ក្រោយ​មាន​ពាក្យ​ចចាមអារ៉ាម​ជា​ច្រើន​ជុំវិញ​ SmartWatch ជំនាន់​ថ្មី​របស់ Sony តាំង​ពី​សប្ដាហ៍​មុន​នោះ នៅ​ពេល​នេះ​ក្រុមហ៊ុន​បច្ចេកវិទ្យា​យក្ស​របស់​ជប៉ុន​មួយ​នេះ​ បាន​ប្រកាស​បញ្ចេញ​ SmartWatch ជំនាន់​ថ្មី​​របស់​ខ្លួន​ជា​ផ្លូវការ​ហើយ។
អ្វី​​ដែល​ខុស​ពី SmartWatch ជំនាន់​មុន គឺ Sony បាន​ពង្រីក​ទំហំ​អេក្រង់​ពី ១,៣អ៊ីញ ទៅដល់​​ ១,៦អ៊ីញ និង​មាន​អេក្រង់​​ដែល​មាន​ Resolution ២២០x១៧៦ pixel។ ផលិត​ផល​ថ្មី​ ដែលត្រូវ​បាន​គេ​ហៅ​ថា Sony​ SmartWatch 2 នេះ អាច​ប្រើប្រាស់​ត្រូវ​​ជាមួយ​ទូរសព្ទ smartphone ដែល​ដំណើរការ​ដោយ Android 4.0 ឡើង​ទៅ។
នៅ ​ពេល​ប្រើ​ជាមួយ Smartphone, SmartWatch 2 នឹង​អាច​មាន​សមត្ថភាព​ទទួល​ទូរសព្ទ ថត​រូប បើក​ Facebook និង Twitter ក៏​ដូច​ជា​បើក Email និង​សារ​ជា​អក្សរ​បាន​ទៀត​ផង។ សមត្ថភាព​របស់​ SmartWatch 2 នឹង​កាន់​តែ​ច្រើន​ជាង​នេះ​ទៀត ​ប្រសិន​បើ​យើង​ទាញ​យក​កម្មវិធី​មួយ​ចំនួន​ក្នុង​ចំណោម​កម្មវិធី (app) របស់​វា​ជាង​២០០។ ចំណែក​ឯ​ថាមពល​ថ្ម​វិញ Sony បាន​បញ្ជាក់​ថា​អាច​កាន់​បាន​ពី​៣ ទៅ​៤ថ្ងៃ​ សម្រាប់​ការ​ប្រើ​ប្រាស់​ធម្មតា។
SmartWatch 2 នឹង​ត្រូវ​ចេញ​លក់​លើ​ទីផ្សារ​នៅ​ក្នុង​ខែ​កញ្ញា​ខាង​មុខ​នេះ ប៉ុន្តែ​តម្លៃ​មិន​ទាន់​ត្រូវ​បាន​ប្រកាស​ឲ្យ​ដឹង​នៅ​ឡើយ​ទេ៕
សូម​មើល​វីដេអូ​ខាង​ក្រោម៖
ប្រែ​សម្រួល៖ សុខ សុវត្ថិ
ប្រភព៖ techspot