ខ្សែបម្រើ Mesut Ozil ចូលរួមជាមួយ Arsenal ក្នុងតម្លៃខ្លួន៤២,៤លានផោន ពីក្លិប Real Madrid។ AFP
ក្នុងចំណោមសកម្មភាពដ៏មមាញឹកក្នុងរយៈពេលប៉ុន្មានម៉ោងចុងក្រោយ នាថ្ងៃបិទទីផ្សារដោះដូរកីឡាករនៃរដូវកាលនេះ Arsenal បានធ្វើរឿងដ៏គួរឲ្យភ្ញាក់ផ្អើលមួយជាមួយនឹងការផ្ទេរចូល Ozil ក្នុងតម្លៃខ្លួនដែលត្រូវបានគេរាយការណ៍ថា ប្រមាណជា៤២,៤លានផោន (ស្មើនឹង៦៦លានដុល្លារអាមេរិក។ការផ្ទេរមួយនេះ បានកើតឡើងនៅថ្ងៃដែល Gareth Bale បានបង្ហាញខ្លួនជាកីឡាកររបស់ Real Madrid ក្រោយពីការចាកចេញពីក្លិប Tottenham Hotspur ដែលជាគូប្រជែងរបស់ Arsenal ក្នុងតម្លៃខ្លួនប្រមាណជា៨០លានផោន ដើម្បីនាំឲ្យមានការបើកផ្លូវសម្រាប់ការចាកចេញរបស់ Ozil តែម្តង។
Arsenal បានឲ្យដឹងថា Ozil បានចុះហត្ថលេខាលើកិច្ចសន្យារយៈពេលវែងមួយ ដែលមានរយៈពេល៥ឆ្នាំ ក្រោយពីរូបគេបានទទួលការត្រួតពិនិត្យសុខភាពនៅក្នុងទីក្រុង Munich។ លោក Arsene Wenger អ្នកចាត់ការទូទៅរបស់ Arsenal និងបានស្ថិតក្រោមសម្ពាធពីសំណាក់អ្នកគាំទ្ររបស់ក្លិបនេះក្នុង ការទិញចូលកីឡាករដ៏សំខាន់ម្នាក់នោះ បាននិយាយថា៖ «យើងពិតជារីករាយក្នុងការចុះហត្ថលេខាជាមួយកីឡាករ Mesut Ozil»។
Ozil បាននិយាយប្រាប់គេហទំព័ររបស់ Arsenal ថា៖ «ខ្ញុំពិតជារំភើបក្នុងការចូលរួមជាមួយនឹងក្លិបដ៏ធំដូចជា Arsenal និងកំពុងតែសម្លឹងឆ្ពោះទៅមុខដើម្បីលេងក្នុងក្របខ័ណ្ឌ Premier League»។ Arsenal ដែលមិនធ្លាប់បានចំណាយទឹកប្រាក់ច្រើនជាង១៥លានផោនលើកីឡាករម្នាក់ កាលពីមុនមកនោះ ក៏បានប្រកាសពីការចុះហត្ថលេខាជាមួយនឹងអ្នកចាំទីអន្តរជាតិអ៊ីតាលី Emiliano Viviano វ័យ២៧ឆ្នាំ ពីក្លិប Palermo ក្នុងលក្ខខណ្ឌខ្ចីជើងពេញមួយរដូវកាលផងដែរ។ ការផ្ទេររបស់ Ozil គឺជាការអភិវឌ្ឍដ៏សំខាន់បំផុតនៅថ្ងៃមួយដែលការចំណាយទឹកប្រាក់ សរុបពីសំណាក់ក្លិបស្ថិតក្នុងក្របខ័ណ្ឌ Premier League អំឡុងថ្ងៃបើកទីផ្សារដោះដូរនៃរដូវកាលនេះ មានចំនួនច្រើនជាង៥០០លានផោនជាលើកទី១ នេះបើយោងទៅតាមវិទ្យាស្ថានប្រឹក្សាយោបល់ផ្នែកហិរញ្ញវត្ថុ Deloitte។
ក្រោយពីជួបរដូវក្តៅទី១ដ៏ខកចិត្តក្នុងនាមជាអ្នកចាត់ការទូទៅ របស់ Man United លោក David Moyes បាននាំយកខ្សែបម្រើអន្តរជាតិបែលហ្ស៊ិក Fellaini ដែលជាកីឡាករលោកបានធ្វើការជាមួយនៅឯក្លិប Everton ក្នុងព្រមព្រៀងមួយក្នុងតម្លៃខ្លួន២៧,៥លានផោន។ ប៉ុន្តែ ក្រុមម្ចាស់ការពារតំណែងជើងឯករបស់អង់គ្លេសមួយនេះ បានបរាជ័យក្នុងការប្រមាញ់ទិញខ្សែការពារស្លាបឆ្វេងអន្តរជាតិ ព័រទុយហ្គាល់ Fabio Coentrao របស់ Real Madrid និងខ្សែបម្រើ Ander Herrera របស់ក្លិប Athletic Bilbao។ ភ្នាក់ងារសារព័ត៌មាន Press Association របស់ចក្រភពអង់គ្លេស បានបញ្ជាក់ថា Man United មានការយឺតយ៉ាវពេកក្នុងការដាក់នូវសំណើរបស់ពួកគេដើម្បីចុះ ហត្ថលេខា Coentrao ក្នុងលក្ខខណ្ឌខ្ចីជើង ខណៈដែលព័ត៌មានដ៏ចម្លែកពីប្រទេសអេស្ប៉ាញបានរាយការណ៍ថា ការផ្ទេរ Herrera បានទទួលបរាជ័យ ក្រោយពីមនុស្សបីនាក់បានក្លែងបន្លំដើម្បីជាអ្នកតំណាងឲ្យក្លិប មួយនេះនៅឯការិយាល័យលីករបស់អេស្ប៉ាញ។
Everton ក៏បានលក់ខ្សែប្រយុទ្ធ Victor Anichebe ទៅឲ្យក្លិប West Bromwich Albion ផងដែរសម្រាប់តម្លៃខ្លួនដែលអាចនឹងកើនដល់៦លានផោន ប៉ុន្តែ ពួកគេបានចុះហត្ថលេខាជាមួយនឹងខ្សែបម្រើអន្តរជាតិអៀរឡង់ James McCarthy ក្នុងតម្លៃខ្លួន១៣លានផោន ពីក្លិប Wigan Athletic។
លោក Roberto Martinez ដែលជាអ្នកជំនួសតំណែងលោក Moyes ក៏បានឈានដល់ការព្រមព្រៀងផ្សេងទៀតផងដែរក្នុងការខ្ចីជើង ខ្សែបម្រើ Gareth Barry របស់ក្លិប Manchester City និងខ្សែប្រយុទ្ធអន្តរជាតិបែលហ្ស៊ិក Romelu Lukaku ដែលត្រូវបានអនុញ្ញាតឲ្យចាកចេញពី Chelsea បើទោះបីបង្ហាញនូវទម្រង់លេងដ៏គួរឲ្យចាប់អារម្មណ៍នៅឯ West Brom កាលពីរដូវកាលមុនក៏ដោយ។
Liverpool ដែលជាក្រុមកំពុងតែឈរនៅលើកំពូលតារាង Premier League នាពេលបច្ចុប្បន្ន បានបំពេញនូវការទិញចូលកីឡាករចំនួន៣នាក់នៅថ្ងៃបិទទីផ្សារនោះ។ ខ្សែការពារ Mamadou Sakho និង Tiago Ilori បានចូលរួមជាមួយពួកគេក្រោយពីផ្ទេរមកពីក្លិប Paris Saint-Germain និង Sporting Lisbon រៀងៗខ្លួន ខណៈខ្សែបម្រើស្លាប Victor Moses បានចុះហត្ថលេខាទៅLiverpool ក្នុងលក្ខខណ្ឌខ្ចីជើងពី Chelsea។
Liverpool ត្រូវបានគេរាយការណ៍ថា បានចំណាយប្រាក់ប្រមាណជា២៥លានផោនក្នុងការទិញ Ilori និងខ្សែការពារអន្តរជាតិបារាំង Sakho ដែលបានបាត់បង់កៅអីក្នុងជម្រើសដំបូងនៅ PSG។
Aston Villa បានធ្វើឲ្យខ្សែប្រយុទ្ធអន្តរជាតិឆែក Libor Kozak ក្លាយជាកីឡាករចំណូលថ្មីទី៧របស់ពួកគេតាមរយៈការផ្ទេររូបគេពី ក្លិប Lazio ក្នុងកិច្ចសន្យារយៈពេល៤ឆ្នាំ ជាមួយនឹងតម្លៃខ្លួនប្រមាណជា៧លានផោន។ West Brom បានបំបែកកំណត់ត្រានៃការផ្ទេររបស់ពួកគេដើម្បីនាំយកខ្សែបម្រើ អន្តរជាតិបេណាំង Stephane Sessegnon ពីក្លិប Sunderland ដែលបានចុះហត្ថលេខាជាមួយខ្សែប្រយុទ្ធអន្តរជាតិអ៊ីតាលី Fabio Borini ក្នុងលក្ខខណ្ឌខ្ចីជើងពីក្លិប Liverpool និងខ្សែការពារស្លាបឆ្វេង Andrea Dossena ពីក្លិប Napoli។
រយៈពេល៧ខែ ក្រោយពីការចាកចេញពីក្លិប West Brom នៅថ្ងៃចុងក្រោយនៃទីផ្សារដោះដូរកីឡាករកាលពីខែមករា ក្នុងក្តីសង្ឃឹមក្នុងការចូលរួមជាមួយនឹងក្លិប Queens Park Rangers បានទទួលបរាជ័យ ខ្សែប្រយុទ្ធអន្តរជាតិនីហ្សេរីយ៉ា Peter Odemwingie បានចាកចេញពីកីឡដ្ឋាន Hawthorns ដើម្បីចូលរួមជាមួយនឹងក្លិប Cardiff City ក្នុងកិច្ចសន្យារយៈពេលពីរឆ្នាំ៕ IS By Phnom Penh Post
No comments:
Post a Comment