ផែនទីក្រុងសៀមរាប ដែលត្រូវបានបែងចែកចេញជា៩តំបន់ ។ រូបថត សហការី
លោក សន សៀប ប្រធានគ្រប់គ្រងទូទៅក្រុមហ៊ុន ឃី រៀលអេស្ទេត ដែលបានធ្វើការសិក្សាពីតម្លៃដីធ្លីក្នុងក្រុង សៀមរាប បាននិយាយថា តម្លៃដីក្នុងក្រុង សៀមរាប មានកំណើនប្រមាណ ១៥ ភាគរយនៅក្នុងឆមាសទី១ឆ្នាំ ២០១៣ នេះបើប្រៀបធៀបទៅនឹងរយៈពេលដូចគ្នាកាលពីឆ្នាំមុន ដោយកាលពីឆមាសទី១ ឆ្នាំ ២០១២ កន្លងមក តម្លៃដីធ្លីនៅក្នុងក្រុង សៀមរាបមានជាមធ្យម ៨២៥ ដុល្លារក្នុង ១ ម៉ែត្រការ៉េ ខណៈឆ្នាំនេះបានកើនឡើងដល់ ៩៥០ ដុល្លារអាមេរិក។
លោកមានប្រសាសន៍ថា៖ «ការដែលតម្លៃដីធ្លីកើនឡើង គឺដោយសារតែទីក្រុងនេះមានទំហំតូច និងទីផ្សារដីធ្លីនៅតែមានតម្រូវការខ្ពស់ ស្របនឹងការកើនឡើងនៃចំនួនភ្ញៀវទេសចរពីមួយឆ្នាំទៅមួយឆ្នាំ»។
លោកបានបន្តថា៖ «ទោះបីជាទីផ្សារដីធ្លីខេត្ត សៀមរាប ជាទីផ្សារតូចក៏ដោយ ក៏ខ្ញុំគិតថា វាជាទីផ្សារធំទី២បន្ទាប់ពីរាជធានីភ្នំពេញដែរ ពីព្រោះនៅខេត្ត សៀមរាបមានគម្រោងវិនិយោគជាច្រើនដូចជា គម្រោងសាងសង់សណ្ឋាគារថ្មី ព្រលានយន្តហោះ ទីលានកីឡាវាយកូនគោលជាពិសេសការហូរចូលភ្ញៀវទេសចរមកកាន់តែច្រើន នៅក្នុងខេត្តដែលមាន ប្រាសាទបុរាណដ៏ល្អមួយនេះ»។
ការសិក្សាអំពីតម្លៃអចលនទ្រព្យ នៅក្នុងក្រុង សៀមរាប នៅពេលនេះគេបានបែងចែកជា ៩ តំបន់ (Zone) ខុសៗគ្នា ដូចជា តំបន់ A ស្ថិតក្នុងតំបន់ Pub street ដីមានតម្លៃចន្លោះ ២៣០០-៣០០០ ដុល្លារ តំបន់ B គិតចាប់ពីផ្សារកណ្តាល ទៅផ្លូវជាតិលេខ ៦ តាមផ្លូវធំ ដីមានតម្លៃចន្លោះពី ១៣០០-២០០០ ដុល្លារ និងផ្លូវតូចមានតម្លៃចាប់ពី ៥០០-១០០០ ដុល្លារ។
តំបន់ C នៅតំបន់ផ្សាររាត្រីអង្គរតាមផ្លូវធំដីមានតម្លៃចាប់ពី ៩០០-២០០០ ដុល្លារ និងតាមផ្លូវតូចមានតម្លៃចន្លោះពី ៣០០-៦០០ ដុល្លារ តំបន់ D គិតពីម្តុំវត្តដំណាក់ទៅវត្ត រាជបូព៌ ឆ្ពោះទៅផ្លូវជាតិលេខ ៦ តាមផ្លូវធំដីមានតម្លៃចន្លោះពី ៥០០-២០០០ ដុល្លារ និងផ្លូវតូចមានតម្លៃចាប់ពី៣០០ ទៅ ៨០០ ដុល្លារក្នុងមួយម៉ែត្រការ៉េ។
ចំណែកតំបន់ E គិតចាប់ពីវត្ត រាជបូព៌ឆ្ពោះទៅផ្សារលើតាមបណ្តោយផ្លូវធំមានតម្លៃចន្លោះពី ៨០០-៣០០០ ដុល្លារ និងតាមផ្លូវតូចមានតម្លៃចាប់ពី ១០០-៣០០ ដុល្លាររីឯតំបន់ F គិតពីផ្លូវជាតិលេខ ៦ ផ្សារសាមគ្គីទៅតំបន់អង្គរ ឃ្យុងយូ ផ្លូវធំដីមានតម្លៃចន្លោះពី ៨០០-៣០០០ ដុល្លារ និងផ្លូវតូចមានតម្លៃចន្លោះពី ១០០-២៥០ ដុល្លារ ហ្សូន G គិតពីតំបន់សណ្ឋាគារ សុខា អង្គរ (ផ្លូវជាតិលេខ ៦) ទៅផ្សារដើមក្រឡាញ់ផ្លូវធំដីមានតម្លៃចាប់ពី ៨០០ទៅ ១៥០០ និងតាមផ្លូវតូចមានតម្លៃចាប់ពី ១០០-៣០០ ដុល្លារ។ តំបន់ H គិតពីតំបន់ផ្សារក្រោមឆ្ពោះទៅជាយក្រុងភាគខាងលិចផ្លូវធំ ដីមានតម្លៃចន្លោះពី ៤០០ ទៅ ៨០០ ដុល្លារ និងផ្លូវតូចដីមានតម្លៃចន្លោះពី ៧០-២០០ ដុល្លារ និងតំបន់ I នៅជួរខាងត្បូងវិទ្យាល័យ អង្គរ ផ្លូវធំដីមានតម្លៃចន្លោះពី ៤០០-៥០០ ដុល្លារ និងតាមផ្លូវតូចមានតម្លៃចន្លោះពី ៥០ ទៅ ៣០០ ដុល្លារក្នុងមួយម៉ែត្រការ៉េ។
ប្រធានគ្រប់គ្រងទូទៅនៃក្រុមហ៊ុន ឃី រៀលអេស្ទេត បានបន្តដោយសម្តែងនូវសុទិដ្ឋិនិយមថា នៅឆ្នាំ ២០១៤ ខាងមុខនៅខេត្ត សៀមរាបតម្លៃដីធ្លីនឹងបន្តកើនឡើងថែមទៀតតែឡើង ក្នុងកម្រិតសន្សឹមៗប្រកបដោយស្ថិរភាព ព្រោះប្រជាពលរដ្ឋទាំងអស់សុទ្ធតែមានបទពិសោធក្រោយពេលធ្លាក់ចុះ វិបត្តិសេដ្ឋកិច្ច និងហិរញ្ញវត្ថុសកលឆ្នាំ ២០០៨ ធ្វើឲ្យពួកគាត់យល់ពីទីផ្សារជាក់ស្តែង៕By Phnom Penh Post
No comments:
Post a Comment