កសិករថៃកំពុងបញ្ជាគ្រឿងចក្រច្រូតស្រូវនៅវាលស្រែក្នុងខេត្តសុផានប៊ូរី ប្រទេសថៃ។ រូបថត Bloomberg
មូលនិធិរូបិយវត្ថុអន្តរជាតិបានឲ្យដឹងកាលពីថ្ងៃអង្គារនៅ ក្នុងរបាយការណ៍វាយតម្លៃប្រចាំឆ្នាំរបស់ខ្លួនស្តីពីសេដ្ឋកិច្ចថៃ ថា ការខាតបង់ក្នុងកម្មវិធីសន្យាទិញស្រូវនេះនឹងបន្តកើតឡើង បើគោលនយោបាយនេះនៅតែមិនផ្លាស់ប្តូរនោះ។
កម្មវិធីទិញស្រូវ ដែលជាគោលនយោបាយមួយក្នុងចំណោមគោលនយោបាយរបស់រដ្ឋាភិបាលលោកស្រី នាយករដ្ឋមន្ត្រី យីងឡាក់ ស៊ីណាវ៉ាត្រា ដែលទទួលបានសំឡេងគាំទ្រច្រើនពីតំបន់ដាំដំណាំស្រូវនៅប្រទេស ថៃ បានខាតបង់កាន់តែច្រើនយ៉ាងហោចណាស់ចំនួន ៤,៤៦ ពាន់លានដុល្លារ ចាប់តាំងពីប្រទេសនេះបានអនុវត្តគោលនយោបាយមួយនេះនៅឆ្នាំ ២០១១ មក។
រដ្ឋាភិបាលថៃទិញស្រូវពីកសិករក្នុងតម្លៃខ្ពស់ជាងទីផ្សារ តែបាននិងកំពុងជួបប្រទះនឹងការលំបាកក្នុងការលក់ចេញវិញនៅលើ ទីផ្សារអន្តរជាតិ។ គម្រោងនេះត្រូវបានរៀបចំឡើងវិញដោយគណៈរដ្ឋមន្ត្រីថៃសម្រាប់ អនុវត្តនៅឆ្នាំទីបីកាលពីខែ តុលា តែរដ្ឋាភិបាលថៃបានសម្រេចកាត់បន្ថយបរិមាណសាច់ប្រាក់ទិញស្រូវសរុប ពីកសិករក្នុងមួយគ្រួសារ។
មូលនិធិរូបិយវត្ថុអន្តរជាតិបានឲ្យ ដឹងក្នុងរបាយការណ៍របស់ខ្លួនថា៖ «ដោយសារតម្លៃសន្យាទិញស្រូវនេះខ្ពស់ជាងតម្លៃទីផ្សារប្រមាណ ៤០ ភាគរយនោះ រដ្ឋាភិបាលមិនអាចគេចផុតពីការខាតបង់នោះទេ ដរាបណាកម្មវិធីនេះនៅតែមិនផ្លាស់ប្តូរនោះ។ រដ្ឋាភិបាលថៃ បានផ្តល់ថវិកាចំនួន ៤១០ ពាន់លានបាតដល់មូលនិធិប្រាក់បង្វិលសម្រាប់គ្រប់គ្រងគម្រោងទិញ ស្រូវនេះតែពុំមានការបញ្ជាក់ច្បាស់លាស់ទេថាតើកម្រិតនៃការខាត បង់នេះ នឹងស្ថិតនៅក្នុងទំហំនៃមូលនិធិនេះដែរឬយ៉ាងណានោះ»។
អង្ករគឺជាធញ្ញជាតិសំខាន់របស់ប្រទេសថៃ និងជាទំនិញនាំចេញមួយក្នុងចំណោមទំនិញនាំចេញសំខាន់របស់ប្រទេស នេះ។ តែប្រទេស ឥណ្ឌា និង វៀតណាម បានវ៉ាដាច់ប្រទេសថៃក្នុងនាមជាប្រទេសនាំចេញអង្ករច្រើនជាងគេ របស់ពិភពលោកកាលពីឆ្នាំ ២០១២ ដោយសាររដ្ឋាភិបាលថៃស្តុកអង្ករទុក ដើម្បីចៀសវាងការខាតបង់កាន់តែច្រើន។
មូលនិធិរូបិយវត្ថុអន្តរជាតិបានឲ្យដឹងថា កង្វះទិន្នន័យស្តីពីកម្មវិធីទិញស្រូវនេះ បានធ្វើឲ្យប៉ះពាល់ដល់ទំនុកចិត្តផ្នែកហិរញ្ញវត្ថុសាធារណៈរបស់ថៃ។
ក្រុមមន្ត្រីថៃបានឲ្យដឹងក្នុងរបាយការណ៍ដដែលនេះថា ការកាត់បន្ថយតម្លៃសន្យាទិញស្រូវ ឬកម្រិតទិញស្រូវនេះ អាចជាកត្តាចាំបាច់ ដើម្បីបន្តអនុវត្តគោលនយោបាយនេះ តែបានបញ្ជាក់ថា គម្រោងនេះគឺមានបំណងកាត់បន្ថយវិសមភាពសេដ្ឋកិច្ចនៅប្រទេស ថៃ។
មូលនិធិរូបិយវត្ថុអន្តរជាតិបានស្នើឲ្យរដ្ឋាភិបាលថៃ ផ្លាស់ប្តូរកម្មវិធីសន្យាទិញស្រូវ និងឧបត្ថម្ភធនទូទៅជាមួយនឹងកម្មវិធីមួយចំនួនដែលត្រូវបានកំណត់ ទិសដៅចំពោះក្រុមប្រជាពលរដ្ឋងាយរងគ្រោះវិញ ដូចជាគ្រួសារកសិករដែលមានប្រាក់ចំណូលតិចជាដើម។
រដ្ឋាភិបាល ថៃ បាន អន្តរាគមន៍ទីផ្សារស្រូវតាមរយៈមធ្យោបាយមួយចំនួនគិតចាប់ពីដើម ទសវត្សរ៍ឆ្នាំ ១៩៦០ មក ដើម្បីជួយកសិករ ប៉ុន្តែគម្រោងបច្ចុប្បន្នមានប្រភពដើមពីគោលនយោបាយដ៏មាន ប្រជាប្រិយភាពរបស់បងប្រុសរបស់លោកស្រី យីងឡាក់ គឺលោក ថាក់ស៊ីន ស៊ីណាវ៉ាត្រា ដែលជាអតីតនាយករដ្ឋមន្ត្រី និងបានឈ្នះឆ្នោតយ៉ាងភ្លូកទឹកភ្លូកដីរយៈពេលពីរអាណត្តិជាប់គ្នា មុនពេលរូបលោកត្រូវបានទម្លាក់ពីអំណាចកាលពីឆ្នាំ ២០០៦។
គម្រោងនេះត្រូវបានរារាំងដោយអំពើពុករលួយ និងរងការចោទប្រកាន់ថា រដ្ឋាភិបាលបានលក់តួលេខចំណាយពិត៕ BP
No comments:
Post a Comment