ភ្នំពេញៈតួលេខពីក្រសួងពាណិជ្ជកម្មបានបង្ហាញថា រយៈពេល៣ខែដើមឆ្នាំ២០១៣នេះ ប្រទេសកម្ពុជាបាននាំចូលយានយន្តគ្រប់ប្រភេទក្នុងបរិមាណជាង ២សែន៤ពាន់គ្រឿង គិតជាទឹកប្រាក់មានចំនួនជាង ១៧៣លានដុល្លារ ដែលកាលពីឆ្នាំទៅការនាំចូលយានយន្តគ្រប់ប្រភេទមានចំនួនជាង ២សែន១ម៉ឺន៧ពាន់គ្រឿង គិតជាទឹកប្រាក់មានចំនួនជាង១២១លានដុល្លារ។
របាយការណ៍ដ៏ដែលនេះបានបង្ហាញទៀតថា ការនាំចូលយានយន្តគ្រប់ប្រភេទក្នុងរយៈពេល៣ខែដំបូងឆ្នាំ ២០១៣នេះមានការធ្លាក់ចុះជាង៥% បើប្រៀបធៀបនិងរយៈពេលដូចគ្នាកាលពីឆ្នាំកន្លងទៅ។
បើទោះបីជាការនាំចូលយានយន្តគ្រប់ប្រភេទក្នុងរយៈពេល៣ខែដំបូង ឆ្នាំ ២០១៣នេះមានការធ្លាក់ចុះក៏ដោយ តែបើយោងការចុះបញ្ជីយានយន្តថ្មីៗនៅក្រសួងសាធារណការនិងដឹកជញ្ជូន បានឲ្យដឹងថា ការចុះបញ្ជីត្រឹមត្រូវរបស់យានយន្ត ដែលបានដាក់លក់នៅលើទីផ្សារកម្ពុជា ក្នុងរយៈពេល៣ខែដំបូងដើមឆ្នាំ ២០១៣នេះ មានការកើនឡើងគួរឲ្យគត់សំគាល់។
លោក ព្រាប ច័ន្ទវិបុល ប្រធាននាយកដ្ឋានដឹកជញ្ជូនផ្លូវគោកនៃក្រសួងសាធារណការនិងដឹកជញ្ជូន បានមានប្រសាសន៍ប្រាប់អ្នកសារព័តមានថា៖ក្នុងរយៈពេល៣ខែដំបូងដើមឆ្នាំ ២០១៣នេះ យានយន្តសរុបដែលបានមកចុះបញ្ជីត្រឹមត្រូវទាំងម៉ូតូនិងរថយន្ត បានកើនឡើងជាង១ម៉ឺនគ្រឿង បើប្រៀបធៀបនិងរយៈពេលដូចគ្នាកាលពីឆ្នាំទៅ។
លោក ព្រាប ច័ន្ធវិបុលបានបន្តថា ក្នុងរយៈពេល៣ខែដំបូងដើមឆ្នាំ ២០១៣នេះ មានម៉ូតូចំនួន ៦ម៉ឺន៦ពាន់៦៥០គ្រឿង និងមានរថយន្តចំនួន ១ម៉ឺន៣ពាន់៧៦គ្រឿងបានមកចុះបញ្ជីត្រឹមត្រូវនៅក្រសួងសាធារណការ និងដឹកជញ្ជូន ដែលកាលពីឆ្នាំ២០១២ មានម៉ូតូចំនួន ៦ម៉ឺន១ពាន់៥០៩គ្រឿង និងរថយន្តមានចំនួន ១ម៉ឺន៨រយ៨៧គ្រឿង។ ហើយបើសរុបយានយន្តទាំងអស់ទូទាំងប្រទេសក្នុងរយៈពេល៣ខែដំបូងឆ្នាំ ២០១៣នេះមានចំនួន ៨ម៉ឺន២ពាន់៧២០គ្រឿង។
លោក ព្រាប ច័ន្ទវិបុលបន្ថែមថា កត្តាដែលធ្វើឲ្យមានការកើនឡើងនៃការចុះបញ្ជីយានយន្តនេះគឺដោយសារ ប្រទេសកម្ពុជាមានកំណើនសេដ្ឋកិច្ច ជាពិសេសប្រជាជនមានជីវភាពធូរធារដែលអាចមានលទ្ធភាពទិញយានយន្តបាន។
ក្រុមអ្នកវិភាគសេដ្ឋកិច្ចកម្ពុជាបានមានប្រសាសន៍ថា ទីផ្សារថយន្តក្នុងប្រទេសកម្ពុជាចាប់ពីពេលនេះតទៅកាន់តែមានសន្ទុះ កើនឡើងជាលំដាប់ ជាពិសេសក្រុមហ៊ុនថ្មីៗដែលផលិតរថយន្តសំខាន់ៗដូចជា BMW របស់អាលឺម៉ង់ Cherolet របស់អាមេរិក បានកំពុងសំលឹង និងចាប់អារម្មណ៍ទីផ្សារកម្ពុជាជាខ្លាំង។
ក្រុមអ្នកវិភាគបន្តថា សក្តានុពលដែលធ្វើឲ្យក្រុមហ៊ុនល្បីៗទាំងនោះ ចាប់អារម្មណ៍ទីផ្សារកម្ពុជា ដោយសារតែប្រទេសកម្ពុជាមានការរីកចំរើនផ្នែកសេដ្ឋកិច្ច និងប្រជាជនថ្នាក់មធ្យមដែលមានចំនួនច្រើនជាងគេនោះ ចាប់ផ្តើមមានចំណូលសម្រាប់ការទិញរថយន្ត។
សូមបញ្ជាក់ថា ប្រទេសកម្ពុជាបាននាំចូលយានយន្តគ្រប់ប្រភេទពីប្រទេសជប៉ុន ថៃ ចិន កូរ៉េខាងត្បូង សហរដ្ឋអាមេរិក និង បណ្តាប្រទេសនៅអ៊ឺរ៉ុប៕ដោយស្រីស
No comments:
Post a Comment