ភ្ញៀវទេសចរជាតិ និងអន្តរជាតិ
នាំគ្នាងូតទឹកជ្រោះប៊ូស្រា
ដែលជាតំបន់ទឹកជ្រោះដ៏ទាក់ទាញមួយក្នុងខេត្តមណ្ឌលគិរី។ រូបថត សេត
គឹមសឿន
លំហូរភ្ញៀវមកពីគ្រប់ជាតិសាសន៍ដែលងប់ងុលនឹងសម្រស់ធម្មជាតិ ព្រៃភ្នំ និងរមណីយដ្ឋានធម្មជាតិ ប្រវត្តិសាស្រ្តរបស់ខេត្តមណ្ឌលគិរីដែលមិនអាចឲ្យរំលងផុតនោះ ត្រូវបានគេអះអាងថាទើបតែកើតមាននៅរយៈពេលចុងក្រោយនេះប៉ុន្មាន ឆ្នាំដែរទេក្រោយពីខេត្តនេះទទួលបានផ្លូវជាតិលេខ៧៦A ដែលបំបែកចេញពីផ្លូវជាតិលេខ៧ ម្តុំឃ្សឹមស្រុកស្នូល។
លោក ឈួន តារា ជានិស្សិតបន្តការសិក្សានៅភ្នំពេញ លោកបានប្រាប់ភ្នំពេញប៉ុស្តិ៍ថា លោកធ្លាប់បានទៅលេងខេត្តមណ្ឌលគិរីម្តងហើយបើទោះជាពេលវេលានោះ រំលងផុតជិតមួយឆ្នាំក៏ដោយប៉ុន្តែរូបភាព និងទេសភាពដ៏ខៀវស្រងាត់ និងព្រៃភ្នំខេត្តនោះនៅតែស្ថិតក្នុងក្រសែភ្នែកលោក។ លោកបានបន្តថា៖«ក្រៅពីតំបន់ទេសចរណ៍ប្រវត្តិសាស្រ្ត និងតំបន់កម្សាន្តបែបធម្មជាតិជាច្រើនដែលមិនអាចឲ្យខ្ញុំបំភ្លេច នោះ ទេសភាពនៅតាមសងខាងផ្លូវជាតិលេខ៧៦Aដែលគេបានធ្វើការពុះកាត់ ភ្នំឬក្រឡឹងតាមចង្កេះភ្នំឆ្ពោះទៅខេត្តមណ្ឌលគិរីនោះក៏ជាផ្នែក មួយបម្រើដល់វិស័យទេសចរណ៍យ៉ាងសំខាន់ដែរ»។
ដោយសារមានប្រព័ន្ធចរាចរណ៍ធ្វើដំណើរយ៉ាងស្រួលនិងប្រកបដោយ ទេសភាពជាទីទាក់ភ្នែកដិតអារម្មណ៍តាមដងផ្លូវនិងសម្បូរទៅដោយ រមណីយដ្ឋានធម្មជាតិ រមណីយដ្ឋានប្រវត្តិសាស្រ្ត និងកន្លែងកម្សាន្តជាច្រើននោះ ភ្ញៀវទេសចរជាតិនិងអន្តរជាតិមកលេងខេត្តមណ្ឌលគិរីមានការកើនឡើងពី មួយឆ្នាំទៅមួយឆ្នាំគួរឲ្យកត់សម្គាល់។ ព្រមជាមួយនឹងចំនួនភ្ញៀវទេសចរមានការកើនឡើងនោះ ចំនួនបន្ទប់ស្នាក់នៅតាមបណ្តាសណ្ឋាគារផ្ទះសំណាក់និងរមណីយដ្ឋានបែប អេកូទេសចរណ៍ ត្រូវបានកែច្នៃនិងសាងសង់បន្ថែមផងដែរ ដើម្បីបំពេញការបម្រើសេវាដល់ភ្ញៀវនោះ។
ថ្លែងក្នុងឱកាសបើកសម្ពោធសណ្ឋាគារ និងរមណីយដ្ឋាន ម៉ាយូរ៉ា ហៀល ដែលទើបប្រសូតថ្មីនៅលើទឹកដីខ្ពង់រាបនៃខេត្តមណ្ឌលគិរីកាលពីដើម ខែមិថុនានេះ លោក ងិន សុវិមាន ប្រធានមន្ទីរទេសចរណ៍ខេត្តមណ្ឌលគិរី បានលើកឡើងឲ្យដឹងថាចាប់តាំងពីផ្លូវជាតិលេខ៧៦Aត្រូវបាន ស្ថាបនារួចមកខេត្តមណ្ឌលគិរីទទួលបានចំនួនភ្ញៀវទេសចរជាតិនិង អន្តរជាតិបានមកលេងមានការកើនឡើងគួរឲ្យកត់សម្គាល់ពីមួយឆ្នាំទៅ មួយឆ្នាំមានការកើនឡើងច្រើន។ ដូចគ្នានឹងការអះអាងនោះ លោកប្រធានមន្ទីរក៏បានបង្ហាញពីតួលេខនៃកំណើនភ្ញៀវចូលមកទស្សនា កម្សាន្ត នៅក្នុងខេត្តមណ្ឌលគិរីរយៈពេល៥ខែដើមឆ្នាំ២០១៣នេះដែរថា៖«បើ ប្រៀបធៀបទៅនឹងឆ្នាំ២០១២ ដើមឆ្នាំ២០១៣នេះ ភ្ញៀវដែលបានធ្វើដំណើរមកកម្សាន្តនៅតាមទីរមណីយដ្ឋាននានា ក្នុងខេត្តនេះ មានការកើនឡើង ដល់ទៅ២២,៩៧ភាគរយឯណោះ ដែលក្នុងនោះភ្ញៀវជាតិបានកើនឡើង២៣,៨៦ភាគរយចំណែកភ្ញៀវអន្តរជាតិ កើនឡើង៦,២៤ភាគរយ»។
កត្តាដែលនាំឲ្យខេត្តមណ្ឌលគិរីទទួលបានកំណើនភ្ញៀវទេសចរ ចូលទៅកម្សាន្តមានការកើនឡើងគួរឲ្យកត់សម្គាល់នោះ ត្រូវបានគេសម្គាល់ដោយសារផ្លូវល្អងាយស្រួលក្នុងការធ្វើដំណើរ ជីវភាពរបស់ប្រជាពលរដ្ឋកាន់តែធូរធារសេវាកម្មសណ្ឋាគារផ្ទះសំណាក់ ភោជនីយដ្ឋានមានអនាម័យល្អប្រសើរជាងពេលមុន។
ប្រធានមន្ទីរទេសចរណ៍ឲ្យដឹងបន្តថា៖«នោះមកពីខេត្តមណ្ឌលគិរីមាន តំបន់ទេសចរណ៍ច្រើន មានទឹកធ្លាក់ប៊ូស្រាទឹកជ្រោះដំណាក់ស្តេចទឹកជ្រោះរមនាទឹករលក ប៉ូប្រះភ្នំក្រោលភ្នំដោះក្រមុំសមុទ្រឈើឬជិះដំរីដើរលេងតាមភូមិ ជនជាតិនិងធ្វើដំណើរគយគន់ទេសភាពធម្មជាតិនៅតាមបណ្តោយសងខាងផ្លូវ ជាតិ។ គយគន់មើលភ្នំដែលមានស្មៅដុះខៀវស្រងាត់គឺជាទេសភាពល្អបំផុតហើយ ភ្នំទាំងនោះវាបានផ្លាស់ប្តូរពណ៌ទៅតាមរដូវកាល»។
លោកងិន សុវិមាន ប្រធានមន្ទីរទេសចរណ៍ក៏បានបង្ហាញក្តីសង្ឃឹមផងដែរថា ចំនួនភ្ញៀវទេសចរជាតិនិងអន្តរជាតិនឹងមានការកើនឡើងកាន់តែច្រើន ថែមទៀតនៅពេលផ្លូវថ្មីពីមណ្ឌលគិរីទៅខេត្តរតនគិរីដែលឆ្លងកាត់ ស្រុកកោះញែកនិងលំផាត់ធ្វើរួចរាល់នៅពេលខាងមុខដ៏ខ្លីនេះ»៕ By Phnom Penh Post
No comments:
Post a Comment