លោក ទេព នីថា អគ្គលេខាធិការ គ.ជ.ប។ រូបថត ហេង ជីវ័ន
លោក ទេព នីថា អគ្គលេខាគ.ជ.ប បានប្រាប់ ភ្នំពេញ ប៉ុស្តិ៍ កាលពីថ្ងៃម្សិលមិញថា ក្នុងការឃោសនាបោះឆ្នោតគណបក្សនយោបាយទាំងអស់ត្រូវតែគោរពគោលការណ៍ ច្បាប់ ក្នុងការឃោសនាពីគោលនយោបាយរបស់ខ្លួន។ រាល់ពេលឃោសនាស្វែងរកសន្លឹកឆ្នោត គណបក្សនយោបាយនីមួយៗត្រូវចៀសវាងកុំរើសអើងសាសនា និងជាតិសាសន៍ ព្រោះថា វាអាចបង្កឲ្យមានកំហឹង និងអំពើហិង្សា។
លោក ទេព នីថា បានថ្លែងថា៖ «ឧទាហរណ៍ គណបក្ស [វៀតណាម] នេះអ្នកបោះឆ្នោតឲ្យគណបក្សនេះ គឺដូចអ្នកបោះឆ្នោតឲ្យ [វៀតណាម] [វៀតណាម] នឹងចូលមកក្នុងទឹកដីខ្មែរ។ នេះជាករណីហាមឃាត់»។
លោក ទេព នីថា បានបន្ថែមថា ប្រសិនបើ គ.ជ.ប រកឃើញថា គណបក្សនយោបាយណាមួយបានឃោសនាគោលនយោបាយរបស់ខ្លួនបែបនេះក្នុងពេល យុទ្ធនាការ ឃោសនាបោះឆ្នោតពួកគេនឹងត្រូវណែនាំឲ្យកែតម្រូវ ហើយប្រសិនបើពួកគេមិនកែតម្រូវ យើងនឹងបិទការឃោសនារបស់ពួកគេ។ លោកបន្ថែមថា៖«ក្នុងករណីមានពាក្យបណ្តឹង យើងនឹងដោះស្រាយដោយផ្តន្ទាទោសតាមច្បាប់បោះឆ្នោត»។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានថ្លែងថា គណបក្សប្រឆាំងមិនដែលធ្វើការឃោសនាដោយរើសអើង ឬជាតិសាសន៍និយមឡើយ ចាប់តាំងពីគណបក្សនេះបានបង្កើតឡើង។
លោក សុវណ្ណ បានបន្តថា៖ «យើងបានធ្វើការឃោសនា ទៅតាមគោលនយោបាយត្រឹមត្រូវរបស់យើង។ យើងឃើញបែបនេះ យើងនិយាយបែបនេះ។ ទាល់តែវាពិត ទើបយើងនិយាយបើមិនពិត យើងមិននិយាយទេ»។
យុទ្ធនាការឃោសនាបោះឆ្នោតជាតិ អាណត្តិទី ៥ នឹងប្រព្រឹត្តទៅចាប់ពីថ្ងៃទី២៦ ខែមិថុនា ដល់ពាក់កណ្តាលយប់ថ្ងៃទី ២៦ ខែកក្កដា ខណៈដែលការបោះឆ្នោតជាតិប្រព្រឹត្តទៅនៅថ្ងៃទី២៨ខែកក្កដា៕ TK:By Phnom Penh Post
No comments:
Post a Comment