យន្តហោះក្រុមហ៊ុនអាកាសចរណ៍កម្ពុជាអង្គរអ៊ែរនៅ
ព្រលានយន្តហោះអន្តរជាតិសៀមរាប
ក្នុងពិធីបើកជើងហោះហើរទៅចិនកាលពីម្សិលមិញ។ កល្យាណ
សៀមរាបៈ ក្រុមហ៊ុនអាកាសចរណ៍កម្ពុជាអង្គរអ៊ែរ (CAA) បានសម្ពោធជើងហោះហើរត្រង់ទៀងទាត់របស់ខ្លួនពី សៀមរាប ឆ្ពោះទៅទីក្រុង Guangzhou ប្រទេស ចិន។
ពិធីនេះត្រូវបានធ្វើឡើងកាលពីថ្ងៃម្សិលមិញនៅព្រលានយន្តហោះអន្តរជាតិខេត្ត សៀមរាប។
មន្ដ្រីក្រុមហ៊ុនបាននិយាយថា CAA គ្រោងនឹងដំណើរការជើងហោះហើរត្រង់ ទៀងទាត់ពីខេត្ត សៀមរាប ឆ្ពោះទៅទីក្រុង ស៊ាងហៃ នៅខែ វិច្ឆិកា ឆ្នាំនេះ។
លោក លឹម កៅ អនុប្រធានក្រុមហ៊ុនអាកាសចរណ៍កម្ពុជា អង្គរអ៊ែរ បាននិយាយថា ប្រតិបត្តិការជើងហោះហើរលក្ខណៈទៀងទាត់គឺប្រើយន្តហោះប្រភេទ Airbus 321 ដែលអាចផ្ទុកអ្នកដំណើរប្រហែល ១៧៦ នាក់។
លោកបានបន្ថែមថា ភ្ញៀវទេសចរចិនចំនួន ១៥៨ ៩០០ នាក់បានមកទស្សនាប្រាសាទ អង្គរវត្ត នៅខេត្ត សៀមរាប នៅក្នុងរយៈពេល ៧ខែ ដំបូងដោយកើនឡើង ៦៩ ភាគរយធៀបនឹងរយៈពេលដូចគ្នាកាលពីឆ្នាំមុន។
យោងតាមតួលេខប្រទេសចិនជាប្រភពឈានមុខគេទីពីរនៃភ្ញៀវទេសចរ បរទេសមកទស្សនា អង្គរវត្តកន្លែងមក។ ដូច្នេះក្រុមហ៊ុនអាកាសចរណ៍ CAA សម្រេចចិត្តពង្រីកជើងហោះហើរត្រង់របស់ខ្លួនឆ្ពោះទៅទីក្រុង Guangzhou។ លោកបន្តថា៖ «យើងអាចមើលឃើញពីការកើនឡើងជាប្រចាំនៃភ្ញៀវទេសចរចិនមកទស្សនា ខេត្ត សៀមរាប ក្នុងពេលថ្មីៗនេះ»។
លោកបានបន្ថែមថា នៅឆ្នាំនេះប្រទេសចិនក្លាយជាប្រទេសមានសេដ្ឋកិច្ចឈានមុខគេទី ពីររបស់ពិភពលោក ហើយភ្ញៀវទេសចរចំនួន ២៦៧ ៥០៦ បានមកទស្សនាប្រទេសកម្ពុជានៅក្នុងរយៈពេល ៧ខែ នេះ។
លោកបាននិយាយថា៖ «ជារៀងរាល់ឆ្នាំប្រជាជនចិនចំនួន ៨៦ លាននាក់បានធ្វើដំណើរជុំវិញពិភពលោក ហើយនៅក្នុងចំណោមនោះប្រជាជនចិន ១០ លាននាក់ធ្វើដំណើរឆ្ពោះមក អាស៊ី ដូច្នេះនេះជាឱកាសល្អសម្រាប់កម្ពុជាព្រមទាំងខេត្ត សៀមរាប ក្នុងការស្វាគមន៍ទេសចរអន្តរជាតិ»។
លោក តឹក រ៉េតសំរេច រដ្ឋលេខាធិការទីស្តីការគណៈរដ្ឋមន្ត្រី និងជាប្រធានក្រុមប្រឹក្សា CAA និយាយថា ការចាប់ផ្តើមការហោះហើរពីខេត្ត សៀមរាប ទៅ Guangzhou ជាការឆ្លើយតបនឹងកំណើនទេសចរចិននៅពេលថ្មីៗនេះ។ លោកបន្ថែមថា នេះវាបានឆ្លុះបញ្ចាំងពីកំណើនទេសចរចិនមកអង្គរវត្ត ហើយនិន្នាការនេះនឹងនៅតែបន្ត។
បច្ចុប្បន្ននេះ ក្រុមហ៊ុនអាកាសចរណ៍ CAA មានយន្តហោះប្រភេទ Airbus 321 ចំនួន ៣ គ្រឿង ហើយប្រភេទយន្តហោះ ATR 72 ចំនួន ៣ គ្រឿងប៉ុន្តែពួកគេបានគ្រោងនឹងបង្កើនយន្តហោះប្រភេទ Airbus 321 ចំនួន ៥ គ្រឿងហើយយន្តហោះប្រភេទ ATR 72 ពីរគ្រឿងបន្ថែមទៀតនៅក្នុងឆ្នាំ ២០១៥។ ក្រុមហ៊ុនអាកាសចរណ៍ CAA មានបំណងពង្រីកជើងហោះហើរត្រង់ឆ្ពោះទៅប្រទេសសំខាន់ៗដូចជា ឥណ្ឌា និង ជប៉ុន៕
No comments:
Post a Comment