អតិថិជនកំពុងដកប្រាក់ពីម៉ាស៊ីន អេធីអឹម ពីធនាគារក្នុងស្រុកមួយ ។ រូបថត ហេង ជីវ័ន
ភ្នំពេញៈ
ការស្ទង់មតិទីផ្សារទៅលើអ្នកដឹកនាំពាណិជ្ជកម្មបរទេសនៅ
កម្ពុជាបង្ហាញថា
ទំនុកចិត្តនៅក្នុងសេដ្ឋកិច្ចកម្ពុជាបានធ្លាក់ចុះប្រហែល ៥០
ភាគរយក្នុងពេលមានភាពតានតឹងក្រោយការបោះឆ្នោត។
ការស្ទង់មតិធ្វើឡើងដោយក្រុមហ៊ុនស្រាវជ្រាវឥណ្ឌូឆាយណា
មានមូលដ្ឋាននៅភ្នំពេញបានរកឃើញថា ៩៨
ភាគរយក្នុងចំណោមអ្នកឆ្លើយតបបានបង្ហាញពីទំនុកចិត្តនៅ
ពេលសួរប្រហែលមួយខែមុនពេលការបោះឆ្នោត កាលពីថ្ងៃទី ២៨ ខែកក្កដា។
ប៉ុន្តែនៅក្នុងការតាមដានបន្ទាប់ពី ការបោះឆ្នោតរួច
តួលេខបានធ្លាក់ចុះមកនៅ ៤៧ ភាគរយ។
លោក Karl Johan Remoy
អ្នកគ្រប់គ្រងទូទៅនៅក្រុមហ៊ុនស្រាវជ្រាវឥណ្ឌូឆាយណាកម្ពុជា
បានថ្លែងថា
ថ្វីបើមានការឆ្លើយតបក្នុងចំនួនកាន់តែតិចនៅក្នុងកម្រងសំណួរ
តាមដានខាងក្រោមបន្ទាប់ការបោះឆ្នោតនេះក៏ដោយ
ក៏បញ្ហានេះនៅតែចង្អុលបង្ហាញពីការផ្លាស់ប្តូរឥរិយាបថដោយសារតែ
ព្រឹត្តិការណ៍នយោបាយថ្មីៗនេះ។
ភាពតានតឹងកើតឡើងចាប់តាំងពីការបោះឆ្នោត
ដែលបានធ្វើឲ្យអាប់អួដោយការចោទប្រកាន់ការលួចបន្លំ សន្លឹកឆ្នោត។
មេដឹកនាំគណបក្សសង្គ្រោះជាតិបានបដិសេធលទ្ធផលបោះឆ្នោតបណ្តោះ
អាសន្នដែលបានប្រកាសដោយ គ.ជ.ប និងគណបក្សប្រជាជនកម្ពុជា។
ការស្ទង់មតិអ្នកដឹកនាំពាណិជ្ជកម្ម បរទេសរបស់ក្រុមហ៊ុនឥណ្ឌូឆាយណា
បានចាប់ផ្ដើមកាលពីឆ្នាំ ២០១១
ដែលកំណត់អ្នកមានអាជីពការងារនៅកម្ពុជាដូចជា អគ្គនាយក
អ្នកគ្រប់គ្រងទូទៅ ឬសមាជិករបស់ក្រុមដឹកនាំជាន់ខ្ពស់។ ប្រហែល ១៥០
អង្កេតត្រូវបានបញ្ជូនតាមរយៈសារអេឡិចត្រូនិក
និងការឆ្លើយតបមានជាប្រចាំប្រហែលពី ៣០ រហូតដល់ ៤០ ភាគរយ។
អ្នកចូលរួមត្រូវបានសួរមុនពេល
និងក្រោយពេលការបោះឆ្នោតដើម្បីវាយតម្លៃទំនុកចិត្តរបស់ពួកគេ
នៅក្នុងសេដ្ឋកិច្ចកម្ពុជាក្នុងរយៈពេលពី ៦ ខែរហូតដល់ ១២ ខែក្រោយ
ដែលចាប់ពី ២ឆ្នាំ រហូតដល់ ៣ ឆ្នាំ និងចាប់ពី ៣ ឆ្នាំរហូតដល់ ៥
ឆ្នាំ។
លោក Karl Johan Remoy និយាយថា
ការធ្លាក់ចុះគួរឲ្យភ្ញាក់ផ្អើលនៅក្នុងទំនុកចិត្តនេះមាន
ក្នុងរយៈពេលខ្លីពី ៦ ខែ ទៅ ១២ ខែប៉ុណ្ណោះ។ លោកបន្តថា៖
«ពាណិជ្ជករបរទេសហាក់ដូចជាគិតថា
ព្រឹត្តិការណ៍នយោបាយថ្មីៗនឹងមិនមានឥទ្ធិពលដល់សេដ្ឋកិច្ច
រយៈពេលវែងរបស់កម្ពុជានោះទេ»។
លោក ចម ប្រសិទ្ធ
រដ្ឋមន្រ្តីក្រសួងពាណិជ្ជកម្មបានព្រមានកាលពីដើមខែនេះថា
ការធ្វើបាតុកម្មអាចបង្អាក់ដល់កំណើនសេដ្ឋកិច្ច។ លោកបន្តថា
សេដ្ឋកិច្ចជាតិអាចកើនឡើងក្នុងអត្រា ៧,៦
ភាគរយនៅឆ្នាំនេះបើគ្មានបញ្ហាអ្វីនោះ។
លោក កង ច័ន្ទតារារ័ត្ន
នាយកវិទ្យាស្ថានសិក្សាអភិវឌ្ឍន៍កម្ពុជានិយាយថា
លទ្ធផលនៃការអង្កេតនេះមិនមានអ្វីគួរឲ្យភ្ញាក់ផ្អើលទេ។
លោកបានថ្លែងថា៖«យើងគ្មានសញ្ញាច្បាស់លាស់ណាមួយ
ឬសញ្ញាដែលគួរឲ្យជឿពីស្ថិរភាពនៅឡើយទេ
ព្រោះបើអ្នកធ្វើដំណើរតាមជនបទអ្នកអាចមើលឃើញវត្តមាន
កងរាជអាវុធហត្ថ អ្នកអាចមើលឃើញរថក្រោះ កងទ័ព
ហើយបើអ្នកសម្លឹងមើលទៅក្នុងប្រព័ន្ធផ្សព្វផ្សាយព័ត៌មាន
ពួកគេធ្វើឲ្យការភ័យខ្លាចពីមហាបាតុកម្មកាន់តែរីកធំឡើងៗ។
វត្តមាននេះគឺជាសញ្ញាគំរាមកំហែងសម្រាប់ប្រជាជនដែលមានមូលធន
និងប៉ះពាល់ដល់ការវិនិយោគបរទេស
ប៉ុន្តែតម្រូវការបរទេសសម្រាប់ផលិតផល ដូចជា សម្លៀកបំពាក់ ផងដែរ។
លោកបន្តថា៖
«ស្ថិរភាពនយោបាយគឺមានទំនាក់ទំនងយ៉ាងខ្លាំងជាមួយនឹងស្ថិរភាពនៃ
ការផ្គត់ផ្គង់ អាស្រ័យដូចនេះ ខ្ញុំពិតជាគិតថា
នឹងមានផលប៉ះពាល់យ៉ាងខ្លាំងដល់សេដ្ឋកិច្ចប្រសិនបើអស្ថិរភាពនេះ
នៅតែបន្ត»។
លោកបានបន្តថា ការជាប់គាំងនយោបាយនេះនឹងមិនធ្វើឲ្យប្រទេសអាស៊ីអាគ្នេយ៍មួយនេះ មានស្ថានភាពដូចនៅអេហ្ស៊ីបនោះទេ។
ទាក់ទងនឹងលទ្ធផលនៃការ សិក្សានេះ លោកស្រី ងួន សុខា
អគ្គនាយកនៅធនាគារជាតិនៃកម្ពុជា បាននិយាយថា
លោកស្រីមិនមានស្ថិតិពីការវិនិយោគផ្ទាល់ពីបរទេស
ឬការមកដល់របស់ភ្ញៀវទេសចរនៅពេលថ្មីៗនេះទេ។
លោកស្រីថ្លែងថា៖ «យើងមិនមានទិន្នន័យក្នុងការបញ្ជាក់ថា
ការសន្និដ្ឋាននេះត្រឹមត្រូវនោះ»។ លោកស្រីលើកឡើងថា
វាឆាប់ពេកក្នុងការទាញការសន្និដ្ឋាន
ប៉ុន្តែបានចង្អុលបង្ហាញពីវិស័យធនាគារបន្តិចបន្ទួច
ដោយសារចំនួនទឹកប្រាក់ដែលបានដកពីធនាគារកាលពីថ្ងៃបោះឆ្នោត។
លទ្ធផលរបស់ក្រុមហ៊ុនស្រាវជ្រាវឥណ្ឌូឆាយណាបានបង្ហាញថា
ពាណិជ្ជករបរទេសមានទំនុកចិត្តនៅក្នុងសេដ្ឋកិច្ចកម្ពុជានាពេលអនាគត
ក្នុងការសាកសួរមុនពេលបោះឆ្នោតនៅខែមិថុនា
ច្រើនជាងកាលពីឆ្នាំមុន ដោយមាន ៩៨ ភាគរយធៀបនឹង ៨០
ភាគរយកាលពីឆ្នាំ ២០១២ និង ៨២ ភាគរយ កាលពីឆ្នាំ ២០១១៕PB By Phnom Penh Post
No comments:
Post a Comment