ប្រជានេសាទកំពុងនេសាទកណ្តាលភ្លៀងធ្លាក់ខ្លាំង។ រូបថត ហេង ជីវ័ន
លោក ចាន់ យុត្ថា អ្នកនាំពាក្យក្រសួងធនធានទឹកនិង ឧតុនិយមបានប្រាប់ ភ្នំពេញ ប៉ុស្តិ៍នៅថ្ងៃនេះថា ក្រុមព្យាការីអាកាសធាតុបានព្យាករណ៍ពីស្ថានភាពនៃការធ្វើដំណើរ របស់ វិសម្ពាធថ្មីមួយដែលបានកើតឡើងនៅមហាសមុទ្រ ប៉ាស៊ីហ្វិច បានអះអាងថា វាបានធ្វើដំណើរឆ្លងចូលមកដល់មហាសមុទ្រចិនខាងត្បូងនិងកំពុង បន្តឆ្ពោះមកទិសខាងលិចក្នុងល្បឿន ២២ គីឡូម៉ែត្រក្នុងមួយម៉ោង។ វិសម្ពាធថ្មីមួយនេះនឹងធ្វើដំណើរមកដល់ភាគអាគ្នេយ៍ប្រទេសវៀត ណាមនៅថ្ងៃសុក្រស្អែកនេះ ហើយថាវានឹងថយឥទ្ធិពលមកជាសម្ពាធទាបសកម្មវិញ។
លោក យុត្ថា បានបន្តថា ដោយពិនិត្យតាមខ្សែគន្លងរបស់វា សម្ពាធទាបសកម្មនេះនឹងធ្វើដំណើអូសកាត់តំបន់ភាគខាងត្បូងប្រទេស កម្ពុជា។ បាតុភូតធម្មជាតិខាងលើនេះអាចនឹងបង្កឲ្យសា្ថនភាពអាកាសធាតុតាម បណ្ដាខេត្តមួយចំនួនក្នុងតំបន់ទំនាបកណ្ដាល និងតំបន់មាត់សមុទ្រ នៃប្រទេសកម្ពុជា មានភ្លៀងធ្លាក់ពីមធ្យមទៅច្រើន លាយឡំជាមួយខ្យល់កន្ត្រាក់បក់បោកខ្លាំង នៅថ្ងៃសុក្រនិងថ្ងៃសៅរ៍ខាងមុខនេះ។ ជាមួយគ្នានេះវានឹងបង្ករឲ្យរលកសមុទ្រមានកំពស់ពីមួយម៉ែត្រទៅ ពីរម៉ែត្រ។
លោក យុត្ថា បានថ្លែងថា៖ «ប្រជាពលរដ្ឋនៅភាគខាងត្បូងរាជធានី ភ្នំពេញ និងតំបន់មាត់សមុទ្រចាំបាច់ត្រូវបង្កើនការប្រុងប្រយ័ត្នខ្ពស់ ចំពោះបាតុភូតនេះ ជាពិសេសប្រជានេសាទ និងអ្នកដំណើរកម្សាន្តតាមសមុទ្រយកល្អគួរផ្អាកសកម្មភាពនេសាទនិង ការកម្សាន្តទៅកាន់តំបន់ដែនកោះក្នុងផ្ទៃសមុទ្រចំនួនពីរថ្ងៃគឺ ថ្ងៃសុក្រ និងថ្ងៃសៅរ៍ ដើម្បីចៀសវាងគ្រោះថ្នាក់ផ្សេងៗដែលអាចកើតឡើងជាយថាហេតុ»។
កម្ពុជាថ្មីៗនេះបានគេចផុតពីការវាយប្រហារដោយប្រព័ន្ធ វិសម្ពាធទាប ដែលជាផ្នែកមួយនៃឥតទ្ធិពលរបស់ខ្យល់ព្យុះសង្ឃរាហាយយ៉ាន់ (Haiyan) ដែលបានបោកបក់និងសម្លាប់មនុស្សជាងមួយម៉ឺននាក់និងបំផ្លាញហិដ្ឋា រចនាសម្ព័ន្ធស្ទើរទាំងស្រុងក្នុងទីក្រុង តិចឡូបាន(Tecloban)នៃខេត្តឡេយ៍ទី(Leyte) និង តំបន់មួយចំនួនទៀត ក្នុងខេត្តសាមា(Samar)ប្រទេសហ្វីលីពីន ខណៈលំនៅឋានប្រជាពលរដ្ឋរាប់រយខ្នងក្នុងតំបន់ឆ្នេរភាគខាងជើង នៃប្រទេសវៀតណាមត្រូវបានបំផ្លាញដោយធ្វើឲ្យមនុស្សជាច្រើនម៉ឺន នាក់គ្មានទីជម្រក។
កាលពីថ្ងៃព្រហ្បត្តិ ពីរសប្តាហ៍កន្លងទៅនេះភ្លៀងលាយឡំនឹងខ្យល់កន្ត្រាក់ បានបក់បោកលើខេត្តកំពង់ឆ្នាំង នឹង ខេត្តកណ្ដាល បណ្ដាលឲ្យប្រជាពលរដ្ឋបីនាក់ស្លាប់ និង ផ្ទះចំនួនជាង១០០ខ្នង រងការខូចខាត។ ថ្មីៗកន្លងមកនេះប្រទេសកម្ពុជា បានទទួលរងផលប៉ះពាល់យ៉ាងខ្លាំង ពីឥទ្ធិពលនៃប្រព័ន្ធវិសម្ពាធទាប ដែលជាផ្នែកមួយនៃការបំម្រែបំម្រួលអាកាសធាតុ ។
យោងតាមរបាយការណ៍របស់គណៈកម្មាធិការជាតិគ្រប់គ្រងការប្រែប្រួល អាកាសធាតុ បានបង្ហាញថា គ្រោះទឹកជំនន់នៅឆ្នាំនេះ បានបង្កការខាតបង់ទ្រព្យសម្បត្តិ និងហេដ្ឋារចនាសម្ព័ន្ធនានាសរុបជាទឹកប្រាក់ ប្រមាណ ៨០០ លានដុល្លារអាមេរិក និងបង្ករឲ្យមនុស្ស ១៦៨ នាក់ស្លាប់ ហើយប្រជាជនជាង ១,៨ លាននាក់ រងផលប៉ះពាល់ និងខូចខាតដំណាំស្រូវប្រមាណជាង ៣០ ម៉ឺនហិកតា។ By Phnom Penh Post
No comments:
Post a Comment