កម្ពុជា ស្មើឡាវ ២-២ទាំងបះសក់ ខណៈថៃ លុត វៀតណាម ២-០

ភ្នំពេញៈ ទីបំផុតក្រុមជម្រើសជាតិ U23 កម្ពុជា ដណ្ដើមបានកៅអី វគ្គពាក់កណ្ដាល ផ្ដាច់ព្រ័ត្រ ដោយជោគជ័យ ក្រោយពីប្រកួត ស្មើលទ្ធផលជាមួយ នឹងក្រុម U23ឡាវ ២-២ សម្រាប់មួយប្រកួត ចុងក្រោយនៃវគ្គជម្រុះ ក្នុងពូលB នាល្ងាចថ្ងៃពុធ ទី០៦ ខែវិច្ឆិកា ឆ្នាំ២០១៣នេះ នៅលើទីលាន ពហុកីឡដ្ឋានជាតិ ។ ចំណែកក្រុម U23 ថៃ បានបំបាក់ ក្រុម U23 វៀតណាម ដោយលទ្ធផល បច្ចេកទេស ២-០ យ៉ាងងាយ ។

សម្រាប់កៅអី ១/២ផ្ដាច់ព្រ័ត្ររបស់ក្រុម U23កម្ពុជា គឺពិតជាលំបាក ដណ្ដើម បានខ្លាំងណាស់ នៅក្នុងការប្រកួត ៩០នាទី ពេញជាមួយនឹងក្រុម U23ឡាវនោះ ។

តង់ទី១ ក្រុមរវាងក្រុម U23កម្ពុជា និងក្រុមឡាវ គឺមិនទទួលបានលទ្ធផលអ្វីនោះទេ បើទោះបីជាក្រុមទាំង២ ធ្វើការវាយសម្រុក គ្នាយ៉ាងក៏ដោយ ជាពិសេសគឺកីឡាករ ប្រាក់ មុន្នីឧត្តម របស់ក្រុមកម្ពុជា មានឱកាសស៊ុតបាល់បញ្ចូលទីចំនួន ២លើក តែមិនបានសម្រេច ។ ចំណែកកីឡាករក្រុមជម្រើសជាតិឡាវ បានត្រឹមតែ កាតក្រហម មួយប៉ុណ្ណោះ ពីលោកអាជ្ញាកណ្ដាល នៅនាទី៤៤ គឺកីឡាករ Vilayout ។

ចូលតង់ទី២ភ្លាម បើទោះបីជាក្រុមឡាវ បានបាត់កីឡាករម្នាក់នៅតង់ទី១ក៏ពិតមែន ប៉ុន្ដែក្រុមនេះ បានរកគ្រាប់នាំមុខមុនក្រុម U23កម្ពុជា ១គ្រាប់ដោយកីឡាករ Khonesavanh នៅនាទី៤៦ ។ ភ្លាមៗនោះ កីឡាករ កែវ សុខង៉ន ក៏បានរក គ្រាប់បាល់ឲ្យក្រុមកម្ពុជា តាមស្មើក្រុមឡាវ ១-១ វិញផងដែរ នៅនាទី៤៧ ។

យ៉ាងណា ក៏ដោយ ក៏កីឡាករឡាវ នៅតែមានឱកាសស៊ុតជាបន្ដបន្ទាប់ ជាពិសេស នៅនាទី៦០ កីឡាករ Phoutthasay បានជួយក្រុមឡាវ ឲ្យធ្វើការនាំមុខ ក្រុមកម្ពុជាសារជាថ្មី ក្នុងលទ្ធផលបណ្ដោះអាសន្ន ២-១ ។

ប៉ុន្ដែលទ្ធផលនេះត្រូវបានប្រែប្រួលនៅជាង ១០នាទីក្រោយ ដោយកីឡាករ ឈិន ឈឿន បានបណ្ដើរបាល់ស៊ុត យ៉ាងល្អនៅនាទី៧២ បន្ទាប់ពីកីឡាករ ចាន់ វឌ្ឍនាកា ដែលទើប ប្ដូរចូលបោះបាល់ឲ្យយ៉ាងស្អាតនោះ ។ លទ្ធផលនេះ ត្រូវបានបន្ដ រហូតដល់ទីបញ្ចប់ ក្រុម U23កម្ពុជា ស្មើក្រុមឡាវ ២-២តែម្ដង ។ ដូច្នេះក្រុមកម្ពុជា ត្រូវឡើង ទៅប្រកួតនៅវគ្គ ១/២ផ្ដាច់ព្រ័ត្របន្ដ ក្រោយពីប្រកួតជម្រុះ ២ប្រកួត ស្មើគ្នាទាំង ២ប្រកួតនោះ ។

ក្រុមជម្រើសជាតិឡាវ ត្រូវហាលអាវ បន្ទាប់ពី ប្រកួតជម្រុះ ២ប្រកួត ចាញ់១ និងស្មើ១ ។

ចំណែកក្រុម U23ថៃវិញ បានទទួលបាន ៦ពិន្ទុ ពេញនៅក្នុងពូលA ក្រោយពីក្រុមនេះ បានប្រកួតឈ្មោះក្រុមវៀតណាម ២-០ ។ លទ្ធផលនេះ ធ្វើឲ្យក្រុមថៃ ត្រូវឡើងទៅ ប្រកួតនៅវគ្គពាក់កណ្ដាលផ្ដាច់ព្រ័ត្របន្ដ ។ ចំណែកក្រុមវៀតណាម ត្រូវស្ពាយ បង្វិចត្រឡប់ ទៅផ្ទះវិញទាំងសោកស្ដាយ ។

សូមបញ្ជាក់ថា នៅថ្ងៃទី០៨ ខែវិច្ឆិកាខាងមុខនេះ ការប្រកួតវគ្គពាក់ កណ្ដាល ផ្ដាច់ព្រ័ត្រ នឹងត្រូវចាប់ផ្ដើមហើយ ដោយក្រុម U23កម្ពុជា ត្រូវជួបជាមួយនឹងក្រុម U23ថៃ ។ ចំណែកក្រុម U23ម៉ាឡេស៊ី ត្រូវជួបជាមួយនឹងក្រុម U23មីយ៉ាន់ម៉ា ។ ចាំមើលក្រុមណា នឹងមានសំណាងលើកពាន  BIDC-Cup លើកទី៣ ឆ្នាំ២០១៣នេះ ?