ខ្សែប្រយុទ្ធ Luiz Suarez (កណ្តាល) របស់ Liverpool
ដណ្តើមបាល់ជាមួយ Koscielny (ស្តាំ) របស់ Arsenal អំឡុងការប្រកួត
Premier League នៅកីឡដ្ឋាន Emirates កាលពីថ្ងៃសៅរ៍។ AFP
បើទោះបីក្រុមកាំភ្លើងធំមួយ មិនធ្លាប់បានឈ្នះពានរង្វាន់អ្វីសោះចាប់តាំងពីឆ្នាំ២០០៥ក៏ដោយ ប៉ុន្តែ ក្រោយពីការទទួលជ័យជម្នះក្នុងលទ្ធផល ២-០ ក្នុងផ្ទះខ្លួនឯងកាលពីថ្ងៃសៅរ៍លើក្រុម Liverpool បច្ចុប្បន្ន ពួកគេកំពុងតែនាំមុខ៥ពិន្ទុដាច់នៅលើកំពូលតារាងនៃក្របខ័ណ្ឌ Premier League។
ការជឿជាក់ផ្សេងៗត្រូវបានបង្កើតឡើងនៅមុន ពេលការប្រកួតស្វិតស្វាញមួយចំនួន ខណៈដែលនៅថ្ងៃពុធ ពួកគេនឹងត្រូវធ្វើដំណើរទៅជួបក្រុម Borussia Dortmund ក្នុងក្របខ័ណ្ឌ Champions League ក្រោយពីបរាជ័យ ២-១ ក្នុងផ្ទះខ្លួនឯងក្រោមស្នាដៃក្រុមអាល្លឺម៉ង់មួយ ហើយនៅថ្ងៃអាទិត្យ ពួកគេនឹងត្រូវវិលទៅប្រកួតក្នុង Premier League វិញនៅលើទឹកដីក្រុមម្ចាស់ជើងឯក Manchester United។ លោក Wenger បាននិយាយទាក់ទងនឹងការទទួលជ័យជម្នះលើក្រុម Liverpool ថា៖ «វាពិតជាសំខាន់ការក្នុងការបង្កើតការជឿជាក់ដល់គ្រប់គ្នាថា យើងអាចទទួលជ័យជម្នះក្នុងការប្រកួតធំៗ»។
លោក Mourinho ទទួលស្គាល់ពីការព្រួយបារម្ភផ្សេងៗ ក្រោយពី Chelsea ចាញ់
លោក Jose Mourinho អ្នកចាត់ការទូទៅរបស់ Chelsea អាចនឹងធ្វើការផ្លាស់ប្តូរផ្សេងៗ ក្រោយពីធ្វើការរិះគន់យ៉ាងខ្លាំងក្លាទៅលើកីឡាកររបស់ខ្លួន បន្ទាប់ពីការបរាជ័យដ៏មិននឹកស្មានដល់ក្នុងលទ្ធផល ២-០ នៅលើទឹកដីរបស់ក្រុម Newcastle United។
គ្រូបង្វឹករបស់ Chelsea បានធ្វើការវាយប្រហារចំៗអំពីការមិនពេញចិត្តរបស់លោក ក្រោយពីការបង្ហាញនូវទម្រង់លេងមិនល្អមួយបានធ្វើឲ្យពួកគេ ខ្ជះខ្ជាយឱកាសជាច្រើនក្នុងការបង្កើនក្តីសង្ឃឹមនៃការប្រជែងដណ្តើម ពាន Premier League។
លោក Pellegrini រីករាយជាមួយនឹងការរកបាន៧គ្រាប់របស់ Man City
លោក Manuel Pellegrini អ្នកចាត់ការទូទៅរបស់ក្រុម Manchester City បានកោតសរសើរទៅលើភាពមុតស្រួចនៃក្រុមរបស់លោក ខណៈដែលពួកគេបានបំបាក់ Norwich យ៉ាងចាស់ដៃក្នុងលទ្ធផល ៧-០ នៅឯកីឡដ្ឋាន Eastlands។
លោក Pellegrini បានរងនូវការរិះគន់ផ្សេងៗក្នុងរយៈពេលប៉ុន្មានសប្តាហ៍ថ្មីៗនេះ ក្រោយពី Man City បានធ្លាក់ចូលក្នុងភាពត្រដាបត្រដួសក្នុងការស្វែងរកទម្រង់លេងដ៏ ល្អរបស់ពួកគេ។ ប៉ុន្តែ Norwich បានរងបរាជ័យយ៉ាងចាស់ដៃក្រោមស្នាដៃ Man City កាលពីថ្ងៃសៅរ៍ ខណៈដែលគ្រូបង្វឹកសញ្ជាតិស៊ីលីរូបនេះ បានផ្តល់នូវទម្រង់លេងដ៏គួរឲ្យចាប់អារម្មណ៍ដែលលោករំពឹងថា នឹងបង្កើតនៅពេលដែលលោកផ្ទេរមកពីក្លិប Malaga ដើម្បីជំនួសលោក Roberto Mancini។
លោក Moyes ថា Rooney និង Van Persie គឺជាកាំភ្លើងធំរបស់ Man United
លោក David Moyes ដែលជាអ្នកចាត់ការទូទៅជឿជាក់ថា ខ្សែប្រយុទ្ធ Robin van Persie និង Wayne Rooney កំពុងតែស្វែងរកទម្រង់លេងដែលនឹងជួយឲ្យ Manchester United ធ្វើការការពារពានរង្វាន់ Premier League របស់ខ្លួន។
លោក Moyes ជឿជាក់ថា ខ្សែប្រយុទ្ធទាំងពីររូបរបស់លោក អាចនឹងក្លាយជាការដៃគូប្រយុទ្ធដ៏មានប្រសិទ្ធភាពបំផុតក្នុង ក្របខ័ណ្ឌអឺរ៉ុប និងក្នុងលីករបស់ពួកគេក្នុងពេលទទួលជ័យជម្នះក្នុងលទ្ធផល ៣-១ លើទឹកដីក្រុម Fulham កាលពីថ្ងៃសៅរ៍ បានបង្ហាញថា ពួកគេកំពុងតែចាប់ផ្តើមបង្ហាញពីភាពខ្លាំង ក្រោយពីចាប់ផ្តើមមិនល្អក្នុងយុទ្ធនាការនេះ៕ IS
លទ្ធផលកាលពីថ្ងៃសៅរ៍
ក្របខ័ណ្ឌអង់គ្លេស
Premier League
Hull 1 Sunderland 0
Stoke 1 Southampton 1
West Brom 2 Crystal P. 0
West Ham 0 Aston Villa 0
No comments:
Post a Comment