ទិដ្ឋភាពទូទៅ
នៃលំនៅឋានដែលត្រូវបានបំផ្លាញនៅតំបន់មាត់សមុទ្រលើកោះឡីតេ
កាលពីថ្ងៃទី១០ វិច្ឆិកានៅពេលព្យុះហៃយ៉ាន
វាយប្រហារទូទាំងប្រទេសហ្វីលីពីន។ AFP
ក្រុមសង្គ្រោះបានបង្ហាញថាត្រូវ សន្ធាប់ដោយកិច្ចប្រឹងប្រែងដើម្បីជួយអ្នកដែលផ្ទះសម្បែង និងជីវភាពពួកគេត្រូវបានបំផ្លាញដោយព្យុះទីហ្វុងហៃយ៉ានដែលមានរលក ដូចស៊ូណាមិ និងខ្យល់បក់ខ្លាំងវាយប្រហារទូទាំងផ្នែកមួយភាគធំនៃប្រជុំកោះ នេះកាលពីថ្ងៃសុក្រ។
យន្តហោះយោធាអាមេរិកកាលពីថ្ងៃចន្ទ បានចូលរួមជាមួយកិច្ចប្រឹងប្រែងដីវីវក់ដើម្បីជួយអ្នកនៅ រស់ដែលឃ្លាននៅហ្វីលីពីន ខណៈ កម្លាំងសន្តិសុខជួបបញ្ហាទប់ស្កាត់ការលួចប្លន់។
ទាហាន និងប៉ូលិសហ្វីលីពីនរាប់រយនាក់ បានបញ្ជូនទៅកាន់ក្រុងមួយដែលរងគ្រោះធ្ងន់ធ្ងរដោយព្យុះកំណាចនេះ ដើម្បីព្យាយាមទប់ស្កាត់ការលួចប្លន់ ដែលបានគំរាមកំហែងកិច្ចប្រឹងប្រែងសង្គ្រោះបន្ទាន់។
នៅវៀតណាម មនុស្សជាង៦០ម៉ឺននាក់ ត្រូវបានជម្លៀសចេញ ខណៈព្យុះហៃយ៉ានដែលចុះ ខ្សោយ និងដែលបានចាកចេញពីហ្វីលីពីន និងមកដល់សមុទ្រចិនខាងត្បូងពីថ្ងៃ សៅរ៍នោះបានបង្កការបាក់ដីនៅទីនោះ ពីព្រឹកព្រលឹមថ្ងៃចន្ទ។
រដ្ឋធានី ហាណូយ មានភ្លៀងធ្លាក់ ធ្ងន់ធ្ងរ ហើយផ្ទះសម្បែងនៅក្នុងបណ្តាខេត្តភាគខាងជើងខ្លះ ត្រូវបានខូចខាតពីខ្យល់បក់ខ្លាំង។
មន្ត្រីនៅក្នុងខេត្តក្វាងនិញ លោកង្វៀន កុងធួន បាននិយាយថា៖ «លំនៅឋានជាច្រើនរយខ្នងត្រូវព្យុះបោចដំបូលអស់។ ដើមឈើរាប់ពាន់ដើមក្នុងខេត្តនេះ ត្រូវរលើងទាំងឫស»។
លោកបាន បន្ថែមថា៖ «មនុស្សបីនាក់ ត្រូវបានរាយការណ៍ថា កំពុងបាត់ខ្លួន»។ គេហទំព័ររដ្ឋាភិបាលវៀតណាមបាននិយាយពីថ្ងៃអាទិត្យថា មនុស្ស៥នាក់បានស្លាប់ ខណៈកំពុងមានព្យុះនេះ។
នៅក្នុងព្រលានយន្តហោះនៅក្រុងតាក្លូបានដែលត្រូវបំផ្លាញរាបស្មើ នឹងដី ការតម្រង់ជួរដ៏វែងមានសណ្ឋានដូចសត្វពស់មួយបានបង្កើត ឡើង ខណៈអ្នកនៅរស់ដែលហត់នឿយ និងស្រេកឃ្លាន ដែលអ្នកខ្លះបានដើរដ៏លំបាកឆ្លងកាត់ភក់ និងគំនរបាក់បែកចម្ងាយជាច្រើនគីឡូម៉ែត្រនោះ បានស្វែងរកសម្ភារសំខាន់ជាមូលដ្ឋានដើម្បីរស់។
អ្នកស្រី Joan Lumbre Wilson បានប្រាប់ AFP ថា៖ «យើងចង់បានទឹក និងថ្នាំពេទ្យ ដើម្បីព្យាបាលរបួស។ ដូច្នេះបើសិនជាអ្នកអាចរៀបចំវាឲ្យបាន សូមអញ្ជើញផ្ដល់ឲ្យយើងមក កុំប្រាប់អ្នកណាម្នាក់ឲ្យមកទីនេះដែលនឹងគ្រាន់តែឃើញយើង រងគ្រោះអី ព្រោះយើងមិនចង់បានទង្វើដូច្នោះទេ» ដោយបន្ថែមថា ក្រុមអាជ្ញាធរកំពុងតស៊ូដោះស្រាយជាមួយមនុស្សដ៏ច្រើន ដែលស្វែងរកជំនួយ។
អ្នកស្រីបាននិយាយថា៖ «ពួកគេ កំពុងតែព្យាយាមដឹកជញ្ជូនយើងទៅឆ្ងាយ ត្រឡប់ទៅកន្លែងយើងវិញ ជាទីដែលវាឆ្ងាយពេក បន្ទាប់មកធ្វើដូច្នេះម្ដងទៀតនៅថ្ងៃស្អែកដើរមកដល់បរិវេណនោះ ហើយវាមិនយុត្តិធម៌ចំពោះយើងឡើយ»។
ក្រុមសាក្សីកាលពីថ្ងៃ អាទិត្យបាន រាយការណ៍ពីការឃើញការលួចអីវ៉ាន់ និងអំពើហិង្សានេះ ខណៈប្រធានាធិបតី បេនីកនូ អាគីណូ បានទទួលស្គាល់ថា វាជាកង្វល់ដ៏ធំមួយ។ អ្នកនាំពាក្យយោធាលោកវរសេនីយ៍ទោ រ៉ាម៉ុន ហ្សាហ្គាឡា បានប្រាប់ AFP កាលពីថ្ងៃចន្ទថា ទាហាន១០០នាក់ត្រូវបានបញ្ជូនទៅឲ្យជួយប៉ូលិសស្ដារឡើងវិញនូវ ផ្នែកច្បាប់ទម្លាប់នៅក្នុងទីក្រុងតាក្លូបាន។
ការគំរាមធ្វើឲ្យរំខានបន្ថែមទៀតដល់កិច្ចប្រឹងប្រែងសង្គ្រោះនេះ គឺវិសម្ពាធ ត្រូពិកដែលបានរំកិលមកក្បែរភាគខាងត្បូង និងភាគកណ្ដាល ហ្វីលីពីន។ ការព្យាករអាកាសធាតុ រដ្ឋាភិបាល និយាយថា វិសម្ពាធ នេះអាចនាំមកនូវទឹកជំនន់ថ្មីដល់តំបន់រងគ្រោះដោយព្យុះ។
ប្រព័ន្ធ ផ្សព្វផ្សាយរដ្ឋនៅចិនបានរាយការណ៍ថា មនុស្សយ៉ាងតិច៦នាក់ បានស្លាប់បន្ទាប់ពីព្យុះនេះ បានវាយប្រហារទូទាំងឆ្នេរសមុទ្រខាងត្បូងចិន និងបង្កការខូចខាតផ្ទះរាប់រយខ្នង។ កាសែត ក្នុងស្រុក មួយនិយាយថា អ្នកថ្មើរជើង៣នាក់ ត្រូវបានវាយប្រហារដោយ ជញ្ជាំងរលំ ឬផ្ទាំងផ្សាយពាណិជ្ជកម្មរលំក្នុងខេត្តហៃណាភាគខាងត្បូង។ យោងតាមទីភ្នាក់ងារ ស៊ីនហួឲ្យដឹងថា ម្នាក់បានលង់ទឹកស្លាប់ នៅក្នុងតំបន់Guangxi Zhuang។ អ្នកដើរទូកពីរនាក់ ត្រូវគេប្រទះឃើញស្លាប់ បន្ទាប់ពី នាវាដឹកទំនិញរបស់ពួកគេ ត្រូវព្យុះ បោកបក់ទៅឆ្ងាយ៕ PN
No comments:
Post a Comment