យុវជនម្នាក់គប់ដុំថ្ម
ទៅលើក្រុមប៉ូលិសបង្ក្រាបបាតុកម្មរាប់ស៊ឹបនាក់
ដែលចុះទៅធ្វើការបង្ក្រាបការតវ៉ារបស់កម្មករនៅរោងចក្រ Sabrina
ក្នុងខេត្តកណ្តាលកាលពីម្សិលមិញ។ រូបថត Reuters
កូដកម្មនៅរោងចក្រផ្គត់ផ្គង់ផលិតផល Nike នៅក្នុងខេត្តកំពង់ស្ពឺ បានក្លាយជាបាតុកម្មហិង្សាជាលើកទី២ នៅក្នុងរយៈពេល២សប្តាហ៍កន្លងទៅនេះ នៅពេលក្រុមអ្នកតវ៉ាបានចូលទៅក្នុងរោងចក្រ និងគប់គ្នាជាមួយនិយោជិត ដែលកំពុងធ្វើការដែលធ្វើឲ្យសមត្ថកិច្ចនគរបាលនិងកងរាជអាវុធហត្ថ ត្រូវចូលទៅធ្វើអន្តរាគមន៍។
លោក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេស បានថ្លែងថា៖ «អ្នកធ្វើកូដកម្មបានប្រឈមគ្នាទៅវិញទៅមកក្នុងរោងចក្រ ហើយបានប្រើដុំថ្ម និងដំបងគប់បំផ្លាញទ្រព្យសម្បតិ្តរោងចក្រ។ លោកបន្ថែមថា មន្រ្តីនគរបាល ៩ នាក់ បានរងរបួសធ្ងន់ ខណៈចូលទៅធ្វើអន្តរាគមន៍ក្នុងការប៉ះទង្គិចគ្នានេះ។
លោកបន្តថា៖ «យើងបានចាប់ខ្លួនសមាជិកសហជីព ៨ នាក់ ដែលញុះញង់កម្មករឲ្យប្រើអំពើហិង្សា។ តែឥឡូវយើងបានប្រគល់ពួកគេទៅឲ្យនគរបាលដើម្បីចាត់ការលើបញ្ហា នេះហើយ»។
យោងតាមលោក ពេជ្រ ពណ្ណរាយ អ្នកនាំពាក្យសហជីពសេរីកម្មករឲ្យដឹងថា នគរបាល និងមន្រ្តីកងរាជអាវុធហត្ថប្រហែល ១ពាន់នាក់បានអន្តរាគមន៍នៅរោងចក្រសាប្រ៊ីណា ដែលជួលកម្មករបម្រើការប្រមាណជាង៥ពាន់នាក់។
លោកបន្តទៀតថា ការប៉ះទង្គិចគ្នាបានចាប់ផ្តើមពេលកម្មករធ្វើកូដកម្មទាមទារអត្ថ ប្រយោជន៍ និងប្រាក់ឈ្នួលប្រសើរជាងមុន បានចូលទៅក្នុងរោងចក្រដើម្បីជួយកម្មករម្នាក់ ដែលត្រូវគេវាយដំ និងឃុំខ្លួននៅទីនោះហើយកម្មករដែលមិនបានចូលរួមកូដកម្ម បានប្រើដំបង និងបំពង់ពន្លត់អគ្គិភ័យមកបណ្តេញពួកគេឲ្យចេញ។
លោក ឡេង ប្រុស ជាកូដករម្នាក់ បានប្រាប់ថា៖ «ខ្ញុំបានជួយកម្មការិនីពីរនាក់ដែលសន្លប់ បន្ទាប់ពីកម្មករក្នុងរោងចក្របានប្រើបំពង់ពន្លត់អគ្គិភ័យមកបាញ់ លើពួកគេ។ ឯនគរបាល ក៏បានវាយលើកម្មករដែរ»។
លោក ខេន លូ អគ្គលេខាធិការនៃសមាគមរោងចក្រកាត់ដេរនៅកម្ពុជា ក៏បានឲ្យដឹងដែរថា អ្នកដែលបានឃើញការប៉ះទង្គិចនោះ បានរៀបរាប់ផ្សេងគ្នាអំពីព្រឹតិ្តការណ៍នៅរោងចក្រសាប្រ៊ីណានោះ។
កម្មករធ្វើកូដកម្មបានចូលមកប្រើដំបងឈើគប់ដុំថ្មទៅលើបង្អូច និងមនុស្ស។ លោកបន្តថា វត្ថុទាំងនោះបានបង្ករបួសលើមនុស្សជាច្រើននាក់នៅក្នុងហេតុការណ៍ ប៉ះទង្គិចគ្នាម្សិលមិញនេះ។
លោកបញ្ជាក់ថា៖ «ជាការពិត រោងចក្របានត្រៀមរៀបចំសេចក្តីព្រាងនីតិវិធីច្បាប់ប្រឆាំងនឹងអំពើ ហិង្សាដែលបង្កការខូចខាតលើរោងចក្រ ជាមួយនឹងរដ្ឋាភិបាល»។
កូដករបានថ្លែងថា កូដកម្មរបស់ពួកគេនឹងបន្តកើតមានជាថ្មីទៀត។
លោក ហុង លុយ អ្នកគ្រប់គ្រងផ្នែករដ្ឋបាលនៅរោងចក្របានបដិសេធមិនផ្តល់ការអត្ថាធិប្បាយពីការប៉ះទង្គិចគ្នានេះទេ៕ TK
រាយការណ៍បន្ថែមៈ ជាង សុខា និង Justine Drennan
By Phnom Penh post
No comments:
Post a Comment