លោកបណ្ឌិត ច័ន្ទ សារុន រដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទ បានថ្លែងក្នុងឱកាសបើកសិក្ខាសាលាពិគ្រោះយោបល់លើសេចក្តីព្រាងច្បាប់ ស្តីពី “គុណភាពនិងសុវត្ថិភាពផលិតផលកសិកម្ម” នៅថ្ងៃទី០៤ ខែមិថុនា ឆ្នាំ២០១៣ នាសណ្ឋាគារ ហ៊ីម៉ាវ៉ារី ថា ការកាត់បន្ថយភាពក្រីក្ររបស់ប្រជាជនកម្ពុជាវិញ គឺសម្រេចបានក្នុងអត្រាប្រមាណ៤,៥ភាគរយ ក្នុងមួយឆ្នាំនៅក្នុងរយៈពេល៨ឆ្នាំចុងក្រោយនេះ។
លោកបានបញ្ជាក់ថា «កំណើនសេដ្ឋកិច្ចជាតិបង្ហាញពីកំណើនជីវភាពរស់នៅរបស់ប្រជាជនកម្ពុជា និងសុវត្ថិភាពអាហារដែលជាផលិតផលកសិកម្ម ក៏ចេះតែមានការកើនឡើងជាលំដាប់»។
លោកបានបន្តទៀតថា នៅក្នុងឆ្នាំ២០១២កន្លងទៅនេះ វិស័យកសិកម្ម ដែលរាជរដ្ឋាភិបាលចាត់ទុកថា ជាវិស័យអាទិភាពមួយនាគ្រប់កាលៈទេសៈ បានចូលរួមចំណែកប្រមាណ២៧.៥ភាគរយ ក្នុងផលិតផលសរុបក្នុងស្រុក និងកំណើនវិស័យកសិកម្មមានប្រមាណ៤,៣ភាគរយ។
នៅក្នុងវិស័យកសិកម្មទាំងមូល ការចូលរួមពីផ្នែកដំណាំកសិកម្មមានប្រមាណ៥៤,៨ភាគរយ ផលិតកម្មនេសាទ២៥,៤ភាគរយ ផលិតកម្មសត្វ១៤,១ភាគរយ និងអាជីកម្មព្រៃឈើមានប្រមាណ៥,៧ភាគរយ។
សូមបញ្ជាក់ថា គោលបំណងនៃសិក្ខាសាលានេះគឺដើម្បីប្រមែប្រមូលនូវមតិយោបល់ គំនិតល្អៗយកមកពិចារណាក្នុងការបញ្ចូលក្នុងសេចក្តីព្រាងច្បាប់នេះ នឹងដើម្បីតម្រង់ទិសសេចក្តីព្រាងច្បាប់នេះឲ្យស្របតាមបរិបទនិង បច្ចុប្បន្នភាពព្រមទាំងការអនុវត្តលើការងារគ្រប់គ្រងគុណភាពនិង សុវត្ថិភាពផលិតផលកសិកម្មកាន់តែមានប្រសិទ្ឋភាពខ្ពស់ក្នុងប្រទេស កម្ពុជា ដើម្បីធានាដល់ផលិតផលកសិកម្មមានគុណភាព និងសុវត្ថិភាពរក្សាសុខមាលភាពសាធារណៈ និងជម្រុញឲ្យមានការអភិវឌ្ឍន៍វិស័យកសិកម្ម និងសេដ្ឋកិច្ចជនបទ៕ជែម
No comments:
Post a Comment