ក្រុមនិស្សិតស្រីកម្ពុជាមូស្លីមមកពីបណ្តាខេត្ត ែដលទទួលឲ្យស្នាក់នៅអន្តេវាសិកដ្ឋាន នៃសមាគម CMSA។ រូបថត សហការី
តាំងពីច្រើនសតវត្សរ៍មកហើយ មានសហគមន៍ខ្មែរអ៊ិស្លាម ជាច្រើនបាននិងកំពុងបន្តការរស់ជាមួយប្រជាជនខ្មែរយ៉ាងសុខដុមរម្យនា ដោយភាតរភាព នៅលើទឹកដីព្រះរាជាណាចក្រកម្ពុជា រហូតក្លាយជាជនជាតិភាគតិចនៅក្នុងប្រទេសនេះនាពេលបច្ចុប្បន្ន និងមានសិទ្ធិរស់នៅស្របច្បាប់ដូចប្រជាពលរដ្ឋខ្មែរទូទៅដែរ។ ប៉ុន្តែចាប់តាំងពីដើមទសវត្សរ៍១៩៧០ ខណៈដែលភ្លើងសង្គ្រាមស៊ីវិលឆាបឆេះរាលដាលពេញផ្ទៃមាតុភូមិអង្គរមក ការរស់នៅរវាងសហគមន៍ខ្មែរ និងសហគមន៍ខ្មែរអ៊ិស្លាមពុំសូវមានសមភាពនឹងគ្នាប៉ុន្មានទេ ដោយឡែកនៅក្នុងវិស័យអប់រំគេក៏ពុំសូវឃើញមានសិស្សនិស្សិតមូស្លីម ច្រើនប៉ុន្មានដែរ ជាពិសេសកាន់តែតិចតួចបំផុតនៅគ្រឹះស្ថានឧត្តមសិក្សា ដែលអាចជាបច្ច័យមួយនាំដល់ភាពពុំសូវមានមុខមាត់ នៅក្នុងសង្គមពីសហគមន៍អ៊ិស្លាម។
លោកសុស ហ្វាស៊ី បានបន្ត ថា បន្ទាប់ពីបង្កើតបានជាសមាគមនិស្សិតមូស្លីមកម្ពុជាហើយ ក៏មានកិច្ចសហការពីសហគមន៍មូស្លីមនានានៅតាមបណ្តាប្រទេសកាន់សាសនា អ៊ិស្លាម ដូចជាម៉ាឡេស៊ី និងប្រទេសពីតំបន់អារ៉ាប់ផងដែរ។ ចំពោះកិច្ចសហការជាមួយបរទេសនេះ គឺមានមូលនិធិមនុស្សធម៌ Al Bukhory ប្រទេសម៉ាឡេស៊ី និងរដ្ឋបាលនៃរដ្ឋម៉ាឡាកា បានផ្តល់ជាអាហារូបករណ៍ដល់និស្សិតមូស្លីមកម្ពុជាក្រីក្រមួយចំនួន មានឱកាសបន្តការសិក្សានៅថ្នាក់ឧត្តមសិក្សាតាំងពីឆ្នាំ១៩៩៩មក ម្ល៉េះ។
«លុះចាប់ពីឆ្នាំសិក្សា២០០៨មក មូលនិធិមនុស្សធម៌ Al Bukhory បានបន្តផ្តល់អាហារូបករណ៍ដល់និស្សិតជាមធ្យមមួយឆ្នាំ៣-៤រូប ដើម្បីបន្តការសិក្សានៅថ្នាក់ឧត្តមសិក្សាផ្នែកវិទ្យាសាស្ត្រកសិកម្ម ពេទ្យ បច្ចេកទេសទូទៅ និងផ្នែកធម្មការអ៊ិស្លាមផងដែរ»នេះបើតាមសម្តីរបស់លោក ហ្វាស៊ី។
ទន្ទឹមគ្នានេះដែរ មានអង្គការក្នុងស្រុករបស់ប្រទេសម៉ាឡេស៊ីឈ្មោះ Al Manar NGO ក៏បានផ្តល់អាហារូបករណ៍ដល់និស្សិតមូស្លីមកម្ពុជា ដែលកំពុងសិក្សានៅក្នុងប្រទេសកម្ពុជាប្រមាណជាង ២០រូបទៀត ឲ្យបន្តសិក្សានៅថ្នាក់ឧត្តមសិក្សា នៅតាមមហាវិទ្យាល័យនានានៅភ្នំពេញ។ រហូតមកដល់ពេលនេះពួកគាត់ខ្លះកំពុងសិក្សានៅកម្រិតឧត្តមសិក្សា និងអ្នកខ្លះក៏បានបន្តការសិក្សានៅថ្នាក់ក្រោយឧត្តមសិក្សា( អនុបណ្ឌិត)ផងដែរ។
លោក ហ្វាស៊ី បានអះអាងថា «ការផ្តល់អាហារូបករណ៍របស់ Al Manar នេះ គឺគេជ្រើសរើសនិស្សិតតាមរយៈសមាគមរបស់យើង ហើយគេបង់ថ្លៃសិក្សាឲ្យពេញមួយឆ្នាំៗតែម្តង។ មានមុខវិជ្ជាខ្លះថ្លៃ ៤០០-៥០០ដុល្លារក្នុងមួយឆ្នាំ រីឯមុខវិជ្ជាខ្លះទៀតក្នុង១ឆ្នាំថ្លៃជាង១០០០ដុល្លារក៏មានដែរ គឺទៅតាមមុខវិជ្ជាដែលនិស្សិតម្នាក់ៗត្រូវសិក្សា»។
«ការផ្តល់អាហារូបករណ៍ទាំងនេះ គឺវាមានន័យខ្លាំងណាស់សម្រាប់ជីវិតនិស្សិតមូស្លីមកម្ពុជាក្រីក្រ ទាំងឡាយ» នេះបើតាមសម្តីរបស់លោក ហ្វាស៊ី។
«ថ្មីៗនេះ មានមូលនិធិសប្បុរសធម៌មួយទៀតដែលកើតចេញ ពីភរិយាថ្នាក់ដឹកនាំប្រទេសម៉ាឡេស៊ី បានផ្តល់អាហារូបករណ៍ដល់និស្សិតកម្ពុជា ១០រូប សម្រាប់ឆ្នាំសិក្សា២០១៣នេះ»។
លោកពន្យល់ថា ជាធម្មតារាល់ការផ្តល់អាហារូបករណ៍ គ្រប់រូបភាពទាំងអស់ គឺទាំងខាងមូលនិធិ និងអង្គការគេបានទំនាក់ទំនងមកសមាគមនិស្សិតមូស្លីមកម្ពុជា របស់យើងដោយមានស្ថានទូតម៉ាឡេស៊ី ប្រចាំនៅភ្នំពេញ ជាអ្នកណែនាំផងដែរ។
ក្រៅអំពីការផ្តល់អាហារូបករណ៍ដល់និស្សិត ជំនួយពីប្រទេសម៉ាឡេស៊ី តាមរយៈសមាគមរបស់យើងក៏នៅមានផ្តល់ជាវគ្គបណ្តុះបណ្តាលវិជ្ជាជីវៈ ខ្លី ដូចជាវិជ្ជាកាត់ដេរសម្រាប់ស្ត្រីមូស្លីមកម្ពុជានៅទីជនបទ ដើម្បីឲ្យពួកគាត់ទទួលបាននូវមុខរបរមួយអាចលើកស្ទួយជីវភាពរស់នៅ របស់ពួកគាត់បានប្រសើរឡើងផងដែរ។ វគ្គនេះបន្ទាប់ពីការសិក្សាចប់ស្ត្រីទាំងនោះទទួលបានម៉ាស៊ីនដេរជា អំណោយនោះតែម្តង។
«ទន្ទឹមនឹងការផ្តល់អាហារូបករណ៍ការសិក្សា សមាគមក៏ បានបង្កើតបានជាអន្តេវាសិកដ្ឋាន២កន្លែង នៅរាជធានីភ្នំពេញ សម្រាប់ការស្នាក់នៅរបស់សិស្សនិស្សិតស្រីមូស្លីមកម្ពុជា ចំនួនជិត២០០រូប ដែលពួកគេមកពីតាមខេត្តនានា» នេះបើតាមសម្តីរបស់លោក ហ្វាស៊ី។ អន្តេវាសិកដ្ឋានទី១ នៅក្បែរវិហារអ៊ិស្លាមអន្តរជាតិឌូបៃ នៅបឹងកក់ និងទី២ នៅវិហារអ៊ិស្លាមកុឡាឡោម ក្នុងសង្កាត់ជ្រោយចង្វារ។
បន្ថែមលើសពីនេះទៀត ក៏នៅមានមជ្ឈមណ្ឌលកុមារកំព្រាមួយកន្លែង នៅព្រែកប្រា សម្រាប់ទទួលកុមារកំព្រាមូស្លីមកម្ពុជា ១២០នាក់ ស្នាក់នៅ និងសិក្សានៅទីនោះ។ ទាំងអន្តេវាសិកដ្ឋាន ទាំងមជ្ឈមណ្ឌលកុមារកំព្រា គឺសុទ្ធសឹងពុំអាចកាត់ផ្តាច់ចេញពីចំណែកនៃការជួយជ្រោមជ្រែងពី ប្រជាជនម៉ាឡេស៊ី បានឡើយ។
លោក ហ្វាស៊ី បានរៀបរាប់បនែ្ថមថា «ជំនួយពីប្រទេសម៉ាឡេស៊ី គឺពុំមែនមានតែសម្រាប់វិស័យអប់រំ ប៉ុណ្ណោះទេ ប៉ុន្តែថែមទាំងបានចូលរួមនៅក្នុងកិច្ចការសង្គមជាច្រើនទៀត ដូចជាការសាងសង់សាលារៀនសម្រាប់សិក្សាគម្ពីរគូរ៉ានចំនួន២កន្លែង នៅស្រុកកងមាសខេត្តកំពង់ចាម។ សាងសង់សូរ៉ាវ សាងសង់វិហារអ៊ិស្លាម ជាង ៥០កន្លែង នៅទូទាំងប្រទេសកម្ពុជា ដូចជាខេត្តកំពង់ឆ្នាំង កំពង់ចាម ក្រចេះ ស្ទឹងត្រែង កំពត ប៉ៃលិន និងរាជធានីភ្នំពេញ ផងដែរ»។
សម្រាប់អណ្តូងទឹកស្អាត វិញ នៅទូទាំងប្រទេសកម្ពុជា សមាគមបានទទួលអំណោយពីសប្បុរសជនភាគច្រើនពីប្រទេសម៉ាឡេស៊ី គឺបានកសាងមិនតិចជាង ៣០០អណ្តូងស្នប់ទេ៕
By Phnom Penh Post
No comments:
Post a Comment