សម្បត្តិបេតិកភណ្ឌ​របស់ប្រទេសចំនួន១២​ ត្រូវបានគណៈកម្មាធិការ​បេតិកភណ្ឌពិភពលោក​អនុម័តចុះបញ្ជី​ផ្លូវការនៅកម្ពុជា

ដោយ ៖ វ៉ា វឌ្ឍនៈ

ថ្ងៃអាទិត្យ ទី២៣ ខែមិថុនា ឆ្នាំ២០១៣ ម៉ោង ០៨:០៤

មកទល់នឹងល្ងាច​ថ្ងៃទី២២ ​មិថុនា​ ២០១៣​ សម្បត្តិបេតិកភណ្ឌ​របស់ប្រទេស​ចំនួន១២ហើយ​ ត្រូវបានសម័យប្រជុំ​ពេញអង្គលើកទី៣៧​នៃគណៈកម្មាធិការបេតិកភណ្ឌ​ពិភពលោក​ បានអនុម័តចុះ​បញ្ជីជាផ្លូវការ​នៅកម្ពុជា ។

បើតាមអ្នកនំាពាក្យ​សម័យប្រជុំពេញ​អង្គលើកទី៣៧​ នៃគណៈកម្មាធិការ​បេតិកភណ្ឌ​ពិភពលោក​បានឲ្យដឹងថា នៅក្នុងកិច្ចប្រជុំនៅកម្ពុជាពីថ្ងៃទី១៦​ដល់ថ្ងៃទី២៧ មិថុនា ២០១៣នេះ​ មានសម្បត្តិ​បេតិកភណ្ឌ​​ចំនួន​៣១​ របស់ប្រទេស​ចំនួន៣០​ បានសុំចុះបញ្ជី​ជាសម្បត្តិ​បេតិកភណ្ឌពិភពលោក​ ប៉ុន្តែក្នុងនោះអាច​មានសម្បត្តិ​បេតិកភណ្ឌ​របស់​ប្រទេសចំនួន១៥​ប៉ុណ្ណោះ​ ដែលគេសង្ឃឹមថា ​នឹងត្រូវចុះបញ្ជីផ្លូវការ​ក្នុងសម័យប្រជុំលើកទី៣៧​នៅប្រទេស​កម្ពុជានេះ ។

ជាការកត់សម្គាល់​ក្នុងកិច្ចប្រជុំនេះដែរ​ គណៈកម្មាធិការបេតិកភណ្ឌ​ពិភពលោក​ក៏បានសម្រេចលុប​ឈ្មោះបា្រសាទមួយ​ ក្នុងប្រទេសអ៊ីរ៉ង់​ចេញពីបញ្ជីសម្បត្តិ​បេតិកភណ្ឌ​ពិភពលោក​ និង រមណីដ្ឋានចំនួន៦កន្លែងទៀត​ក្នុងប្រទេសស៊ីរី​ ត្រូវបានសម័យប្រជុំលើកទី៣៧​ អនុម័តចុះបញ្ជី​ជាសម្បត្តិបេតិកភណ្ឌ​ពិភពលោក​ស្ថិតក្នុងគ្រោះថ្នាក់ ដោយសារប្រទេសមួយនេះ​បាននឹងកំពុងជួបនឹងវិបត្តិ​សង្រ្គាមស៊ីវិល​ធ្ងន់ធ្ងរ ។

គួរបញ្ជាក់ដែរថា​ សម្បត្តិបេតិកភណ្ឌ​របស់បណ្តាប្រទេសចំនួន៣០​ ​ដែលសុំចុះបញ្ជីនៅកម្ពុជានាពេលនេះ​មាន០៣ប្រភេទគឺ ​សម្បត្តិធម្មជាតិ​ សម្បត្តិជីវៈចម្រុះ​និង​សម្បត្តិ​វប្បធម៌​ ។

មកដល់ពេលនេះ​ដោយមិនទាន់គិតពីសម្បត្តិបេតិកភណ្ឌ​ ដែលត្រូវចុះបញ្ជីនៅកម្ពុជា​ មានសម្បត្តិបេតិកភណ្ឌ​ពិភពលោក​ចំនួន៩៦២ហើយ​ ដែលត្រូវបានចុះបញ្ជីជាសម្បត្តិ​មនុស្សជាតិ ៕