យល់យ៉ាង​ណាចំពោះជម្រើសទាំង ២៣ នាក់​របស់​លោក Roy Hodgson?

ក្រុម​ជម្រើស​ជាតិ​អង់​គ្លេស​ទើប​នឹង​បាន​បង្ហាញ​ឈ្មោះ​កីឡាករ​ ទាំង ២៣ នាក់​ដែល​ត្រូវ​ធ្វើ​ដំណើរ​ទៅ​ប្រទេស​​ប្រេ​ស៊ីល​នៅ​ខែ​មិថុ​នា​ខាង​មុន​នេះ ក្នុង​នោះ​មាន​កីឡាករ​មក​ពី​ ក្លឹប Liverpool ចំ​នួន ៥ នាក់ ក្លឹប Manchester United ចំ​នួន ៤ នាក់ ក្លឹប Everton, និង Southampto ចំ​នួន ៣ នាក់ដូច​គ្នា ក្លឹប Chelsea, Arsenal និង Manchester City ចំ​នួន ២ ដូច​ៗគ្នា ចំណែក​ឯ​អ្នក​ចាំ​ទី ២ នាក់​ទៀត​មក​ពី​ក្លឹប West Bromwich និង Celtic។

ក្លឹបធំៗ​នៅ​អង់​គ្លេស​ដូច​ជា Chelsea, Arsenal និង Manchester City ធ្លាប់​តែមាន​កីឡាករ​អង់​គ្លេស​ ជាប់​ឈ្មោះ​ក្នុង​ក្រុម​ជម្រើស​ជាតិ​​​ច្រើន​ ប៉ុន្ដែ​សម្រាប់​ឆ្នាំ​នេះ​នៅ​សល់តែ ១ ក្រុម ២ នាក់ ​ប៉ុណ្ណោះ ប៉ុន្ដែ​ក្លឹប​មួយ​ចំ​នួន​ដូច​ជា Everton និង Southampton បែរ​ជា​មាន​កីឡាករ​មួយ​ក្រុម​រហូត​ដល់​ទៅ ៣ រូប​ត្រូវ​បាន​កោះ​ហៅ​ឲ្យ​ចូល​រួម​ក្នុង​ក្រុម​ជម្រើស​ជាតិ​ទៅ​វិញ។

កីឡាករ​ខ្សែ​ការ​ពារ​ឆ្នើម Jonh Terry និង Ashley Cole របស់ Chelsea មិន​ត្រូវ​បាន​កោះ​ហៅ​​ឡើយ​សម្រាប់​លើក​នេះ ខណៈ​ដែល Joleon Lescott និង Micah Richards របស់ Manchester City ក៏​មិន​ត្រូវ​បាន​កោះ​ហៅ​ដូច​គ្នា។ កីឡាករ​ខ្សែ​ប្រ​យុទ្ធ​ល្បឿន​លឿន Theo Walcott របស់ Arsenal និង Jermain Defoe របស់ Tottenham Hotspur ដែល​រំ​ពឹង​ថា​ត្រូវ​បាន​កោះ​ហៅ​ដោយ​លោក Roy Hodgson ក៏​ត្រូវ​ខក​ចិត្ត​ដូច​គ្នា ខណៈ​ដែល​កីឡា​ករ​ខ្សែ​​បម្រើ​​ល្អៗ​មួយ​ចំ​នួន​ទៀត​របស់ Spurs ដូច​ជា Aaron Lennon និង Andros Townsend ក៏​មិន​ត្រូវ​បាន​កោះ​ហៅ​ដូច​ដូច​គ្នា។

កីឡាករ Michael Carrick ​ខ្សែ​បម្រើ​ល្អបំ​ផុត​ប្រ​ចាំ​រដូវ​កាល ២០១២/១៣ របស់​ក្លឹប Manchester United និង​មិត្ត​រួម​ក្រុម Tom Cleverley ជាប់​ឈ្មោះ​ជា​កីឡាករ​បម្រុង ជា​មួយ​នឹង Andy Carroll, Jermain Defoe និង​អ្នក​ចាំ​ទី Jonh Ruddy របស់ Norwich City រួម​ទាំង​កីឡាករ​វ័យ​ក្មេង​២ រូប​ទៀត​មក​ពី​ Liverpool និង Everton។
ក្នុង​ចំ​ណោម​កីឡាករជម្រើស​ដំ​បូង​ទាំង ២៣ នាក់​របស់​លោក Roy Hodgson គេ​សង្កេត​ឃើញ​មាន​កីឡាករ​វ័យ​ក្មេងអា​យុ​ក្រោម ២៤ ឆ្នាំ​រហូត​ដល់ ៨ នាក់ ដែល​បាន​ធ្វើ​ឲ្យ​មាន​មតិ​រិះ​គន់​មួយ​ចំ​នួន​លើក​ឡើង​ថា ការ​ប្រ​កួត​លំ​ដាប់​ថ្នាក់​អន្តរ​ជាតិ​អា​យុ និង​បទ​ពិ​សោធន៍​​របស់​កីឡាករ​និ​មួយ​ៗ​ក្នុង​ក្រុម​ជម្រើស​ជាតិ​ ជា​កត្តា​សំខាន់​ ដែលគ្រូ​បង្វឹក​គ្រប់​រូប​ចាំ​បាច់​ត្រូវ​ពិ​ចារណា​ដោយ​ប្រុង​ប្រ​យ័ត្ន ហើយ​មិន​គួរ​កោះ​ហៅ​កី​ឡាករ​វ័យ​ក្មេង​ច្រើន​រូប​ពេក​នោះ​ទេ។

ជម្រើស​ទាំង ២៣ រូប​របស់​លោក Roy Hodgson  ​មាន​ដូចជា៖

• អ្នក​ចាំ​ទី៖ Joe Hart (Manchester City), Fraser Forster (Celtic) និង Ben Foster (West Bromwich Albion)

• ខ្សែ​ការ​ពារ៖  Gary Cahill (Chelsea), Phil Jagielka (Everton), Chris Smalling (Manchester United), Phil Jones (Manchester United), Glen Johnson (Liverpool),  Leighton Baines (Everton), និង Luke Shaw (Southampton),

• ខ្សែ​បម្រើ៖ Steven Gerrard (Liverpool), James Milner (Manchester City), Jack Wilshere (Arsenal), Ross Barkley (Everton), Alex Oxlade-Chamberlain (Arsenal),  Jordan Henderson (Liverpool), Raheem Sterling (Liverpool), Adam Lallana (Southampton), និង Frank Lampard (Chelsea)

• ខ្សែ​ប្រ​យុទ្ធ៖ Daniel Sturridge (Liverpool), Wayne Rooney (Manchester United), Danny Welbeck (Manchester United), និង Rickie Lambert (Southampton)

• កីឡាករ​បម្រុង៖ Michael Carrick (Manchester United) , Tom Cleverley (Manchester United), Jon Flanagan (Liverpool), Jermain Defoe (Tottenham Hotspur), John Stones (Everton), Andy Carroll (West Ham United) និង John Ruddy (Norwich City)៕ DC