ផ្សារទំនើបបានក្លាយជាកន្លែងពេញនិយមសម្រាប់យុវវ័យ និងអ្នកដែលមានប្រាក់ចំណូលខ្ពស់ ។ រូបថត ហេង ជីវ័ន
ភ្នំពេញៈ មុខមាត់រាជធានីភ្នំពេញបានផ្លាស់ប្តូរយ៉ាងឆាប់រហ័សដែលធ្វើឲ្យភ្នំពេញនាពេលបច្ចុប្បន្ននេះក្លាយជាមជ្ឈមណ្ឌលលក់ទំនិញលំដាប់ខ្ពស់មួយនៅក្នុងតំបន់ស្របពេលការផ្គត់ផ្គង់និងទំហំនៃតម្រូវការផ្សារទំនើបកំពុងកើនឡើងជាលំដាប់។
លោក ប៉ូ អ៊ាវគង់ ប្រធានគ្រប់គ្រងទូទៅក្រុមហ៊ុន អេស៊ា រៀលអេស្ទេត ដែលទើបបានបញ្ចប់ការស្រាវជ្រាវអំពីស្ថានភាពផ្សារទំនើបនៅក្នុងរាជធានីភ្នំពេញកាលពីខែមេសា កន្លងមក បានប្រាប់ថា ការផ្គត់ផ្គង់ផ្សារទំនើបនៅរាជធានីភ្នំពេញមានការកើនឡើងយ៉ាងឆាប់រហ័សក្នុងរយៈពេលប៉ុន្មានឆ្នាំចុងក្រោយនេះចំណែកតម្លៃក៏បានប្រែប្រួលដែរ។ បច្ចុប្បន្នផ្សារទំនើបដែលកំពុងដំណើរការមានក្រឡាផ្ទៃសរុបចំនួន ១៩៥ ៨០៦ម៉ែត្រការ៉េ។
លោក អ៊ាវគង់ បានថ្លែងថា៖«ថ្មីៗនេះតម្រូវការជួលផ្សារទំនើបកំពុងកើនឡើង ដោយអ្នកជួលភាគច្រើនបានជ្រើសរើសទីតាំងសម្រាប់ការលក់រាយ»។ លោកបានបន្តទៀតថា៖«ឧស្សាហកម្មផ្សារទំនើបនៅរាជធានីភ្នំពេញកំពុងឈានទៅកាន់តែកៀកនឹងស្តង់ដារក្នុងតំបន់ដូចជា ទីក្រុងបាងកក និងគូឡាឡាំពួ ហើយ ប៉ុន្តែទំហំអគារនៅកម្ពុជាមិនធំដូចនៅតាមបណ្តាប្រទេសទាំងនោះទេ ពីព្រោះអ្នកវិនិយោគធ្វើឡើងឲ្យសមស្របនឹងបរិបទសេដ្ឋកិច្ច និងចំនួនប្រជាជននៅកម្ពុជា»។
បច្ចុប្បន្នការជួលផ្សារទំនើបនៅ រាជធានីភ្នំពេញមានតម្លៃចន្លោះពី២០-៥០ដុល្លារក្នុងមួយម៉ែត្រការ៉េ តែបើគិតជាមធ្យមភាគមានតម្លៃប្រមាណ៣៥ដុល្លារអាមេរិកក្នុងមួយម៉ែត្រការ៉េ។ លោកបានប្រាប់ទៀតថា ទីផ្សារលក់រាយពិតជាមានសក្តានុពលហើយការផ្គង់ផ្គង់នឹងកើនឡើងដល់ទំហំ១៦៥ ៨៧៣ម៉ែត្រការ៉េបន្ថែមទៀតនៅ៥ឆ្នាំខាងមុខនេះដែលធ្វើឲ្យទីផ្សារលក់រាយនៅរាជធានីភ្នំពេញមានការផ្លាស់ប្តូរមុខមាត់ នេះបើតាមការប្រាប់ឲ្យដឹងរបស់លោក ប៉ូ អ៊ាវគង់។
ការសិក្សានេះក៏បានរកឃើញផងដែរថា ចាប់តាំងពីឆ្នាំ២០០៥មក ចំនួនស្តង់ក្នុងផ្សារទំនើបៗទាំងនោះមិនបានប្រើប្រាស់អស់នោះទេគឺនៅសល់កន្លែងទំនេរប្រមាណ២៧ភាគរយ។ ការផ្គង់ផ្គង់ផ្សារទំនើបភាគច្រើនមាននៅក្នុងខណ្ឌចំការមន ខណ្ឌដូនពេញ និងខណ្ឌ៧មករា។
កញ្ញា ហាំង សុពិសី អ្នកគ្រប់គ្រងទូទៅនៃផ្សារទំនើបរតនាផ្លាហ្សា បាននិយាយថា ចំនួនអតិថិជនមកជួលតូបក្នុងផ្សាររតនាផ្លាហ្សា បានកើនឡើងជាបន្តបន្ទាប់ដោយរហូតមកដល់ពេលនេះទំហំផ្សារជាង៨០ភាគរយត្រូវបានប្រើប្រាស់ដោយអាជីវករនានា។
កញ្ញាបានអះអាងថា៖«យើងបាននិងកំពុងព្យាយាមរក្សាអតិថិជនចាស់និងទាក់ទាញអតិថិជនថ្មីៗ ខណៈពេលនេះចំនួនប្រជាពលរដ្ឋមកផ្សារទំនើបកំពុងមានការកើនឡើង។ ឥរិយាបថរបស់ពួកគាត់នៅពេលនេះមានការផ្លាស់ប្តូរខុសពីមុនទាក់ទងនឹងការប្រើប្រាស់ និងការទិញទំនិញនៅផ្សារទំនើប»។ កញ្ញាបានបន្តថា៖«ផ្សារទំនើបជាកន្លែងមានផាសុកភាព ហេតុនេះបើយើងផ្តល់សេវាកម្ម និងតម្លៃសមរម្យជូនដល់អតិថិជនគាត់នឹងគាំទ្រចំពោះការមកទិញទំនិញនៅផ្សារទំនើបកាន់តែច្រើន»។
នៅកម្ពុជាមានបើកផ្សារទំនើប និងផ្សារធម្មតាជាច្រើន ដែលការអភិវឌ្ឍបែបនេះមានទាំងចំណុចវិជ្ជមាន និងអវិជ្ជមាន។ ចំណុចវិជ្ជមានត្រង់ថា ផ្តល់ឲ្យអតិថិជននូវជម្រើសច្រើន ហើយពួកគាត់អាចជ្រើសរើសមុខទំនិញដែលគាត់ចង់បាន។ រីឯចំណុចអវិជ្ជមាននៅត្រង់ ការបង្កើតទីផ្សារច្រើនវាធ្វើឲ្យទីផ្សារនេះមានភាពចង្អៀត ព្រោះប្រាក់ចំណូលរបស់ប្រជាជននៅមានកម្រិត។
លោក ប៊ុត ទីណែត ប្រធានផ្នែកអភិវឌ្ឍន៍អាជីវកម្មនៃផ្សារបឹងត្របែកផ្លាហ្សា បានប្រាប់ថា បើទោះបីជាផ្សារទំនើបកើតមានច្រើនតែលោកសង្កេតឃើញថា ប្រជាជនខ្មែរភាគច្រើននៅតែចូលចិត្តជ្រើសរើសផ្សារសេដ្ឋកិច្ច (ផ្សារធម្មតា)ដដែលដោយសារការជួលតូបនៅផ្សារទំនើបមានតម្លៃថ្លៃជាងផ្សារធម្មតា ដែលជាហេតុធ្វើឲ្យតម្លៃទំនិញលក់ក្នុងផ្សារទំនើបថ្លៃជាងផ្សារសេដ្ឋកិច្ច ខណៈគុណភាពទំនិញមានភាពប្រហាក់ប្រហែលគ្នា។
លោកបានថ្លែងថា៖«បើយើងមើលមួយភ្លែតទីផ្សារទំនើបនៅកម្ពុជាមានភាពតូចចង្អៀត ពីព្រោះប្រជាជនដែលនិយមចូលចិត្តទៅផ្សារទំនើបទិញទំនិញនៅរាជធានី ភ្នំពេញមានកម្រិតនៅឡើយបើទោះបីជាយើងសង្កេតឃើញថា និន្នាការទិញទំនិញនៅផ្សារទំនើបនៅកម្ពុជានៅពេលនេះកើនឡើងក៏ដោយ »។ លោកបានបន្តថា៖«នៅពេលអនាគត ទីផ្សារទំនើបនឹងមានភាពល្អប្រសើរ ពីព្រោះការរីកចម្រើនផ្នែកសេដ្ឋកិច្ចនិងលំហូរទុនវិនិយោគ»។
អតិថិជនម្នាក់ដែលកំពុងទិញទំនិញនៅផ្សារទំនើបស៊ីធីម៉ល បាននិយាយសុំមិនបញ្ចេញឈ្មោះថា កញ្ញាចូលចិត្តមកទិញទំនិញនៅផ្សារទំនើបជាជាងផ្សារលក់ដូរទូទៅ ពីព្រោះមិនពិបាកដើរប្រជ្រៀតគ្នាដែលអាចត្រូវចោរលួចយកវត្តុមានតម្លៃម៉្យាងទៀតកញ្ញាក៏មិនចូលចិត្តការតថ្លៃផងដែរ។ អតិថិជនផ្សារទំនើបខាងលើបានថ្លែងថា៖«ខ្ញុំមិនចូលចិត្តទិញទំនិញនៅផ្សារទូទៅទេ ពីព្រោះអ្នកលក់តែងកាត់ថ្លៃខ្ពស់ពេក ម៉្យាងទៀតពេលខ្លះនៅពេលតថ្លៃពេកធ្វើឲ្យអ្នកលក់ខឹងខ្ញុំទៀតផង »។ កញ្ញាបានបន្តថា៖«ខ្ញុំក៏ចូលចិត្តមកលេងកម្សាន្តនៅទីនេះដែរ ព្រោះមានអាកាសធាតុត្រជាក់ និងទូលាយ»៕
No comments:
Post a Comment