បុគ្គលិកធនាគារក្នុងស្រុកមួយកំពុងរាប់លុយ។
បន្ទាប់ពីការបោះឆ្នោតការផ្តល់កម្ចីខ្នាតធំហាក់ត្រូវបានរឹតបន្តឹង។
រូបថត ហេង ជីវ័ន
ភ្នំពេញៈ ធនាគារក្នុងស្រុកនាពេលថ្មីៗនេះបានពង្រឹងការត្រួតពិនិត្យ លក្ខខណ្ឌនានា និងបន្ថែមរយៈពេលច្រើនជាងមុនក្នុងការវាយតម្លៃផ្តល់កម្ចីខ្នាត ធំ។
លោកស្រី សូ ផនណារី អនុប្រធាននាយកប្រតិបត្តិធនាគារ អេស៊ីលីដា បានឲ្យដឹងថា អេស៊ីលីដា ត្រូវការការត្រួតពិនិត្យហ្មត់ចត់ជាងមុនទៅលើការផ្តល់កម្ចី ខ្នាតធំពិសេសកម្ចីដែលមានទំហំទឹកប្រាក់ច្រើនជាង ៣ ម៉ឺនដុល្លារ។ ប៉ុន្តែកម្ចីសម្រាប់អាជីវកម្មខ្នាតតូច និង មធ្យមនៅបន្តផ្តល់ជូនសេវាកម្ម និង លក្ខខណ្ឌដូចដើម។
លោកស្រីបន្តថា៖ «យើងមានសំណើសុំប្រាក់កម្ចីនៅគរច្រើនតាំងពីមុនមក ដូច្នេះយើងត្រូវការពេលច្រើនជាងមុនក្នុងការផ្តល់កម្ចីខ្នាតធំ។ យើងត្រូវការព័ត៌មានឲ្យបានគ្រប់គ្រាន់ពេលវេលាត្រួតពិនិត្យ និងវាយតម្លៃឲ្យបានល្អិតល្អន់ជាងមុន។ ប៉ុន្តែសម្រាប់កម្ចីខ្នាតតូច យើងនៅបន្តផ្តល់ជូនក្នុងលក្ខខណ្ឌដូចពីមុនអ៊ីចឹង»។
ដំណើរការប្រតិបត្តិការនៅក្នុងធនាគារ អេស៊ីលីដា មានស្ថានភាពល្អ ទាំងការសងត្រឡប់របស់អតិថិជន និងកំណើនអតិថិជនដែលទទួលកម្ចី។ នេះបើតាមអ្នកស្រី ផនណារី។ អ្នកស្រីបន្តថា អត្រាកម្ចីអត់ដំណើរការដែលអាចថា ជាសូចនាករមួយក្នុងការត្រួតពិនិត្យពីសុខុមាលភាពរបស់ប្រាក់កម្ចី មានត្រឹមតែ ០,៤ ភាគរយប៉ុណ្ណោះបើប្រៀបធៀបនឹងទំហំប្រាក់កម្ចីសរុបរបស់ អេស៊ីលីដា។ ចំនួនអតិថិជនផ្នែកកម្ចីក៏មានការកើនផងដែរ គឺពី ៣២៨ ២៧២ នាក់នៅដំណាច់ខែ កក្កដា ដល់ ៣២៨ ៨១០ នាក់នៅដំណាច់ខែ សីហា។
ស្រដៀង គ្នានឹងការលើកឡើងខាងលើនេះ អ្នកជំនាញក្នុងឧស្សាហកម្មធនាគារក៏បានលើកឡើងពីដំណើរការល្អ នៃប្រតិបត្តិការក្នុងវិស័យធនាគារ ទាំងទំហំប្រាក់កម្ចី ប្រាក់បញ្ញើ និងការសងត្រឡប់របស់អតិថិជន។
លោកស្រី ងួន សុខា អគ្គនាយិកាធនាគារជាតិនៃកម្ពុជា បានប្រាប់ ភ្នំពេញ ប៉ុស្តិ៍ កាលពីម្សិលមិញថា ដំណើរការជារួមនៅក្នុងឧស្សាហកម្មធនាគារមានស្ថានភាពល្អ ហើយការរឹតបន្តឹងក្នុងការផ្តល់ប្រាក់កម្ចីខ្នាតធំនេះមិនមាន ទាក់ទងនឹងការដាក់និយតកម្មថ្មីណាមួយពីខាងធនាគារជាតិឡើយ។ លោកស្រីអះអាងថា៖ «វាជាការរឹតបន្តឹងឬ ការដាក់គោលនយោបាយផ្ទៃក្នុងរបស់ធនាគារនីមួយៗដើម្បីធ្វើឲ្យប្រាកដ ថា ការរីកចម្រើនរបស់ពួកគេគឺប្រកបដោយសុខុមាលភាព»។
ធនាគារ ក្នុងស្រុកមួយផ្សេងទៀត គឺធនាគារ កាណាឌីយ៉ា បានឲ្យដឹងថា នៅបន្តការផ្តល់កម្ចីទាំងខ្នាតតូច និងខ្នាតធំដូចធម្មតា។ លក្ខខណ្ឌក្នុងការទទួលកម្ចីរយៈពេលក្នុងការសងត្រឡប់ និងទំហំ កម្ចីនៅបន្តដំណើរការដូចពេលកន្លងមក។ តែបើតាមមន្រ្តីផ្នែកឥណទាននៅធនាគារ កាណាឌីយ៉ា ម្នាក់សុំមិនបញ្ចេញឈ្មោះ បានឲ្យដឹងថា អត្រាការប្រាក់សម្រាប់ប្រាក់កម្ចីដែលមានទំហំចាប់ពី ១ ម៉ឺនដុល្លារឡើងទៅ ត្រូវបានដំឡើងពី ១,២ ភាគរយ ទៅ ១,៥ ភាគរយក្នុងមួយខែ។
មានការដកប្រាក់យ៉ាងច្រើនពីធនាគារក្រោយការបោះឆ្នោត ហើយដំណឹងពីការផ្អាកកម្ចីខ្នាតធំក៏បានកើតឡើងចាប់តាំងពីពេល នោះមកដែរ ខណៈស្ថានភាពនយោបាយនៅពេលនេះនៅតែមានភាពមិនច្បាស់លាស់។
លោក Grant Knuckey នាយកប្រតិបត្តិធនាគារ ANZ Royal បានឲ្យដឹងថា ដំណើរការក្នុងឧស្សាហកម្មធនាគាក្នុងអំឡុងពេលក្រោយពេលបោះឆ្នោត នេះនៅមានស្ថានភាពជាប្រក្រតី ហើយទន្ទឹមនេះខាងធនាគារ ANZ Royal មិនបានរឹតបន្តឹង ឬ ផ្អាកការផ្តល់កម្ចីដល់អតិថិជន ទោះក្នុងទំហំកម្ចីណាមួយក៏ដោយ។
លោកបន្តថា៖ «យើងផ្តល់កម្ចីដោយផ្អែកលើការប្រមើលមើលពីទិដ្ឋភាព និងដំណើរការអាជីវកម្មក្នុងរយៈពេលវែង។ ដូច្នេះភាពមិនច្បាស់លាស់នៃស្ថានភាពនយោបាយក្នុងរយៈពេលខ្លីនេះ នឹង មិនអាចប៉ះពាល់ដល់ការសម្រេចចិត្តរបស់យើងជារួមបានឡើយ»៕ By Phnom Penh Post
No comments:
Post a Comment