រក​ឃើញ​ ២​ក្រុម​ទៀត ​ឡើង​ទៅវគ្គ​៤ក្រុម​ចុង​ក្រោយ​ នៃ​ពាន​ Sponsor Futsal-Cup

ភ្នំពេញៈ វគ្គ៨ក្រុមចុងក្រោយ នៃការប្រកួតបាល់ទាត់ ដណ្ដើមពានរង្វាន់ Sponsor Futsal-Cup លើកទី២ ឆ្នាំ ២០១៣ នេះបានបញ្ចប់ហើយ ហើយជើងខ្លាំង ២ក្រុមមាន Daniel-A និង ក្រុមស្រ្ដេតប៊ល ក៏បានដឹកដៃគ្នាឡើង ទៅវគ្គបន្ត ផងដែរ ក្រោយពីបានទម្លាក់ គូប្រកួតរៀងៗខ្លួន រួចមកកាលពី យប់មិញ ។
ការឡើងមកដល់វគ្គនេះក្រុម Daniel-A បានយកឈ្នះក្រុមយុវជន ខេត្តមណ្ឌលគិរី ទាំងប្រផិតប្រផើយ ដោយលទ្ធផល បច្ចេកទេស ៨-៧ ។ ក្នុងការប្រកួតពេញ ម៉ោង ៤០នាទីពេញ ក្រុមទាំងពីររកបានតែ ៣គ្រាប់ស្មើគ្នា ប៉ុណ្ណោះ ដូច្នេះ លោកអាជ្ញាកណ្ដាល ក៏សម្រេចឲ្យក្រុមទាំងពីរ ទាត់បាល់ប៉េណាល់ទី៥ បាល់ម្ខាង ។ ជាលទ្ធផលក្រុម Daniel-A ធ្វើ សម្រេចបាន ៥គ្រាប់ ខណៈក្រុមយុវជន ខេត្តមណ្ឌលគិរីបាន៤គ្រាប់ ។ សរុបលទ្ធផល ក្រុម Daniel-A ឈ្នះក្រុមយុវ ជនខេត្តមណ្ឌលគិរី លទ្ធផលជាផ្លូវការ ៨-៧ ។
ចំណែកក្រុមស្រេ្ដតប៊ល បានបំបាក់ក្រុមគិរីរម្យ អេហ្វស៊ី ៥-១ ដើម្បីបង្ខំឲ្យក្រុមគិរីរម្យ ត្រឡប់ទៅផ្ទះវិញទាំងសោក ស្តាយ ។ រីឯជ័យជំនះរបស់ក្រុម ស្រ្តេតប៊ល ធ្វើឲ្យក្រុមនេះ មានឱកាសឡើងទៅប្រកួត នៅវគ្គជម្រុះ ៤ក្រុមចុងក្រោយបន្ដ ។
សូមបញ្ជាក់ថា សម្រាប់កម្មវិធីប្រកួត នៅវគ្គជម្រុះវិលជុំ ៤ក្រុមចុងក្រោយនៃព្រឹត្តិការណ៍ Sponsor Futsal-Cup លើកទី ២នេះ នឹងចាប់ផ្ដើមប្រកួត នៅថ្ងៃទី០៨ ខែវិច្ឆិកា ឆ្នាំ២០១៣ ស្អែកនេះ លើទីលានបាល់ទាត់ 3G ដោយមានក្រុមកំពុង ឈរចាំមុន Daniel-B ប្រកួតជាមួយក្រុម Daniel-A និងក្រុមស្រ្ដេតប៊ល ប្រកួតជាមួយ ក្រុមទួលសង្កែ All Star ។ ចាំមើលក្រុមមានសំណាង ដណ្ដើមបាន៣ពិន្ទុមុនគេនោះ? វគ្គនេះក្រុមដែលសន្សំពិន្ទុ បានច្រើនជាងគេ នឹងត្រូវលើកពាន តែម្ដង មិនមានវគ្គផ្តាច់ព្រ័ត្រនោះទេ ៕