ការសិក្សាថ្មីរកឃើញថា ទឹកខ្មេះអាចយកមកធ្វើតេស្តជំងឺមហារីកមាត់ស្បូន។
ក្រុមវេជ្ជបណ្ឌិតជំនាញដែលធ្វើការពិសោធវិធីសាស្ត្រដ៏សាមញ្ញនេះ អស់ជាច្រើនឆ្នាំ បានបង្ហាញលទ្ធផលរបស់ខ្លួននៅក្នុងកិច្ចប្រជុំសុខភាពក្នុងទីក្រុង ឈីកាហ្គោ កាលពីថ្ងៃអាទិត្យមុន។
អ្នកជំនាញទាំងនោះបានចាត់ទុកការរកឃើញថ្មីនេះថា«អស្ចារ្យ» ដោយសារតែវាជាវិធីសាស្ត្រដ៏ថោក និងងាយស្រួលក្នុងការពិនិត្យរកកោសិកាមហារីកមាត់ស្បូន ជាពិសេសចំពោះស្ត្រីក្រីក្រ ដើម្បីឲ្យពួកគេបានដឹងពីស្ថានភាពសុខភាពរបស់ខ្លួន ក៏ដូចជាការបង្ការ និងព្យាបាលជំងឺនេះនៅដំណាក់កាលស្រាលឲ្យទាន់ពេលវេលា ចៀសវាងការបណ្ដោយឲ្យកោសិកាមហារីករាលដាលធ្ងន់ធ្ងរ។
ជាទូទៅ ការពិនិត្យអាងត្រគាក និងការធ្វើតេស្តរកមេរោគ HPVគឺជាវិធីសាស្ត្រដែលអាចវិភាគពីអាការរោគមហារីកមាត់ស្បូន។ យោងតាមលោកសាស្ត្រាចារ្យ ស៊ូរិនត្រា សាសទ្រី មកពីសាកលវិទ្យាល័យក្នុងទីក្រុងបុមបៃ ប្រទេសឥណ្ឌា វិធីសាស្ត្រទំនើបទាំង២ខាងលើបានជួយជីវិតស្ត្រីអាមេរិកដែលប្រឈម នឹងរោគមហារីកមាត់ស្បូនជាច្រើននាក់ ប៉ុន្តែវិធីសាស្ត្រនេះមិនអាចអនុវត្តនៅប្រទេសក្រីក្របានទេ ព្រោះតែវាទាមទារឧបករណ៍វេជ្ជសាស្ត្រថ្លៃៗ និងត្រូវចំណាយប្រាក់ច្រើន។
ដូច្នេះលោកក៏បានធ្វើការសាកល្បងវិធីសាស្ត្រដែលងាយ ហើយថោក ដែលអាចអនុវត្តដោយប្រជាជនក្នុងស្រុក ដោយគ្រាន់តែធ្វើការហ្វឹកហ្វឺនរយៈពេលតែ២សប្ដាហ៍ និងមិនចាំបាច់ប្រើឧបករណ៍ពេទ្យទំនើបឡើយ។
វិធីសាស្ត្រដ៏សាមញ្ញនោះគឺការប្រើទឹកខ្មេះលាយទឹកបន្តិច រួចយកទៅជូតបរិវេណមាត់ស្បូន ហើយរង់ចាំពិនិត្យមើលការប្រែប្រួលពណ៌សាច់ម្ដុំនោះ។ ក្នុងករណីមានរោគមហារីកមាត់ស្បូន កោសិកានឹងប្រែពណ៌ជាមិនខាន។
ការសិក្សាដែលគាំទ្រដោយសហរដ្ឋអាមេរិកបានប៉ាន់ស្មានថា វិធីសាស្ត្រធ្វើតេស្តរកជំងឺមហារីកមាត់ស្បូននេះអាចកាត់បន្ថយអត្រា ស្លាប់បាន៣១ភាគរយ និងស្រោចស្រង់ជីវិតមនុស្សបានជាង៧ម៉ឺននាក់ទូទាំងពិភពលោករៀងរាល់ ឆ្នាំ។
បច្ចុប្បន្នរដ្ឋាភិបាលឥណ្ឌា គ្រោងពង្រីកការធ្វើតេស្តមហារីកមាត់ស្បូនដោយប្រើទឹកខ្មេះនេះទូទាំងប្រទេស៕ PR: By Phnom Penh Post
No comments:
Post a Comment