អ៊ីស្ដង់ប៊ូល៖ រយៈពេល ៦ ថ្ងៃហើយដែលបាតុករបានធ្វើបាតុកម្មទម្លាក់នាយករដ្ឋមន្ត្រីតួគី ក្នុងនោះព្រឹកមិញនេះទូរទស្សន៍តួគី បានចេញផ្សាយថាក្រុមប៉ូលីស បានរកមុខឃើញ និងចាប់ឃុំខ្លួនមនុស្សចំនួន ២៥ នាក់ដែលបានបង្ហោះផ្សាយព័ត៌មានតាមរយៈទំព័រ Twitter របស់ពួកគេដោយចោទប្រកាន់ថាបង្ហាញព័ត៌មានមិនពិត។
ក្នុងនោះអ្នកនាំពាក្យប៉ូលីសទីក្រុងអ៊ីស្តង់ប៊ូល បានប្រាប់ថាគេកំពុងតែតាមរកមុខសញ្ញាប្រមាណជាង ១០ នាក់ទៀតដែលបានបង្ហោះព័ត៌មានមិនពិត បណ្ដាលឱ្យមហាជនយល់ច្រលំ។
ជាមួយគ្នានេះផងដែរក្រោយពេលដែលមានព័ត៌មានលិចឮថាក្រុមប៉ូលី សបានចាប់ឃុំឃាំងមនុស្សដោយសារតែបង្ហោះព័ត៌មានតាម Twitter នោះបានបណ្ដាលឱ្យមនុស្សជាច្រើននៅលើបណ្ដាញ Internet មានភាពខឹងសម្បារដោយបានចាត់ទុកអំពើនេះជាអំពើអមនុស្សធម៌។ គួរបញ្ជាក់ផងដែរថាបាតុកម្មរំលំរដ្ឋាភិបាលនៅតួគី បានកើតមក ៦ ថ្ងៃជាប់ៗគ្នាមកហើយក្នុងនោះតាមរបាយការណ៍មានមនុស្សចំនួន ២ នាក់បានបាត់បង់ជីវិត និងជាង ២០០ នាក់រងបួសក៏ដូចជាជាង ២០០០ នាក់ផ្សេងទៀតត្រូវបានគេចាប់ខ្លួនផងដែរ៕ ប្រែសម្រួលដោយ៖ វង្ស វឌ្ឍនា
No comments:
Post a Comment