Khmerupdates: International News

Showing posts with label International News. Show all posts

Thursday, September 5, 2013

វាយប្រហារក្រុងបាកដាដបានសម្លាប់មនុស្ស៥០នាក់

ភ្លើងកំពុងឆេះរថយន្ត នៅកន្លែងវាយប្រហារបំផ្ទុះរថយន្តនៅបាកដាដ។ AFP

ក្រុងបាកដាដៈ រលកនៃការបំផ្ទុះគ្រាប់បែកក្នុងរថយន្តបានបំផ្លាញតំបន់និកាយស៊ីអ៊ីត ក្នុងក្រុងបាកដាដកាលពីថ្ងៃអង្គារជាការសម្លាប់មនុស្សច្រើនបំផុត ក្នុងហិង្សានៅទូទាំងប្រទេសដែលបានសម្លាប់មនុស្ស ៥០ នាក់ខណៈប្រទេសអ៊ីរ៉ាក់កំពុងតែទប់ទល់នឹងភាពវឹកវរនាពេល បច្ចុប្បន្ន។

ក្រុមមន្ត្រីសន្តិសុខ និងសុខាភិបាលបាននិយាយថា គ្រាប់បែកក្នុងរថយន្ត១១គ្រាប់បានផ្ទុះក្នុងសង្កាត់និកាយស៊ីអ៊ីត ភាគច្រើននៃក្រុងបាកដាដដោយសម្លាប់មនុស្សយ៉ាងតិច៤០នាក់ និងរបួសជាង ១០០ នាក់ទៀត។

ការផ្ទុះទាំងនេះបានកើតឡើងនៅវេលាម៉ោង ៦ ល្ងាច និងបានវាយប្រហារលើគោលដៅស៊ីវិលជាច្រើន រាប់ចាប់ពីហាងការ៉េមក្នុងខណ្ឌពាណិជ្ជកម្មការ៉ាដានៅភាគកណ្តាលរហូត ដល់ផ្សារល្បីមួយនៅសង្កាត់ម៉ាម៉ាលភាគខាងជើង។គ្រាប់បែកក្នុង រថយន្តមួយគ្រាប់ទៀតបានផ្ទុះនៅក្បែរព្រះវិហារនិកាយស៊ីអ៊ីតមួយនៅ ភាគខាងកើតក្រុងបាកដាដ។

អ្នកកាសែត AFP ម្នាក់នៅឯ កន្លែងកើតហេតុបាននិយាយថា រថយន្តមួយគ្រឿងទៀតផ្ទុកដោយគ្រឿងផ្ទុះនៅតំបន់ Talbiyah ភាគខាងជើងត្រូវបានគេបំផ្ទុះនៅក្បែរផ្សារលក់ដុំបន្លែនិងផ្លែឈើ ដែលមានមនុស្សកុះករ។ វាបានធ្វើឲ្យខូចខាតយ៉ាងធ្ងន់ធ្ងរនូវរថយន្តតូច ជាច្រើនគ្រឿង និងហាងទំនិញជាង ១២កន្លែង។

នេះគឺការបំផ្ទុះគ្រាប់បែកថ្មីបំផុតក្នុងនិន្នាការវាយប្រហារដែល បានកំណត់ពេលឲ្យត្រូវនឹងពេលដែលប្រជាជនទៅហាងកាហ្វេ និងតំបន់សាធារណៈជាច្រើនទៀតក្នុងអំឡុងពេលយប់។

ពីមុនអំពើហិង្សាដែលមានការសម្រួលភាគច្រើនបានកើតឡើងតែក្នុង ម៉ោងប្រញាប់ប្រញាល់ក្នុងពេលព្រឹកប៉ុណ្ណោះ នៅពេលក្រុងតាមធម្មតាស្ទះចរាចរណ៍។

អ្នកនាំពាក្យក្រសួងមហាផ្ទៃលោកឧត្តមសេនីយ៍ត្រីសាតម៉ាន់បានកំណត់ ចំនួនអ្នកស្លាប់ពីអំពើហិង្សាទូទាំងក្រុងមាន៩នាក់ និងរបួស៨១នាក់ក្នុងការវាយប្រហារ១០កន្លែង។

ជារឿយៗ ក្រសួងនេះចេញតួលេខគ្រោះថ្នាក់ទាបជាងតួលេខដែលប្រមូលដោយមន្ត្រីសន្តិសុខ និងសុខាភិបាល។

ក្រុមមន្ត្រីបាននិយាយថា មុននេះក្នុងថ្ងៃដដែលមនុស្ស១០នាក់ទៀតត្រូវបានសម្លាប់នៅក្នុងការវាយប្រហារជាច្រើន។

គ្មានក្រុមណាមួយអះអាងទទួលខុសត្រូវទេ ប៉ុន្តែក្រុមបះបោរនិកាយស៊ុននីពាក់ព័ន្ធនឹងអាល់កៃដាជារឿយៗធ្វើការ វាយប្រហារដោយយកមូស្លីមនិកាយស៊ីអ៊ីតភាគច្រើន ជាគោលដៅ៕ CC By Phnom Penh Post

ប្រធានាធិបតីចិនជួបសមភាគីតួកម៉េនីស្ថាន នៅមុនជំនួបG20

ប្រធានាធិបតីតួកម៉េនីស្ថាន ជួបពិភាក្សាជាមួយលោកស៊ី ជីនភីង (ស្តាំ)។ AFP

ក្រុងប៉េកាំងៈប្រធានាធិបតីចិន លោក ស៊ី ជីនភីងបានជួបពិភាក្សាជាមួយមេដឹកនាំតួកម៉េនីស្ថានកាលពីថ្ងៃអង្គារ ខណៈលោកបានចាប់ផ្តើមដំណើរទស្សនកិច្ចទៅអាស៊ីកណ្តាលនៅមុន កិច្ចប្រជុំកំពូល G20 នៅរុស្ស៊ី។
ទីភ្នាក់ងារសារព័ត៌មានរដ្ឋស៊ីនហួ បាននិយាយថា លោកស៊ីបានជួបជាមួយប្រធានាធិបតី Gurbanguly Berdymukhamedov ដើម្បីពិភាក្សាពីការពង្រឹងទំនាក់ទំនង និងកិច្ចសហប្រតិបត្តិការបន្ថែមទៀត។
មេដឹកនាំចិនបានចេញដំណើរពីព្រឹកថ្ងៃអង្គារលើដំណើរទស្សនកិច្ច មួយដែលរំពឹងថានឹងឃើញមានកិច្ចព្រមព្រៀងថាមពលជាច្រើននិង កិច្ចពិភាក្សាស្តីពីកំណើនយឺត។
ស៊ីនហួ និងកាសែត China Daily បាននិយាយថា ផ្តើមពីប្រទេសតួកម៉េនីស្ថាន លោកស៊ីនឹងឆ្ពោះទៅជំនួបកំពូលនៃក្រុមមេដឹកនាំពិភពលោក២០ក្នុង ក្រុងឡេនីនក្រាត នៅថ្ងៃព្រហស្បតិ៍បន្ទាប់មកបន្តទៅប្រទេសកាហ្សាក់ស្ថាន អ៊ូសបេគីស្ថាន និងកៀហ្ស៊ីស៊ីស្ថាន។
ពីមុនបណ្តាប្រទេសអាស៊ីកណ្តាលធ្លាប់ជាផ្នែករបស់សហភាពសូវៀត មិនមែនចិនដែល មានតម្រូវការថាមពលច្រើនទេ។ បច្ចុប្បន្នចិនមានឥទ្ធិពលក្នុងតំបន់កើនឡើង។
កាសែត China Daily បានស្រង់សម្ដីអនុរដ្ឋមន្ត្រីការបរទេសលោក ឆឹង គួភីងដូចបាននិយាយថានៅអាស៊ីកណ្តាល លោកស៊ីគ្រោងនឹងចុះហត្ថលេខាលើកិច្ចព្រមព្រៀងស្តីពីប្រេង ឧស្ម័នធម្មជាតិ ការដឹកជញ្ជូន និងវិនិយោគ។
កាសែតនោះ បាននិយាយថា ចិនបាននាំចូលឧស្ម័នធម្មជាតិចំនួន៦០ពាន់លានម៉ែត្រគុបពីអាស៊ីកណ្តាលចាប់តាំងពីឆ្នាំ២០០៩។
លោកស៊ីនឹងចូលរួមជាមួយមេដឹកនាំG20 នៅក្រុងឡេនីនក្រាត( St Petersburg) ដែលនឹងចាប់ផ្តើមនៅថ្ងៃព្រហស្បតិ៍ដែលការផ្តោតសំខាន់មួយនឹង ផ្តោតលើកំណើនយឺតក្នុងប្រទេសចិន និងទីផ្សារកំពុងកើនឡើងដ៏ធំនៃបណ្តាប្រទេសប្រេស៊ីល រុស្ស៊ី ឥណ្ឌា និងអាហ្វ្រិកខាងត្បូង៕ CC By Phnom Penh Post

Wednesday, September 4, 2013

សារពីឯកអគ្គរាជទូតម៉ាឡេស៊ីប្រចាំនៅកម្ពុជា

លោកឯកអគ្គរាជទូត DATUK PENGIRAN HAJI MOHD HUSSEIN។

នៅក្នុងឱកាសខួបលើក ទី៥៥នៃទិវាបុណ្យជាតិម៉ាឡេស៊ី ខ្ញុំសូមជូនពរដល់ប្រជាជនម៉ាឡេស៊ីទាំងអស់ ក៏ដូចជាសហសេវិក និងមិត្តជាទីរាប់អានទាំងអស់នៅប្រទេសកម្ពុជា ជួបតែសេចក្ដីសុខ សំណាងល្អ។ ប្រធានបទសម្រាប់ទិវាបុណ្យជាតិលើកនេះ គឺ «ឆ្នាំទី៥៥នៃការទទួលបានឯករាជ្យជាតិ៖ ការបំពេញតាមសន្យា (៥៥ TahunMerdeka: JanjiDitepati)»។
នៅក្នុងទិវាដ៏វិសេសវិសាលនេះ ខ្ញុំសូមឲ្យប្រជាជនម៉ាឡេស៊ីទាំងអស់ ក្រឡេកមើលទៅអតីតកាល និងចងចាំបុព្វបុរសរបស់យើង ក៏ដូចជាអ្នកដែលបានលះបង់ជាច្រើន ដើម្បីតែបុព្វហេតុជាតិដ៏ធំធេងរបស់យើង។ ការយល់ដឹងរបស់ថ្នាក់ដឹកនាំយើង ប្រកបដោយភាពអត់ធ្មត់ យោគយល់ និងទុកចិត្តមនុស្សចម្រុះជាតិសាសន៍ដែលមានវប្បធម៌ និងជំនឿសាសនាផ្សេងៗគ្នា បាននាំឲ្យមានសង្គមមួយប្រកបដោយសាមគ្គីភាព សុខដុមរមនា និងសន្តិភាព សម្រាប់មនុស្សគ្រប់វណ្ណៈ។ ទស្សនវិស័យរបស់ថ្នាក់ដឹកនាំយើងដែលបានដាក់ឲ្យអនុវត្ត យុទ្ធសាស្ត្រ អភិវឌ្ឍន៍ និងសេដ្ឋកិច្ចពាក់ព័ន្ធ ធានាបានថា ប្រជាជនម៉ាឡេស៊ី រស់នៅប្រកបដោយភាពរីកចម្រើន ការអប់រំ និងការថែទាំសុខភាព ក្នុងបរិស្ថានប្រកបដោយសន្តិភាព សុវត្ថិភាព។
ក្រោម ការដឹកនាំរបស់លោកនាយករដ្ឋមន្ត្រី YAB Dato’Sri Najib Bin Tun Abdul Razak គោលគំនិត«ខ្ញុំជាជនជាតិម៉ាឡេស៊ី» ត្រូវបានបង្កើតឡើងដើម្បីកសាងប្រទេសជាតិ ដោយផ្តោតជាសំខាន់លើសុខុមាលភាព ការបង្រួបបង្រួមជាតិ និងអភិបាលកិច្ចប្រកបដោយប្រសិទ្ធភាព។ ការធ្វើកំណែទម្រង់ និងកម្មវិធីផ្លាស់ប្តូរជាច្រើន ត្រូវបានបង្កើតឡើង ហើយក្នុងចំណោមកម្មវិធីទាំងនោះ មានកម្មវិធីផ្លាស់ប្តូររដ្ឋាភិបាល (GTP) ដែលធ្វើឲ្យរដ្ឋាភិបាលដំណើរការទៅដោយរលូន ប្រសិទ្ធភាព និងស្អាតស្អំ និងកម្មវិធីផ្លាស់ប្តូរសេដ្ឋកិច្ច (ETP) ដែលរួមចំណែកធ្វើឲ្យមានកំណើននៅប្រទេសម៉ាឡេស៊ី និងសម្រេចបានទស្សនវិស័យរបស់ប្រទេសនេះ ក្នុងការអភិវឌ្ឍជាតិទាំងស្រុងនៅមុន និងត្រឹមឆ្នាំ២០២០។
ចាប់ តាំងពីកម្មវិធីផ្លាស់ប្តូរទាំងនោះ ត្រូវបានបង្កើតឡើងនៅឆ្នាំ២០១០ ម៉ាឡេស៊ី បានបង្កើនប្រាក់ចំណូលក្នុងប្រជាជនម្នាក់ៗពី ៦៧០០ដុល្លារអាមេរិក ទៅ៩៧០០ នៅឆ្នាំ២០១១ ហើយគោលដៅសម្រាប់ឆ្នាំ២០២០ គឺ ១៥ ០០០ដុល្លារអាមេរិក។ ទាក់ទងនឹងការវិនិយោគ ការវិនិយោគផ្ទាល់ពីបរទេស (FDI) បានកើនឡើង១២,៣ភាគរយ រហូតដល់ ៣៣ពាន់លាន RM (ជាង ១០ពាន់លានដុល្លារអាមេរិក) ខណៈដែលការវិនិយោគរបស់ឯកជន បានកើនឡើង ១៩ភាគរយ រហូតដល់ ៩៤ពាន់លាន RM (ប្រហែល ៣០ពាន់លានដុល្លារអាមេរិក) កាលពីឆ្នាំ២០១១ បើធៀបនឹងឆ្នាំ២០១០។
ការធ្វើកំណែទម្រង់ និងកម្មវិធីផ្លាស់ប្តូរ បានរួមចំណែកដល់ការទទួលស្គាល់ម៉ាឡេស៊ី ជាប្រទេសមួយ ក្នុងចំណោមប្រទេសពោរពេញដោយការប្រកួតប្រជែងខ្លាំងបំផុតចំនួន ២១ នៅលើពិភពលោក ក្នុងឆ្នាំ២០១២ ដោយរបាយការណ៍វេទិកាសេដ្ឋកិច្ចពិភពលោក។ ធនាគារពិភពលោក ក៏បានទទួលស្គាល់ និងផ្តល់ចំណាត់ថ្នាក់ទី១៨ ដល់ម៉ាឡេស៊ី ក្នុងនាមជាប្រទេសដែលងាយស្រួលចាប់ផ្តើម និងធ្វើពាណិជ្ជកម្ម ពោលគឺនាំមុខប្រទេសមួយចំនួន ដូចជា អាល្លឺម៉ង់ ជប៉ុន តៃវ៉ាន់ និងបារាំង។
ក្នុងនាមជាប្រជាជនម៉ាឡេស៊ី យើងទាំងអស់គ្នា ពិតជាមានមោទនភាពចំពោះសមិទ្ធផលសម្រេចបាន ចាប់តាំងពីទទួលបានឯករាជ្យមក ដោយប្រទេសរបស់យើង ទទួលបានសន្តិភាព និងស្ថិរភាពតរៀងមក ហើយប្រជាជនចម្រុះជាតិសាសន៍នោះ រស់នៅប្រកបដោយសាមគ្គីភាព ចម្រុងចម្រើន សុខភាពល្អ និងការអប់រំកាន់តែខ្ពស់ ស្របពេលដែលប្រទេសនេះ ត្រូវបានទទួលស្គាល់ថាជាសមាជិកដ៏សំខាន់ក្នុងសហគមន៍ពិភពលោក។
ប្រទេស ម៉ាឡេស៊ី កំពុងមានទំនាក់ទំនងដ៏រឹងមាំ និងប្រកបដោយមេត្រីភាពជាមួយកម្ពុជា។ ប្រទេសនេះ ជាវិនិយោគិនដ៏យូរអង្វែងមួយនៅកម្ពុជា ហើយបានបណ្តាក់ទុនជាង ២,៨ពាន់លានដុល្លារអាមេរិក ចាប់តាំងពីដើមទសវត្សរ៍ ១៩៩០មក ហើយបច្ចុប្បន្ន ជាវិនិយោគិនធំទីបួននៅកម្ពុជា។ បច្ចុប្បន្ន ប្រទេសនេះ បានបណ្តាក់ទុនក្នុងវិស័យជាច្រើន រួមមាន ធនាគារ សណ្ឋាគារ ទូរគមនាគមន៍ បរិក្ខារ និងឧស្សាហកម្ម។ ពាណិជ្ជកម្មទ្វេភាគីរបស់យើង បានកើនឡើងដល់ ៣២៤លានដុល្លារអាមេរិក នៅឆ្នាំ២០១១ បើធៀបនឹងឆ្នាំ២០១០ ដែលមាន ២២៩លានដុល្លារអាមេរិក។ សំខាន់ជាងនេះទៀត ការនាំចេញរបស់កម្ពុជា ទៅម៉ាឡេស៊ី បានកើនឡើង ៩៥,៥ភាគរយ នៅឆ្នាំ២០១១ បើធៀបនឹងឆ្នាំ២០១០។ និន្នាការនេះ ត្រូវបានគេរំពឹងថានឹងបន្តកើនឡើងនៅឆ្នាំនេះ។ ភ្ញៀវទេសចរម៉ាឡេស៊ីប្រហែល ១០ម៉ឺននាក់ បានមកកម្ពុជា កាលពីឆ្នាំ២០១១ ធៀបនឹងឆ្នាំ២០១០ ដែលមាន ៨៤ ០០០នាក់។ ភ្ញៀវកម្ពុជា ទៅទស្សនាប្រទេសម៉ាឡេស៊ី ក៏បានកើនឡើងពី ៤៨ ០០០នាក់ កាលពីឆ្នាំ២០១០ រហូតដល់ប្រហែល ៥០ ០០០នាក់ នៅឆ្នាំ២០១១កន្លងទៅ។
រដ្ឋាភិបាល កម្ពុជា បានទទួលស្គាល់ការរួមចំណែករបស់ពាណិជ្ជកម្មម៉ាឡេស៊ី ក្នុងសេដ្ឋកិច្ចកម្ពុជា។ កំណើនពាណិជ្ជកម្មទ្វេភាគី ការវិនិយោគ និងការទំនាក់ទំនងរវាងប្រជាជនប្រទេសទាំងពីរ ប្រទេសជាសមាជិកអាស៊ានទាំងពីរ រំពឹងថានឹងសម្រេចបានជោគជ័យដ៏ប្រសើរនៅក្នុងសហគមន៍សេដ្ឋកិច្ច អាស៊ាន (AEC) ដែលនឹងមកដល់នៅឆ្នាំ២០១៥។ ក្នុងបុព្វហេតុនេះ យើងសូមចូលរួមអបអរសាទរកម្ពុជាដែលបានធ្វើជាប្រធានអាស៊ាន ឆ្នាំ២០១២ និងដើរតួនាទីយ៉ាងសំខាន់ទៅរកការយល់ដឹងអំពី ទស្សនវិស័យដ៏ធំធេងនេះ។ អ្វីដែលគួរឲ្យចាប់អារម្មណ៍នោះ គឺប្រទេសម៉ាឡេស៊ី នឹងធ្វើជាប្រធានអាស៊ានសម្រាប់ឆ្នាំ២០១៥។ អ្វីដែលជាក្តីសង្ឃឹមរបស់រដ្ឋាភិបាលម៉ាឡេស៊ីនោះគឺ វិនិយោគិន និងប្រជាជនម៉ាឡេស៊ីដែលកំពុងធ្វើការនៅកម្ពុជា នឹងបន្តរួមចំណែកដល់ការអភិវឌ្ឍ និងការរីកចម្រើនសេដ្ឋកិច្ចរបស់ប្រទេស ឲ្យកាន់តែខ្លាំងក្លា ព្រមទាំងជួយពង្រីកទំនាក់ទំនងកាន់តែប្រសើររវាងកម្ពុជា និងម៉ាឡេស៊ី។
ក្នុងឱកាសដ៏វិសេសវិសាលនេះ ខ្ញុំសូមថ្លែងអំណរគុណដល់រាជរដ្ឋាភិបាលកម្ពុជា ដែលបានជួយសម្របសម្រួល និងសហប្រតិបត្តិការជាមួយស្ថានទូតម៉ាឡេស៊ី និងសូមឲ្យរាជរដ្ឋាភិបាល និងប្រជាជនកម្ពុជា សម្រេចបានជោគជ័យដ៏ធំធេង សន្តិភាព និងភាពរុងរឿងជាដរាប៕
DATUK PENGIRAN HAJI MOHD HUSSEIN BIN DATUK PENGIRAN HAJI MOHD TAHIR NASRUDDIN
ឯកអគ្គរាជទូតម៉ាឡេស៊ីប្រចាំប្រទេសកម្ពុជា By Phnom Penh Post

ទស្សនាសួនច្បាររចនាម៉ូដបែបប្លែកឯទឹកដីស្កុតឡេន

សួនច្បារចក្កវាឡ មានរាងជាកូនភ្នំដូចគូទខ្យងផុសលើស្រះទឹក។

ក្រុងឡុងដ៍ : លោកឆាលេសចេនក្ស(Charles Jencks)គឺជាវិចិត្រករ និងអ្នកកែច្នៃម៉ូដជាតិអាមេរិកបានប្រើវាជារូបរាងសណ្ឋានដីប្លែក ៗ ធ្វើឲ្យស្នាដៃស្ថាបត្យកម្មរបស់លោកមានលក្ខណៈទំនើប និងគួរជាទីចាប់អារម្មណ៍នៃមនុស្សលោក។

ដូច្នេះហើយបានជាគេឃើញមានព្រឹត្តិការណ៍ និងកម្មវិធីប្រជុំស្ថាបត្យកម្មមួយចំនួនបានបង្ហាញអត្ថន័យនិងណែនាំ ឲ្យមនុស្សជំនាន់ក្រោយដឹងច្បាស់ពីស្នាដៃសិល្បៈរបស់លោក។

លោកឆាលេសចេនក្សមានកំណើតនៅឯសហរដ្ឋអាមេរិក ខណៈលោកបានចំណាយពេលប្រមាណជាង៤ទសវត្សរ៍រស់នៅលើទឹកដីប្រទេស អង់គ្លេស។ ទីនោះហើយជាកន្លែងមួយដែលលោកបានសិក្សារៀនសូត្រនូវមុខជំនាញកែច្នៃ លើម៉ូដអគារនិងទេសភាពនានាដែលមានប្រជាប្រិយភាពបំផុត។ លោកបានប្រែក្លាយវាលទំនាប ខ្ពង់រាប និងសណ្ឋានដីកំពីកកំពកឲ្យទៅជាទេសភាពដ៏ប្លែកបំផុតក្នុងលោក។

ជាក់ស្តែងស្នាដៃរបស់ស្ថាបត្យករវ័យ៧៤ឆ្នាំរូបនេះរួមមានសួនច្បារ ចក្កវាឡ (Garden of Cosmic Speculation) ដែលស្ថិតនៅឯប្រទេសស្កុតឡេនដោយលោកបានចេញម៉ូដវាកាលឆ្នាំ១៩៨៨ និងធ្វើដើម្បីឧទ្ទិសទៅដល់ភរិយាចុងក្រោយរបស់លោក។ សួនច្បារនោះត្រូវបានមតិមហាជនកោតសរសើរយ៉ាងខ្លាំង ជាពិសេសពីសំណាក់ក្រុមអ្នកវិទ្យាសាស្រ្ត និងក្រុមគណិតវិទូទៅលើស្នាដៃឆ្លាក់រូបទេសភាពលើសណ្ឋានដីរបស់លោក។ វាជាសួនច្បារមានស្រះទឹករាងដូចចំណិតដួងខែ មានផ្ទៃដីដាំស្មៅក្រវិកក្រវក់នៅលើផ្ទៃទឹកកូនភ្នំរាងដូចគូទខ្យង និងវាលដាំស្មៅជាក្រឡាចត្រង្គបីដូចជារូបធរណីមាត្រក្នុងទ្រឹស្ដី គណិតវិទ្យា។

សួនច្បារនេះមិនមែនជាទីកន្លែងមានដើមរុក្ខជាតិដុះឬពោរពេញដោយ បុប្ផាចម្រុះពណ៌ទេ តែមនុស្សម្នានៅតែចង់ទៅលេងទីនោះដោយសារវាមានទ្រង់ទ្រាយចម្លែក និងត្រូវបានរចនាតាមទ្រឹស្ដីបាតុភូតវិទ្យាសាស្រ្តនិងគណិតវិទ្យាគួរ ឲ្យចាប់អារម្មណ៍៕ PR By Phnom Penh Post

Tuesday, September 3, 2013

លេងផង រៀនផងនៅមណ្ឌលកម្សាន្តអប់រំបែបវិទ្យាសាស្ត្រទី១ Kids City

យុវតីម្នាក់កំពុងលេងឧបករណ៍មួយដែលអាចឲ្យគេដឹងពីសកម្មភាពរបស់អ្នកអវកាសពេលស្ថិតក្នុងលំហ។ រូបថត សេត គឹមសឿន

ភ្នំពេញៈ ដោយសម្លឹងមើលឃើញពីភាពរីកចម្រើននៃការសិក្សាអប់រំកាន់តែស្ទុះឡើង គួរឲ្យកត់សម្គាល់នៅក្នុងសង្គមកម្ពុជានោះ ទើបមជ្ឈមណ្ឌលកម្សាន្តអប់រំបែបវិទ្យាសាស្ត្រដំបូងបំផុតត្រូវបានលេច វត្តមានឡើងនៅក្នុងអគារកម្ពស់១១ជាន់គឺ Kids City ដែលស្ថិតជាប់នឹងអគារកម្ពស់៤២ជាន់ នៅកណ្តាលរាជធានីភ្នំពេញ។

លោក ទូច ពុទ្ធី ប្រធានផ្នែកវិទ្យាសាស្ត្រនៅអគារKids City បានឲ្យដឹងថា Kids City ដែលមានផ្នែកកម្សាន្តចម្រុះ បានបើកសម្ពោធជាផ្លូវការកាលពីថ្ងៃទី១ មិថុនា ឆ្នាំនេះ។ អគារនេះទទួលការផ្គត់ផ្គង់ផ្នែកបច្ចេកទេសពីមជ្ឈមណ្ឌលដ៏ធំមួយរបស់ ប្រទេសនូវែលសេឡង់ ឈ្មោះថា Science Alive ហើយវាប្រៀបបាននឹងទីក្រុងមួយដែលកុមារ និងយុវវ័យអាចស្វែងរកការកម្សាន្តបែបវិទ្យាសាស្ត្រជាច្រើនប្រភេទ ដូចជាកីឡាកម្សាន្ត សួនកម្សាន្តកុមារ ការស្រាវជ្រាវបែបវិទ្យាសាស្ត្រ ស្គីទឹកកកពិតៗ និងការឡើងជញ្ជាំងជាដើម។ ក្រៅពីនេះ Kids City ក៏មានអគារលក់ទំនិញកុមារខោអាវ និងសម្ភារកុមារមួយចំនួនទៀត ហើយក្នុងនោះក៏មានការលក់កាហ្វេ និងមានអាហារដ្ឋានល្បីឈ្មោះលំដាប់ពិភពលោកផងដែរ។

ដោយឡែកអ្វីដែលជាគ្រឹះធំរបស់អគារ Kids City គឺមជ្ឈមណ្ឌលកម្សាន្តស្រាវជ្រាវបែបវិទ្យាសាស្ត្រ ដែលស្ថិតនៅជាន់ទី៩។ លោក ពុទ្ធី បានបញ្ជាក់ថា៖«ចំណុចពិសេសរបស់ការកម្សាន្តបែបវិទ្យាសាស្ត្រនៅ ជាន់ទី៩ គឺកុមារ និងយុវវ័យចាប់ពីអាយុ៦ឆ្នាំឡើងទៅ ពួកគាត់នឹងរៀនដោយមិនដឹងខ្លួន និងគ្មានការធុញទ្រាន់»។

អ្នកគ្រប់គ្រងរូបនេះបានឲ្យដឹងថា កន្លែងកម្សាន្តបែបវិទ្យាសាស្ត្រនេះ មានប្រធានបទគោលចំនួន៦ធំៗគឺ ទី១ផ្តោតលើសំឡេង ទី២ ស្វែងយល់ពីពន្លឺ(អុបទិក) ទី៣ ប្រព័ន្ធសុរិយគតិ(សិក្សាពីភពជុំវិញព្រះអាទិត្យ ពិសេសពីផែនដីផ្ទាល់) ទី៤ សិក្សាពីកម្លាំង (ខ្យល់ កម្លាំងកកិត និងទំនាញ) ទី៥ កម្សាន្ត និងសិក្សាពីអគ្គិសនី និងមេដែក(សិក្សាពីសារៈសំខាន់របស់មេដែក និងការបង្កើតអគ្គិសនី) ទី៦ ល្បែងល្បងប្រាជ្ញា អ្នកវិទ្យាសាស្ត្ររកឃើញថា កាលណាយើងព្យាយាមដោះស្រាយល្បងប្រាជ្ញា ខួរក្បាលរបស់យើងនឹងដំណើរល្អ។ លោកបានបញ្ជាក់ថា ជារួមនៅកន្លែងកម្សាន្តបែបវិទ្យាសាស្ត្រមានឧបករណ៍ចំនួន៥០ត្រូវ បានដាក់ឲ្យកុមារ និងយុវវ័យលេងកម្សាន្ត និងស្វែងយល់។

លោកពន្យល់ថា៖«ការកម្សាន្តបែបវិទ្យាសាស្ត្រជាបច្ចេកវិទ្យា ដំបូងបំផុតនៅកម្ពុជា។ វាមានសារសំខាន់បំផុត ដែលកុមារនិងយុវវ័យអាចលេងកម្សាន្តយ៉ាងរីករាយទន្ទឹមនឹងនោះ ពួកគេក៏អាចស្វែងយល់ពីមូលដ្ឋានគ្រឹះរបស់វិទ្យាសាស្ត្រដោយមិនដឹង ខ្លួន ពោលគឺពួកគេលេងផង រៀនផង។ពេលនោះពួកគេនឹងដឹងថា ពន្លឺមានប្រភពមកពីណា ផែនដីយើងយ៉ាងម៉េច តើកម្លាំងកើតមកពីអ្វី ទំនាញផែនដី គឺជាអ្វី និងចំណេះដឹងជាច្រើនទៀត ហើយអ្វីដែលពិសេសនោះគឺពួកគេអាចលេងល្បែងល្បងប្រាជ្ញាទទួលរង្វាន់ ទៀតផង»។

លោកបន្ថែមថា៖«ការបង្កើតកន្លែងកម្សាន្តបែបវិទ្យាសាស្ត្រនេះ បានចូលរួមចំណែកសង្គមយ៉ាងច្រើន ពិសេសលើផ្នែកសិក្សាវិទ្យាសាស្ត្ររបស់កុមារ និងយុវវ័យ ខណៈសាលានៅកម្ពុជាមួយចំនួនមិនទាន់មានបន្ទប់ពិសោធន៍សម្រាប់បង្ហាញ សិស្សនៅឡើយ»។

បន្ថែមលើប្រធានបទគោលទាំង៦ ដែលជាមូលដ្ឋានគ្រឹះរបស់វិទ្យាសាស្ត្រ លោក ពុទ្ធី បានឲ្យដឹងថា នៅឆ្នាំក្រោយនេះ Kids City នឹងបង្កើតផ្នែកមួយទៀតដែលមានឈ្មោះថា Science Discovery ដើម្បីបំពេញការចង់ដឹងរបស់មនុស្សគ្រប់រូប។

ជាមួយគ្នានឹងការបើកមជ្ឈមណ្ឌលកម្សាន្តអប់រំបែបវិទ្យាសាស្ត្រ ដំបូងបង្អស់នៅកម្ពុជានេះ លោក ទូច ពុទ្ធី បានសម្តែងនូវក្តីសង្ឃឹមថា៖«ខ្ញុំជឿជាក់ថា នឹងទទួលបានផ្លែផ្កាល្អព្រោះវិស័យអប់រំកំពុងដំណើរការល្អពិសេស វិស័យឯកជន ហើយកុមារ និងយុវជនក៏មានកំណើនខ្ពស់ ដែលពួកគេម្នាក់ៗកំពុងស្រេកឃ្លានការទទួលយកចំណេះដឹងទាំងនោះ និងអនុវត្តផ្ទាល់តែម្តង»៕ By Phnom Penh Post

Microsoft ទិញអាជីវកម្មទូរស័ព្ទ Nokia

បុគ្គលិកក្រុមហ៊ុន Nokia លើកបង្ហាញទូរស័ព្ទ Lumia 925 ក្នុងសន្និសីទបង្ហាញទូរស័ព្ទ។ B.g

ក្រុងហែលស៊ីគិៈ ក្រុមហ៊ុន Microsoft Corp បានព្រមព្រៀងទិញយកអាជីវកម្មផលិតទូរស័ព្ទចល័ត និងអាជ្ញាប័ណ្ណប៉ាតង់របស់ក្រុមហ៊ុន Nokia Oyj ក្នុងតម្លៃ ៥,៤៤ ពាន់លានអឺរ៉ូ (៧,២ ពាន់លានដុល្លារ) ខណៈក្រុមហ៊ុនរបស់ប្រទេសហ្វាំងឡង់ដែលធ្លាប់ជាក្រុមហ៊ុនផលិត ទូរស័ព្ទចល័តធំជាងគេរបស់ពិភពលោកមួយនេះកំពុងព្យាយាមរក្សាចំណែក ទីផ្សារ។

ក្រុមហ៊ុនទាំងពីរបានឲ្យដឹងក្នុងសេចក្តីថ្លែងការណ៍មួយកាលពី ថ្ងៃម្សិលមិញថា កិច្ចព្រមព្រៀងនេះរួមមាន ការចំណាយថវិកាចំនួន ៣,៧៩ ពាន់លានអឺរ៉ូសម្រាប់ទិញយកអាជីវកម្មក្រុមហ៊ុនផលិតគ្រឿង អេឡិចត្រូនិកចល័ត និងថវិកាចំនួន ១,៦៥ ពាន់លានអឺរ៉ូ សម្រាប់ទិញយកប៉ាតង់។ លោក Stephen Elop នាយកប្រតិបត្តិរបស់ក្រុមហ៊ុន Nokia នឹងចាកចេញពីក្រុមហ៊ុន Nokia ដើម្បីទៅបម្រើការឲ្យក្រុមហ៊ុន Microsoft។

ក្រុមហ៊ុន Nokia កំពុងដោះស្រាយបញ្ហាលំហូរសាច់ប្រាក់ដែលបង្កឡើងដោយសារការ ធ្លាក់ចុះតម្រូវការគ្រឿងអេឡិចត្រូនិក ខណៈទូរស័ព្ទរបស់ខ្លួនបានបាត់បង់ចំណែកទីផ្សារ ដោយសារផលិតផលរបស់ក្រុមហ៊ុន Apple Inc និងទូរស័ព្ទដែលប្រើប្រាស់កម្មវិធីប្រតិបត្តិការ Android របស់ក្រុមហ៊ុន Google Inc។

លោក Elop បានកាត់បន្ថយការងារជាង ២ ម៉ឺនកន្លែង និងបានពន្យារពេលចែកភាគលាភរបស់ក្រុមហ៊ុននេះ កាលពីខែមករា ក្នុងគោលបំណងស្តារស្ថានភាពហិរញ្ញវត្ថុរបស់ក្រុមហ៊ុន។

លោក Risto Siilasmaa ប្រធានក្រុមហ៊ុន Nokia បានឲ្យដឹងក្នុងសេចក្តីថ្លែងការណ៍មួយថា៖ «បន្ទាប់ពីការវាយតម្លៃយ៉ាងហ្មត់ចត់ស្តីពីវិធីបង្កើនតម្លៃម្ចាស់ ភាគហ៊ុនឲ្យដល់កម្រិតអតិបរមា រួមទាំងការពិចារណាលើជម្រើសផ្សេងៗមក យើងជឿជាក់ថា ប្រតិបត្តិការលក់អាជីវកម្មនេះ គឺជាមាគ៌ាមួយដ៏ប្រសើរបំផុតចំពោះក្រុមហ៊ុន Nokia និងម្ចាស់ភាគហ៊ុនរបស់ខ្លួន»។

លោក Siilasmaa នឹងក្លាយជានាយកប្រតិបត្តិបណ្តោះអាសន្នរបស់ក្រុមហ៊ុន Nokia។

ក្រុមហ៊ុន Nokia បានរាយការណ៍កាលពីខែកក្កដាថា ការលក់ទូរស័ព្ទដៃនៅត្រីមាសទីពីរ បានធ្លាក់ចុះ ២៧ ភាគរយ ហើយក្រុមហ៊ុននេះបានខាតបង់ថវិកាជាង ៥ ពាន់លានអឺរ៉ូ ក្នុងរយៈពេល ៩ ត្រីមាស៕ Bloomberg/BP By Phnom Penh Posh

Saturday, June 29, 2013

កូនស្រីប្រលងធ្លាក់ ឪពុកឲ្យក្រុមគ្រួសារទាំងមូល លោតទឹក សម្លាប់ខ្លួន

ការប្រលងចូលរៀនថ្នាក់ មហាវិទ្យាល័យពិតជាសំខាន់ណាស់ សម្រាប់អ្នករស់នៅក្នុងប្រទេសចិន ដែលទាំងនេះហើយបាន ធ្វើឲ្យគ្រួសារមួយ មកលោតទឹកសម្លាប់ខ្លួន ដោយសារតែកូនស្រីធ្លាក់ ការប្រលងត្រៀមចូលមហាវិទ្យាល័យនោះ។
យោងទៅប្រភពព័ត៌មានរបស់ប្រទេសចិន បានឲ្យដឹងថា ក្រុមគ្រួសាមួយនេះ គឺជាអ្នករស់នៅ ក្នុងទីក្រុង Gong’an ខេត្ដ Hubei ដែលនៅក្នុងនោះ ក្មេងស្រីដែល ត្រូវចូលប្រលងនោះ មានឈ្មោះថា Xiao Fu ។ យ៉ាងណាមិញ ក្មេងស្រីនេះ ក៏ជាសិស្សម្នាក់ដែលរៀនពូកែ ដូចនេះទើបនាងជំរុញឲ្យចូលប្រលងថ្នាក់ មហាវិទ្យាល័យ ដែលនៅក្នុងនោះ ឪពុកម្ដាយរបស់នាង ក៏មិនមានការព្រួយបារម្មណ៍អ្វីដែរ ដោយសារតែកូនចេះស្រាប់។
ទោះជាយ៉ាងណា លទ្ធផលចុងក្រោយនោះ គឺនាងប្រលងធ្លាក់ ដែលធ្វើឲ្យឪពុកនាងស្លុតជាខ្លាំង និងទទូចឲ្យក្រុមគ្រួសាររបស់នាង សម្លាប់ខ្លួនតែម្ដងទៅ ដោយលោតចូលទឹកទន្លេ។ សំណាងល្អហើយ ដែលក្រុមគ្រួសាររបស់នាង ត្រូវបានប្រជាជននៅក្នុងតំបន់ជួយ សង្គ្រោះបានទាន់ពេលវេលា។
តាមការសើុបអង្កេត បានឲ្យដឹងថា ក្រុមគ្រួសាររបស់ក្មេងស្រីនេះ ពិតជាមានជីវភាពក្រីក្រណាស់ ដែលមានតែដីស្រែបន្ដិចបន្ដួច សម្រាប់ចិញ្ចឹមជីវិតែប៉ុណ្ណោះ។ ម្យ៉ាងវិញទៀត បើសិនជាកូនស្រីនេះ អាចប្រលងជាប់ចូលមហាវិទ្យាល័យនោះ នោះក្រុមគ្រួសារនេះ នឹងអាចទទួលបាន ការឧបត្ថម្ភផ្សេងៗ ដែលអាចធ្វើឲ្យក្រុមគ្រួសារនេះ សប្បាយចិត្ដដូចគ្នា។
ថ្មីៗនេះ បានឲ្យដឹងថា អ្នកភូមិ មួយចំនួនបាន ចាប់ផ្ដើមបរិច្ចាគ របស់ផ្សេងៗ ទៅកាន់ក្រុមគ្រួសារនេះ ដើម្បីទុកពេលវេលាខ្លះ ដើម្បីឲ្យពួកគេអាចចេះគិត និងពិចារណាសារឡើងវិញ។
តើប្រិយមិត្ដយល់យ៉ាងណា?