ក្រុមហ៊ុន​តំណាង​ចែកចាយ​ម៉ូតូ​ Susuki ប្រចាំ​ឥណ្ឌូណេស៊ី PT.Suzuki Indomobil Sales បាន​បង្ហាញ​ម៉ូតូ​លេខ​អូតូ Suzuki Let’s សេរី ២០១៤ ​ក្នុង​ពិព័រណ៍​រថយន្ត Jakarta Motorcycle Show កាល​ពី​ពេលថ្មីៗ​កន្លង​ទៅ​នេះ។
គេហទំព័រ ​ឥណ្ឌូណេស៊ី Onedhika បាន​ឱ្យ​ដឹង​ថា Lets ត្រូវ Suzuki ផលិត​ឡើង​ប្រកប​ដោយ​មាត្រដ្ឋាន​ស្តង់ដារ មិន​សូវ​ប៉ះពាល់​បរិស្ថាន​ មាន​ទម្ងន់​ស្រាល (ប្រហែល ៩០គីឡូក្រាម)​ ទទួល​បាន​អារម្មណ៍​ប្លែក និង​ងាយ​ស្រួល​បើកបរ។ អ្វី​កាន់​តែ​ពិសេស​នោះ Let’s ត្រូវ​គេ​អះអាង​ថា ជា​គូប្រជែង​របស់ Honda Scoopy និង Yamaha Fino។
លោក Yohan Yahya នាយក​គ្រប់គ្រង​ទូទៅ​ទីផ្សារ និង​ផ្នែក​អភិវឌ្ឍន៍​ជំនួញ​បាន​​ថ្លែង​ថា​ ៖ ” Let’s ជា​ម៉ូតូ​​អូតូដែល​ប្រើ​ប្រព័ន្ធ​ប៊ិច​បច្ចេកវិទ្យា​ទំនើប​ស៊ីប្រេង​តិច​ របស់ Suzuki”។
​ម៉ូតូ​នេះ​ស័ក្ដិសម​បំផុត​សម្រាប់​បុរស​ស្ត្រី​អាយុ​ ចាប់​ពី ២០ដល់ ២៥ឆ្នាំ។ ដោយ​មាន​​ការ​រចនា​ស្តាយ​​ស្រស់​ស្អាត​ ក្រុមហ៊ុន​ថា​នឹង​លក់​ឱ្យ​បាន ២០០០គ្រឿង​ ក្នុង​មួយ​ខែ។​
Suzuki Lets មាន​ម៉ាស៊ីន​ប្រភេទ​ 4 Stroke  ១ស៊ីឡាំង​ air-cooled, SOHC, ២ស៊ូប៉ាប់​ ទំហំ ១១៣ សេសេ ផ្ដល់​កម្លាំង​ថាមពល ៩,៤សេះ។ Let’s មាន​ពីរ​ម៉ូដែល​​ពោល​គឺ Sporty និង Premium។ Let’s Sporty មាន​បី​ពណ៌​ គឺ​ ខៀវ​ បៃតង​ និង ក្រហម ខណៈ Premium មាន​ពណ៌ ស​ ផ្កាឈូក និង​ខ្មៅ។​​
ដោយឡែក Let’s Sporty ស៊េរី​ថ្មី​នេះ ក៏​ទើប​តែ​មក​ដល់​ទីផ្សារ​កម្ពុជា កាល​ពី​ពេល​​ថ្មីៗ​នេះ​ដែរ ជាមួយ​​តម្លៃ​លក់​ប្រហែល ១៦៨០ ដុល្លារ​អាមេរិក។
ជាមួយ​​រូបរាងប៉ុណ្ណឹង  តើអ្នក​គិត​ថា​វា​អាច​ប្រកួត​ប្រជែង​ជាមួយ Honda Scoopy និង Yamaha Fino បាន​ដែរ​ឬទេ?
សូម​រង់ចាំ​តាមដាន​​តម្លៃ​ម៉ូតូ​ ជាពិសេស​ម៉ូតូ​ស៊េរី​ថ្មីៗ​​​នៅ​ក្នុង​តារាង​តម្លៃ​ម៉ូតូ​ប្រចាំ​សប្តាហ៍​នៅ​ពេល​បន្តិច​ទៀត​នេះ។

ចុច​ត្រង់​នេះ​ដើម្បី​តាមដាន​ព័ត៌មាន​បច្ចេកវិទ្យា​ថ្មីៗ

ប្រែ​សម្រួល៖ ឌូគូ
ប្រភព៖ amoztsa, onedhika.blogspot