យោងតាមសេចក្តីប្រកាសព័ត៌មានរបស់វេទិកាយុវជនបេតិភណ្ឌពិភពលោក ដែលចេញផ្សាយនៅថ្ងៃទី៥ ខែមិថុនា ឆ្នាំ២០១៣នេះ បានលើកឡើងថា វេទិកាយុវជនបេតិកភណ្ឌពិភពលោកនេះ ធ្វើឡើងក្នុងគោលបំណងលើកកម្ពស់ការ យល់ដឹងរបស់គណៈប្រតិភូយុវជនចូលរួម ក៏ដូចជាយុវជនទូទៅ អំពីតួនាទីជារួមរបស់យុវជន ដែលជាអ្នកបន្តវេន ក្នុងការអភិរក្ស និងថែរក្សាសម្បត្តិបេតិកភណ្ឌជាតិ និងពិភពលោក។ ជាពិសេសទំនាក់ទំនងមិនអាចកាត់ផ្តាច់បាន នៃប្រាសាទ បរិស្ថាន និងសហគមន៍ ដែលរស់នៅជុំវិញនោះផងដែរ។
សេចក្តីប្រកាសព័ត៌មានដដែល បានឲ្យដឹងទៀតថា វេទិកាយុវជន ដែលប្រព្រឹត្តមុនការឈានមកដល់ នៃសម័យប្រជុំពេញអង្គលើកទី ៣៧ នៃគណៈកម្មាធិការបេតិកភណ្ឌពិភពលោកពីថ្ងៃទី១៦-២៧ ខែមិថុនា រៀបចំឡើងដោយកម្ពុជានេះ មានការ ចូលរួមដោយប្រតិភូយុវជនកម្ពុជា ២០រូប និងប្រតិភូយុវជនអន្តរជាតិ១៨រូប មកពី ១៦ប្រទេសផ្សេងៗគ្នា។
ក្នុងវេទិកាជំនួបយុវជន នៃបណ្តាប្រទេសសម្បត្តិបេតិកភណ្ឌពិភពលោក នៅក្នុងខេត្តសៀមរាប ប្រតិភូយុវជននឹង បង្ហាញអំពីសម្បត្តិបេតិកភណ្ឌជាតិរបស់ខ្លួន ក្នុងវេទិកា ព្រមទាំងពិភាក្សាជាមួយអ្នកជំនាញ ។ ជាមួយគ្នានេះ ប្រតិភូយុវជនទាំងអស់ នឹងទស្សនកិច្ចសិក្សានៅតំបន់ឧទ្យានអង្គរ ដែលសម្បូរទៅដោយប្រាង្គប្រាសាទដ៏ល្បីល្បាញនៅ កម្ពុជាផងដែរ។
បន្ទាប់ពីការជួបពិភាក្សានៅទីក្រុងសៀមរាប ក្រុមប្រតិភូយុវជនបេតិកភណ្ឌពិភពលោក នឹងធ្វើបទបង្ហាញនូវសេចក្តី ថ្លែងការណ៍របស់យុវជន ដល់គណៈប្រតិភូចូលរួមក្នុងកម្មវិធីបើកសម័យប្រជុំពេញអង្គលើកទី៣៧ នៃគណៈកម្មាធិការបេតិកភណ្ឌពិភពលោក ឆ្នាំ២០១៣ នៅរាជធានីភ្នំពេញ នាថ្ងៃទី១៦ ខែមិថុនា។
វេទិកាយុវជនបេតិកភណ្ឌពិភពលោក ក្រោមប្រធានបទដែលហៅជាភាសាអង់គ្លេសថា Living Heritage: Tem ple, Environment and People «TEP» រៀបចំឡើងដោយក្រុមការងាររៀបចំវេទិកាយុវជន និងយុវជនស្ម័គ្រចិត្ត សម្រាប់សម័យប្រជុំពេញអង្គលើកទី៣៧ នៃគណៈកម្មាធិការបេតិកភណ្ឌពិភពលោក ដោយសហការជាមួយសហភាពសហព័ន្ធយុវជនកម្ពុជា គណៈកម្មការជាតិកម្ពុជា សម្រាប់អង្គការយូណេស្កូ និងអាជ្ញាធរអប្សរា។
គួរបញ្ជាក់ថា វេទិការយៈពេល៧ថ្ងៃ ដែលធ្វើឡើងនៅទីក្រុងសៀមរាបអង្គរ៥ថ្ងៃ និងរាជធានីភ្នំពេញ២ថ្ងៃនេះ ក៏នឹងចែករំលែក បទពិសោធន៍ ការទទួលស្គាល់ និងការឲ្យតម្លៃដល់ពហុភាព នៃវប្បធម៌នានា មកពីគ្រប់តំបន់ នៃពិភពលោកក្នុង ការលើកកម្ពស់តម្លៃជាសកល នៃសម្បត្តិបេតិកភណ្ឌទាំងនេះផងដែរ៕ សំណាង
No comments:
Post a Comment