អន្តរជាតិ៖ លោក Ahmet Davutoglu រដ្ឋមន្ត្រីការបរទេសប្រទេសតួគី បានច្រានចោលការចោទប្រកាន់របស់លោក John Kerry រដ្ឋមន្ត្រីការបរទេសសហរដ្ឋអាមេរិក ដែលបានចោទប្រកាន់មកលើការបំបែកហ្វូងបាតុករជាអំពើអមនុស្សធម៌។
លោក Davutoglu បានសន្ទនាជាមួយលោក Kerry ផ្ទាល់កាលពីថ្ងៃពុធម្សិលមិញនេះហើយលោកបានលើកឡើងថា រឿងហេតុដូចគ្នានេះវាធ្លាប់បានកើតឡើងដូចគ្នានៅសហរដ្ឋអាមេរិក និងប្រទេសអ៊ឺរ៉ុបមួយចំនួន ហេតុនេះហើយបញ្ហាបាតុកម្ម និងបំបែកបាតុកម្មបែបនេះវាមិនមានអ្វីទទួលយកមិនបាននោះទេ។
លោកបានបន្ថែមទៀតផងដែរថា នៅតួគីគឺជារដ្ឋប្រជាធិបតេយ្យពិតប្រាកដ មិនមែនជារដ្ឋប្រជាធិបតេយ្យមានកម្រិតនោះទេ ហេតុនេះហើយប្រជាពលរដ្ឋដែលមិនពេញចិត្តមានសិទ្ធិក្នុងការបញ្ចេញមតិ និងបង្ហាញចំណាប់អារម្មណ៍ ក៏ដូចជាតវ៉ាជាដើម។
ការនិយាយដោយលើកឡើងបែបនេះត្រូវបានក្រុមអ្នកវិភាគបរទេសមួយ ចំនួនយល់ឃើញថាគ្រាន់តែជាការលើកឡើងដើម្បីឱ្យបានរួចខ្លួនតែ ប៉ុណ្ណោះ ចំនែកឯសហរដ្ឋអាមេរិកវិញបានទាមទារឱ្យប្រទេសតួគី មានការចរចារត្រឹមត្រូវជាមួយតំណាងបាតុករ និងគោរពសិទ្ធិមនុស្សឱ្យបានដិតដល់ ក៏ដូចជាគោរពសិទ្ធិនយោបាយរបស់ប្រជាពលរដ្ឋ។ គួរបញ្ជាក់ផងដែរថាមកដល់ពេលនេះគឺ ១ សប្ដាហ៍ពេញហើយដែលអំពើហិង្សារដែលកើតឡើងចេញពីមនុស្សរាប់ម៉ឺន នាក់បានផ្ដុំគ្នាធ្វើបាតុកម្មប្រឆាំងរដ្ឋាភិបាលបានធ្វើឡើង៕ ប្រែសម្រួលដោយ៖ វង្ស វឌ្ឍនា
No comments:
Post a Comment