ្លាស់ប្តូរទស្សនៈជាមួយនឹងគណបក្សប្រឆាំង ប៉ុន្តែជាថ្មីម្តងទៀត លោកបានសង្កត់ធ្ងន់លើតួនាទីរបស់សហរដ្ឋអាមេរិក ជាដៃគូមិនលម្អៀងរវាងភាគីទាំងពីរ។
លោកឲ្យដឹងទៀតថា៖ «ម្តងទៀត តួនាទីរដ្ឋាភិបាលសហរដ្ឋអាមេរិកនៅទីនេះ មិនមែនផ្តល់យោបល់នយោបាយដល់រដ្ឋាភិបា ល ឬគណបក្សប្រឆាំងទេ ... នេះត្រូវតែដោះស្រាយក្នុងចំណោមប្រជាជនកម្ពុជា»។
លោកបានបន្តថា៖ «យើងបានលើកទឹកចិត្តអ្នកពាក់ព័ន្ធឲ្យបន្តពិភាក្សា។ យើងស្វាគមន៍ ការពិតដែលបាតុកម្មនាពេលថ្មីៗនេះ...បានប្រព្រឹត្តទៅដោយសន្តិវិធី ... កិច្ចពិភាក្សា ភាពអត់ធ្មត់ គឺពិតជាមានសារៈសំខាន់ ហើយនោះជាសារមិនប្រែប្រួលរបស់យើង»។
បើទោះបីជាសហរដ្ឋ អាមេរិក មិនប្រកាន់ខាងណា ហើយនឹងបន្តជាមិត្តល្អរបស់កម្ពុជា ក៏ដោយ ក៏ប៉ុន្តែ លោក Marciel បានបន្ទរនូវការជំរុញគ្មានកែប្រែរបស់រដ្ឋាភិបាលលោកឲ្យមានការ ស៊ើបអង្កេតលើភាពមិនប្រក្រតីនៃការបោះឆ្នោត ដែលជាការទាមទារសំខាន់របស់គណបក្សសង្គ្រោះជាតិ។ លោកបានបន្តថា៖ «យើងពិតជាបាននិយាយគ្មានកែប្រែបន្ទាប់ពីការបោះឆ្នោតថា យើងគិតថា ដោយសារតែមានការចោទប្រកាន់អំពីភាពមិនប្រក្រតី ពេលដែលកើតឡើង នៅទីណាក៏ដោយលើពិភពលោក វាមានប្រយោជន៍ដែលមានការស៊ើបអង្កេតគួរឲ្យជឿទុកចិត្ត និងមានតម្លាភាព»។
កាលពីថ្ងៃ ទី២៣ ខែ កញ្ញា ស្ថានទូតអាមេរិកបានចេញសេចក្តីថ្លែងការណ៍មួយដែលសរសេរថា វត្តមានរបស់លោក William E. Todd ឯកអគ្គរដ្ឋទូតសហរដ្ឋអាមេរិក នៅពិធីបើកសម័យប្រជុំរដ្ឋសភាលើកដំបូងដោយអវត្តមានរបស់តំណាង រាស្រ្តគណបក្សប្រឆាំងទាំង ៥៥ រូប ពុំមែនជាការគាំទ្រដល់លទ្ធផលនៃការបោះឆ្នោតនៅកម្ពុជាទេ។
មន្រ្តីគណបក្សសង្គ្រោះជាតិ កាលពីម្សិលមិញ បានបដិសេធមិនផ្តល់ការអត្ថាធិប្បាយស្តីពីអ្វីដែលបានពិភាក្សាក្នុង អំឡុងកិច្ចប្រជុំជាមួយនឹងលោក Marciel នោះទេ។
លោក អ៊ុច បូរិទ្ធ រដ្ឋលេខាធិការនៃក្រសួង ការបរទេស បានថ្លែង ក្នុងសន្និសីទសារព័ត៌មាន បន្ទាប់ពីកិច្ចប្រជុំថា កិច្ចប្រជុំរវាងលោកនិងលោក Marciel គឺជាកិច្ចប្រជុំវិជ្ជមានមួយ។ លោក បូរិទ្ធ បានបន្តថា៖ «ខ្ញុំរីករាយដែលបានជួបប្រជុំជាមួយនឹងគាត់ថ្ងៃនេះ ដែលជាមិត្តចាស់ ហើយកិច្ចប្រជុំយើងជាកិច្ចប្រជុំរាក់ទាក់ ... គាត់បានលើកឡើងនូវគោលនយោបាយសហរដ្ឋអាមេរិកគាំទ្រកម្ពុជាទាំងខាង នយោបាយ និងសេដ្ឋកិច្ច ដែលជាផ្នែកសំខាន់នៃកិច្ចសហប្រតិបតិ្តការរបស់យើង»។
លោកបន្តថា៖ «គាត់ក៏បានលើកឡើងអំពីកិច្ចប្រជុំជាមួយនឹងគណបក្ស ប្រឆាំងផងដែរ ប៉ុន្តែលោកថា សហរដ្ឋអាមេរិកមិនគាំទ្រជំហរ [ណាមួយទេ] និងថា គោលនយោបាយសំខាន់បំផុតរបស់សហរដ្ឋអាមេរិក គឺគាំទ្រលទិ្ធប្រជាធិបតេយ្យ»។
លោក អ៊ូ វីរៈ ប្រធានមជ្ឈមណ្ឌលសិទិ្ធមនុស្សកម្ពុជា បានថ្លែងថា លោកមិនភ្ញាក់ផ្អើលទេចំពោះការសង្កត់ធ្ងន់របស់សហរដ្ឋអាមេរិកលើ ដំណោះស្រាយកម្ពុជាចំពោះភាពជាប់គាំង បើគិតអំពីការបោះឆ្នោតនាពេលថ្មីៗនេះ មានការចូលរួមខ្លាំងពីយុវជន និងប្រជាជន។
លោកបានបន្តថា៖ «ខ្ញុំគិតថា ប្រជាជនកម្ពុជា អាចជះឥទិ្ធពលលើលទ្ធផលនៃការចរចា និងការសម្រុះសម្រួលរវាងគណបក្សជាប់ឆ្នោតទាំងពីរ ហើយដំណោះស្រាយណាក៏ដោយគួរកើតចេញពីនោះផងដែរ ... គណបក្សទាំងពីរគួរយោងលើអ្នកបោះឆ្នោតរបស់ខ្លួន»។ លោកបានថ្លែងទៀតថា៖ «វាគ្មានអំណាចទេដែលតែងតែរង់ចាំការគាំទ្រ ពីខាងក្រៅនោះ ... ខ្ញុំគិតថា ប្រជាជនកម្ពុជាត្រូវចាប់ផ្តើមជឿជាក់ថា ខ្លួនមានសារៈសំខាន់ ហើយខ្លួនអាចធ្វើការផ្លាស់ប្តូរបាន។ នោះគឺធានានូវការពង្រឹងលទិ្ធប្រជាធិបតេយ្យ នៅក្នុងប្រទេសនេះ»៕ TK By Phnom Penh Post
No comments:
Post a Comment