អស់រយៈពេលជាង ១៥ ឆ្នាំហើយដែលសេដាកបានធ្វើការបណ្តុះបណ្តាល និងផ្តល់យោបល់ដល់កសិករ ហើយបានធ្វើឱ្យកសិកររាប់ម៉ឺនគ្រួសារបានបង្កើននូវផលិតកម្មកសិកម្ម និងប្រាក់ចំណូលរបស់ខ្លួន។
ដើម្បីឱ្យកសិករអ្នកធ្វើស្រែមានជីវភាពប្រសើរឡើង បន្ថែមលើការងារបច្ចេកទេសកសិកម្មដែលសេដាក បាននិងកំពុងជួយគាំទ្រ បច្ចុប្បន្នសេដាកកំពុងតែជំរុញឱ្យកសិករធ្វើអ្វីដែលអាចធ្វើបាន ជាពិសេសផ្តោតលើការ ជំរុញការអនុវត្តន៌ការងារ ២ ចំណុចដូចខាងក្រោមៈ
១. ការសន្សំទឹកភ្លៀង តាមរយៈការបង្កើនចំនួនពាងទឹក ដែលនឹងចូលរួមចំណែកកាត់បន្ថយពេលវេលា ទៅរកទឹក និងការទទួលបានទឹកគ្រប់គ្រាន់សំរាប់បរិភោគនៅរដូវប្រាំង។
២. ការជីកស្រះ ឫស្តារស្រះ ត្រពាំងសំរាប់ស្តុកទឹកភ្លៀងជាលក្ខណៈគ្រួសារ ដែលនឹងជួយរំដោះទឹកមិនឱ្យ ជាំលិចពេលមានភ្លៀងច្រើន និងជួយស្តុកទឹកទុកកុំឱ្យហូរអស់ ដើម្បីទទួលបានទឹកគ្រប់គ្រាន់សំរាប់ប្រើប្រាស់ នៅរដូវប្រាំង។ ក្រៅពីនេះ វាក៏នឹងផ្តល់ជាជំរកសំរាប់ត្រី និងកង្កែបដែលជាពពួកសត្វមានប្រយោជន៌សំរាប់ដំណាំ ស្រូវ និងជាចំណីអាហារ ក៏ដូចជាប្រភពប្រាក់ចំណូលសំរាប់គ្រួសារផងដែរ។
លោក អ៊ួន សុផល កសិករនៅភូមិខ្ជាយខាងលិច ឃុំដំណាក់សុក្រម ស្រុដងទង់ ខេត្តកំពត មានប្រសាសន៌ថា
“ ការគ្រប់គ្រងទឹកនៅតាមជនបទដោយការជីកស្រះជាលក្ខណៈគ្រួសារគឺមាន សារៈសំខាន់ខ្លាំងណាស់សំរាប់ កសិករ ពីព្រោះក្រៅពីការជួយស្តុកទឹកភ្លៀងទុកប្រើប្រាស់នៅរដូវប្រាំង វាក៏បាជួយកាត់បន្ថយនូវការជន់លិចនៅ រដូវវស្សា និងបានផ្តល់ត្រីសំរាប់បរិភោគផងដែរ។ លោកបន្តថា លោកបានជីកស្រះជាលក្ខណៈគ្រួសារបានចំនួន ៤ស្រះ តូចៗ ដែធ្វើឱ្យការប្រកបមុខរបរកសិកម្ម និងចិញ្ចឹមសត្វរបស់លោកមានភាពងាយស្រួល” ។
បណ្ឌិត យ៉ង សាំងកុមារ ប្រធានអង្គការសេដាកមានប្រសាសន៍ថា “ ទឹកគឺមានសារៈសំខាន់មិនត្រឹមតែសំរាប់ការស្រោចស្រព្វប៉ុណ្ណោះទេ ប៉ុន្តែវាមានសារៈសំខាន់និងចាំបាច់បំផុតសំរាប់ការប្រើប្រាស់ប្រចាំ ថ្ងៃ ពិសេសការបរិភោគនៅក្នុងគ្រួសារ។ កាលណាក្នុងមួយគ្រួសារមានពាងទឹកសំរាប់សន្សំទឹកភ្លៀងទុក ចាប់ពី ១០ពាង ឡើងទៅ នោះកសិករនឹងមានទឹកគ្រប់គ្រាន់សំរាប់ការប្រើប្រាស់និងបរិភោគរយៈពេល មួយឆ្នាំពេញ ហើយជីវភាពនឹងមានភាពប្រសើរឡើង” ។
សេដាក សូមអំពាវនាវឱ្យកសិករ អជ្ញាធរមូលដ្ឋាននិងអ្នកពាក់ព័ន្ធទាំងអស់ ជួយគាំទ្រនិងជំរុញការប្រមូល និងសន្សំទឹកភ្លៀងទុករបស់កសិករឱ្យបានច្រើននិងគ្រប់ទីកន្លែង ដើម្បីចូលរួមចំណែកធ្វើឱ្យជីវភាពកសិករកាន់តែ ធូរធារ។
ទំនាក់ទំនងៈ សម្រាប់ព័ត៌មានបន្ថែម សូមទាក់ទង លោក ហ៊ីម ខទៀត លេខទូរស័ព្ទៈ ០១៦ ៥៧ ៥៧ ១៣
No comments:
Post a Comment